República Dominicana

La Constitución actual del país, que reforma'l testu anterior, ta vixente dende'l 26 de xineru de 2010. Nella defínese a la República Dominicana como un estáu llibre y independiente, y al so gobiernu como civil, republicanu, democráticu y representativu.

El poder executivu ye exercíu pol presidente de la república, que s'escueye por votu direutu cada cuatro años. El presidente, y tamién el vicepresidente, tienen de ser dominicanos de nacimientu y con residencia nel país los cinco años anteriores a la so eleición. Hai, tamién, un gabinete de ministros p'aidar al presidente nel exerciciu de les sos funciones.

El poder llexislativu reside nun congresu bicameral: confórmenlu'l Senáu, formáu por 32 senadores (ún por cada provincia y otru pol distritu nacional) y la Cámara de Diputaos, con 183 miembros. Diputaos y senadores han ser escoyíos cada cuatro años. Sicasí, l'actual periodu parllamentariu, qu'entamó'l 16 d'agostu de 2010, ha durar seis años, de magar un artículu transitoriu aprobáu na Constitución de 2010 establezlo así col envís d'axuntar les eleiciones llexislatives y les presidenciales en 2016. No que cinca al poder xudicial, el so muérganu cimeru ye la Suprema Corte de Xusticia.

Gobiernu

El presidente del país ye, dende'l 16 d'agostu de 2008, Leonel Fernández Reyna, y el so vicepresidente ye Rafael Alburquerque. El gabinete de ministros fórmenlu los siguientes ministros y cargos con rangu ministerial:

• Procurador Xeneral: Radhamés Jiménez.
• Fuercies Armaes: Joaquin Virgilio Pérez Feliz.
• Interior y Policía: José Ramón Fadul.
• Rellaciones Esteriores: Carlos Morales Troncoso.
• Finances: Daniel Toribio.
• Agricultura: Salvador Jiménez.
• Salú Pública y Asistencia Social: Bautista Rojas Gómez.
• Educación: Josefina Pimentel.
• Industria y Comerciu: Manuel García Arévalo.
• Obres Públiques y Comunicaciones: Víctor Díaz Rúa.
• Deportes, Educación Física y Recreación: Felipe Payano.
• Trabayu: Francisco Domínguez Brito.
• Turismu: Francisco Javier García.
• Cultura: José Rafael Lantigua.
• Mediu Ambiente y Recursos Naturales: Ernesto Reyna.
• Mocedá: Franklin Rodríguez.
• Muyer: Alejandrina Germán.
• Gobernador del Bancu Central: Héctor Valdez Albizu.

El presidente de la Cámara de Diputaos ye Abel Martínez, y el del Senáu Reinaldo Pared Pérez.

Los partíos políticos más importantes, y los sos principales cabezaleros, son los que vienen darréu:

• Partíu Reformista Social Cristianu (PRSC). El so presidente ye Carlos Morales Troncoso.
• Partíu Revolucionariu Dominicanu (PRD), que'l so presidente ye Miguel Vargas Maldonado.
• Partíu de la Lliberación Dominicana (PLD), que tien de presidente a Leonel Fernández.

No que cinca a los sindicatos, hai bien dellos sectoriales. Los más destacaos d'ente los sindicatos de clase son:

• Confederación de Trabayadores Xunitarios (CTU), que'l so presidente ye Agustín Vargas Saillant.
• Confederación Autónoma Sindical Clasista (CASC). El so principal cabezaleru ye Gabriel del Río.
• Central Xeneral de Trabayadores (CGT), que tien a Rafael Abréu como secretariu xeneral.
• Central Nacional de Trabayadores Dominicanos (CNTD). El so secretariu xeneral ye Mariano Negrón.

• Presidencia de la República
• Cámara de Diputaos
• Senáu de la República
• Bancu Central de la República Dominicana
• Oficina Nacional d'Estadística
• Ministeriu de Turismu