Чэмпіянат Еўропы па гандболе сярод мужчын 1994 года — першае еўрапейскае спаборніцтва гандбольных зборных, якое праходзіла ў Партугаліі з 3 па 12 чэрвеня 1994 года. Чэмпіёнам стала зборная Швецыі, другое і трэцяе месцы занялі зборныя Расіі і Харватыі адпаведна.
Адбор на чэмпіянат адбываўся з 27 лютага 1993 года па 10 сакавіка 1994 года. Зборная Партугаліі як арганізатар чэмпіянату была вызвалена ад адборачных гульняў. Астатнія 34 каманды былі падзелены на 7 груп, унутры якіх правялі двухкругавыя турніры.
У фінальную частку прайшлі наймацнейшыя каманды з кожнай групы і найлепшая з каманд, што занялі 2-е месца. Яшчэ 3 ўдзельнікі фінальнага турніру вызначыліся ў стыкавых матчах між шасцю астатнімі зборнымі, якія занялі 2-я месцы ў групах.
У межах адбору на чэмпіянат свае першыя афіцыйныя матчы правялі зборныя Беларусі, Грузіі, Латвіі, Літвы, Малдовы, Славакіі, Славеніі, Украіны, Харватыі і Эстоніі.