Міхаіл Бачыла
Міхаіл Бачыла, поўнае імя Міхаіл Анатолевіч Бачыла (англ.: і польск.: Mikhail Bachyla, руск.: Михаил Бачило; нар. 31 ліпеня 1994, Мінск, Рэспубліка Беларусь) — беларускі і польскі трубач, міжнародны саліст. З 2017 года працуе ў сімфанічным аркестры «Sinfonia Iuventus» імя Ежы Сэмкова (Польшча)[1][2][3][4].
Міхаіл Бачыла | |
---|---|
| |
Асноўная інфармацыя | |
Дата нараджэння | 31 ліпеня 1994 (29 гадоў) |
Месца нараджэння | |
Краіна | |
Месца працы | |
Музычная дзейнасць | |
Прафесіі | музыкант |
Інструменты | труба |
Жанры | класічная музыка |
Біяграфія
Нарадзіўся ў Мінску 31 ліпеня 1994 года. Маці і дзед па маці — музыкі. У 2013 годзе скончыў Гімназію-каледж мастацтваў імя І. В. Ахрэмчыка ў Мінску[5].
Тры гады навучаўся на аркестравым факультэце кафедры медных духавых і ўдарных інструментаў Беларускай дзяржаўнай акадэміі музыкі (клас прафесара М. М. Волкава )[6][7], у 2017 годзе скончыў Кракаўскую музычную акадэмію (клас прафесара Беныдыкта Матусіка )[8], затым — магістратуру ў Музычнай акадэміі імя Фелікса Нававейскага ў Быдгашчы (Польшча) па класе натуральнай трубы (клас прафесара Томаша Слюсарчыка (Tomasz Ślusarczyk) і выкладчыка Міхала Тыраньскага (Michał Tyrański)). Грае на музычных інструментах — труба натуральная (барокавая); труба ўсіх строяў Сі-бемоль, До, Рэ/Мі-бемоль; труба-пікала ; карнет; флюгельгорн ; фартэпіяна.
Творчая дзейнасць
Музычныя калектывы:
- 2013—2014 гады — Заслужаны калектыў Рэспублікі Беларусь «Нацыянальны акадэмічны аркестр сімфанічнай і эстраднай музыкі» (цяпер Заслужаны калектыў «Нацыянальны акадэмічны канцэртны аркестр Беларусі імя М. Я. Фінберга»), артыст аркестра другой катэгорыі[9];
- 2014—2016 гады — беларускі кавер-бэнд «Дзеці Падзямелля»[10][11];
- 2015—2016 гады — Нью-Ёркскі маладзёжны аркестр YPHIL-International Youth Philharmonic Orchestra. На праслухоўванні ў склад аркестра прымалі ўдзел больш за 1000 музыкаў з больш за 70 краін[12][13]. Выступы на сцэнах канцэртных залаў Symphony Space , «Дэвід-Гэфен-хол» і «Карнэгі-хол»[2];
- 2014—2019 гады — I, Culture Orchestra[14][15][16][17]. Аркестр створаны ў 2011 годзе Інстытутам Адама Міцкевіча (польск.: Adam Mickiewicz Institute) пры Міністэрстве культуры і нацыянальнай спадчыны Польшчы, складаецца з маладых музыкаў Польшчы і краін Усходняга партнёрства. Місія калектыву — падтрыманне пазітыўных змен у культурным і сацыяльным развіцці краін Усходняй Еўропы і Паўднёвага Каўказа, прадстаўляць мерапрыемствы найвышэйшай музычнай якасці[18][19]. У Беларусі першы канцэрт I, Culture Orchestra адбыўся 27 жніўня 2012 года ў Беларускай дзяржаўнай філармоніі, дырыжыраваў 19-гадовы Ільіч Рывас (Венесуэла). У праграме — Чайкоўскі, Шыманоўскі, Дворжак, Рэспігі. З таго часу аркестр паспеў выступіць на прэстыжнейшых канцэртных пляцоўках Еўропы і свету — Эдынбургскім міжнародным фестывалі[20], у Берлінскай філармоніі , у Каралеўскай фестывальнай зале ў Лондане і іншых[5][7];
- 2018—2019 гады — запрошаны трубач аркестры Pan-European Philharmonia[21][22][23];
- 2019 год — польскі аркестр Santander Orchestra[24];
- 2019—2022 гады — запрошаны трубач аркестры Польскай Каралеўскай оперы ;
- 2021—2022 гады — запрошаны трубач аркестры Вармінска-Мазурскай філармоніі імя Фелікса Нававейскага ў Ольштыне;
