Us der alemannische Wikipedia, der freie Dialäkt-Enzyklopedy
D Verbräitig vo de Juude in Middel- und Ostöiropa, grösstedäils Aschkenasim, 1881
Aschkenasim (hebräisch אַשְׁכֲּנָזִים, Blural vo Aschkenasi, oder Jehudi Aschkenas (יְהוּדֵי אַשְׁכֲּנָז), dütsch aschkenasischi Juude, wörtlig „dütschi Juude“) isch d Bezäichnig für die Juude, wo d Vorfaare von ene im Middelalter in Öiropa grösstedäils nördlig vo de Alpe, im Rhiiland, im Norde vo Frankriich und vo Italie, z Ängland und spööter in Middel- und Ostöiropa gläbt häi. Die aschkenasische Juude häi gmäinsaami religiöösi Dradizioone, wo sä vo de sefardische Juude underschäide, und früener e gmäinsaami Sprooch ghaa, s Jiddische. Vom 16. Joorhundert aa het sich s aschkenasische Juudedum in e dütschs und e ostöiropäischs Juudedum däilt.
Dr Naame Aschkenasim chunnt vo dr mittelalterlige Bezäichnig für Dütschland, Aschkenas (hebräisch אַשְׁכֲּנָז), wo in dr hebräische Bible (Genesis 10,3 und 1 Chronik 1,6) dr Naame vom e Soon vom Gomer gsi isch, eme Änkel vom Japhet und Uränkel vom Noach und wo s Volk von em in dr Nööchi vom Bärg Ararat verortet worden isch.[1]
D Zaal vo de aschkenasische Juuden im 11. Joorhundert wird uf 20'000 gschetzt,[2] Am Aafang vom 21. Joorhundert het s öbbe 8.5 Millioone Aschkenasim gee und si häi d Meerhäit vo de Juude uf dr ganze Wält usgmacht.[3]
Fritz Reuter: Warmaisa. 1000 Jahre Juden in Worms. 2. Uflaag. Jüdischer Verlag bei Athenäum, Frankfurt am Main 1987, ISBN 3-610-00405-3. Uszüüg drus onläin