- 2021—2022 гады — канцэртмайстар групы труб у Гожаўскай філармоніі (Гожаў Велькапольскі, Польшча)[25][26];
- з 2022 года — галоўны запрошаны трубач Гожаўскай філармоніі;
- з 2023 года — запрошаны трубач аркестра Варшаўскай Камернай Оперы[27];
- з 2017 года — аркестр Sinfonia Iuventus, артыст аркестра (труба); з 1 чэрвеня 2022 года — кіраўнік групы духавых інструментаў.[28]
У складзе International Youth Philharmonic Orchestra
Першы выступ аркестра адбыўся ў верасні 2015 года ў зале Peter Norton «Symphony Space», другое — на Геральд-скверы, трэцяе — на Таймс-скверы, чацвёртае — у холе Нью-Ёркскага ўніверсітэта «NYU’s Skirball Hall», пятае — Bowling Green Park, Уол-стрыт, шостае — у Нью-Ёркскай публічнай бібліятэцы на Пятай авеню, самае апошняе — у Карнэгі-холе. Усе рэпетыцыі і канцэрты былі зняты, выпушчаны і распаўсюджаны як дакументальны фільм для тых, хто не змог быць на гэтых мерапрыемствах[13][29][30].
У складзе I, Culture Orchestra
25 кастрычніка 2018 года адбылося выступленне аркестра ў Цэнтры прыгожых мастацтваў у Бруселі. У праграме — Стравінскі, Пендарэцкі, Шыманоўскі[31]. 29 кастрычніка 2018 года — выступленне з такой жа праграмай у Вялікай зале Эльбскай філармоніі, Германія[32].
У складзе Santander Orchestra
У красавіку 2019 года ў складзе аркестра выступіў у «Незвычайным канцэрце»[33], на фестывалі «Бетховен і рамантычная песня»[34] і на XXIII Велікодным фестывалі імя Людвіга ван Бетховена[35].
У складзе аркестра Sinfonia Iuventus
У кастрычніку 2017 года ўдзельнічаў у прэм’ерным выкананні рэлігійнай оперы «Маісей» Антона Рубінштэйна ў Нацыянальнай філармоніі ў Варшаве. Мерапрыемства арганізавана пад патранатам Міністэрства культуры і нацыянальнай спадчыны Польшчы і польскай нацыянальнай камісіі па справах ЮНЕСКА[36].
20 лютага 2021 года адбыўся анлайн-канцэрт «The Rite of Brass» з удзелам аркестра Sinfonia Iuventus і запрошаных салістаў. Трансляцыя адбывалася з вялікай залы Канцэртнай студыі польскага радыё імя Вітольда Лютаслаўскага на канале YouTube і на сайце аркестра Sinfonia Iuventus. Канцэрт працягваўся больш за гадзіну, рэпертуар складаўся амаль выключна з твораў для медных духавых інструментаў. Фінальным нумарам праграмы стаў «Канцэрт для трубы з аркестрам» Аляксандра Аруцюняна ў выкананні Міхаіла Бачылы[37][38].
14 мая 2023 года ў вялікай актавай зале Каралеўскага замка ў Варшаве адбыўся канцэрт «Гендэль. Канцэрт барокавай музыкі» з удзелам аркестра Sinfonia Iuventus пад кіраўніцтвам брытанскага дырыжора Пола Эсвуда і салісткі Філіпы Хідэ[39] (сапрана). Канцэрт працягваўся больш двух гадзін, рэпертуар складаўся выключна з твораў Георга Фрыдрыха Гендэля. Фінальным нумарам праграмы была арыя з яго араторыі «Самсон » «Let The Bright Seraphim» для сапрана і трубы з камерным аркестрам у выкананні Філіпы Хідэ, Міхаіла Бачылы і аркестра Sinfonia Iuventus[40][41].
Узнагароды і прэміі
- 2008 — V Маладзёжныя Дэльфійскія гульні дзяржаў-удзельніц СНД; намінацыя «Труба, сольнае выкананне, узроставая група 10-16 гадоў», сярэбраны медаль (II месца)[42].[43]
- 2015 — VI Міжнародны конкурс маладых выканаўцаў на духавых і ўдарных інструментах «Сурми Буковини», Чарнаўцы, Украіна; старэйшая ўзроставая група, I месца[44].
- 2016 — лаўрэат міжнароднага конкурсу маладых трубачоў у рамах Стыпендыяльнай праграмы «Yamaha Music Gulf FZE Scholarship Program», фінал якой праходзіў 14 лютага ў Дубаі, ААЭ. У конкурсе прынялі ўдзел 39 студэнтаў вышэйшых музычных устаноў адукацыі з Афрыкі, Блізкага Усходу і краін СНД. У фінале Міхаіл Бачыла выканаў «Санаціну для трубы» французскага кампазітара Жана Франсэ ; узнагароджаны стыпендыяй у памеры 1000 долараў (агулам стыпендыю атрымалі 5 з 16 фіналістаў)[45][46].
- 2016 — лаўрэат Міжнароднага фестывалю кавер-бэндаў у складзе кавер-бэнда «Дзеці Падзямелля» ў Ваўкавыску, Беларусь[10][47].
- 2016 — VII Міжнародны конкурс імя Мірона Старавецкага, Цярнопаль, Украіна. Намінацыя «Трубачы-прафесіяналы ва ўзросце да 30 гадоў», III прэмія[48][49].
- 2023 — X Агульнапольскі фестываль трубачоў у Калішы, Польшча. Конкурс ў намінацыі «Аркестровага выканаўства», адкрытая катэгорыя, III месца.[50]
- 2024 — лаўрэат стыпендыяльнай праграмы для маладых дзеячаў мастацтва з выдатнымі дасягненні «Młoda Polska 2024», адбор у яе праходзіў з лістапада 2023 да красавіка 2024 года ў Нацыянальным цэнтры культуры ў Варшаве. У праграме бралі ўдзел 886 дзеячоў мастацтва ў такіх намінацыях як фільм, музыка, літаратур, у т. л. журналістскі рэпартаж, выяўлечнае мастацтва, у т. л. фатаграфія, танец і тэатр. У намінацыі музыка з 65 кандыдатаў заяўка Міхаіла Бачылы заняла першае месца; узнагароджаны стыпендыяй Міністэрства культуры і нацыянальнай спадчыны Польшчы памерам 55 000 злотых, агулам стыпендыі атрымалі 107 дзеячаў мастасцтва з 886 кандыдатаў.[51]
Дыскаграфія
Браў удзел у запісе наступных выдадзеных кампакт-дыскаў:
- 2014 — I, Culture Orchestra. Shostakovich • Karayev. Conductor — Kirill Karabits [52][53]
- 2016 — Final Audition Yamaha Music Gulf FZE 2015/2016.
- 2017 — Zarębski: Danses Galiciennes, Lutosławski. I, Culture Orchestra & Andrey Boreyko[54][55][56]
- 2018 — Polska Orkiestra Sinfonia Iuventus, Chór Filharmonii Narodowej. Anton Rubinstein: Moses.[57]
- 2019 — The Jerzy Semkow Polish Sinfonia Iuventus Orchestra. Polish Overtures and Concertos of the 20-th and 21-th centuries.[58][59]
- 2019 — The Jerzy Semkow Polish Sinfonia Iuventus Orchestra. Krzysztof Penderecki: Concerto’s vol. 8.[60][61][62][63]
- 2019 — The Jerzy Semkow Polish Sinfonia Iuventus Orchestra. Krzysztof Penderecki: Concerto’s vol. 9.[64][65][66]
- 2022 — Sinfonia Iuventus. Richard Williams[67] — Frozen: Trailer, Main Theme, Credits. Conductor — Marek Wroniszewski (аудыёзапісы да відэа гульні — House Flipper 2)[68]
Сям’я
- Маці — Таццяна Паўлаўна Роман (нар. 7.01.1961), выкладчыца па класе домры ў Дзіцячай музычнай школе мастацтваў № 8 імя Р. Р. Шырмы горада Мінска[69]. Скончыла Мінскае музычнае вучылішча імя Глінкі (домра) і Беларускую дзяржаўную кансерваторыю, працавала артыстам вышэйшай катэгорыі ў Інструментальным ансамблі Белтэлерадыёкампаніі.
- Дзед — Павел Іванавіч Роман (1932—2006), трамбаніст духавога аркестра штаба Узброеных сіл Рэспублікі Беларусь.