Самюэль Это’о

Физикалық тұрғыда да, техникалық сауаттылығымен де ерекше көрінген камерундық футболшы Еуропаға 16 жасында келген болатын. Сол кезде оған қызығушылық білдірген мадридтік «Реал» келісім-шарт ұсынады. 1997/98 маусымында испандық екінші дивизион клубы «Леганьеске» жалға берілген Самуэль бір жылдан соң Мадридке қайтып келеді.

Франция-98

Он жеті жастан сәл ғана асқан Это’О Камерун құрамасымен бірге Францияның жасыл алаңдарында өткен 1998 жылғы Әлем Чемпионатына қатысып, сол турнирде өнер көрсеткен ең жас футболшы атанды. Италия құрамасына қарсы топтық кезеңнің кездесуінде ойыншы алмасудан кейін алаңға шығып, мундиальде ойнау құрметіне тұңғыш рет ие болады. Тез арада ол өзінің туған елінің құрамасының негізгі құрамында беки түседі де, 2000 жылы Африка Кубогының жеңімпазы атанады. Одан бөлек, Самуэль сол жылы Сидней Олимпиялық ойындарының алтын медальдарын ұтып алады. Екі жыл өтісімен Камерун Африкадағы жетістіктерін қайталайды.

«Корольдік клубтан» «Мальоркаға»

Құрамалар деңгейінде камерундық шабуылшының сөзсіз жетістіктеріне қарама-қайшы, оның «Корольдік клубтағы» халі мәз емес еді. Африкалық футболшы «Реал» сапында Чемпиондар Лигасының үш ойнында ғана алаңға шығып, ақыры 1999 жылы «Мальоркаға» ауысады. Болеар аралдары клубы Самуэльдің өнеріне тәнті болғаны соншалық, бастапқыда жалға алынған ойыншының иелену құқықтарының жартысын «Реалдан» сатып алады. «Мальорка» бұл әріптестіктің бар пайдасын бірден көре бастады. Аралдықтардың құрамында болған уақытында камерундік 133 кездесу өткізіп, 54 доп соқты. Бұл клубтың үздік көрсеткішін танытады. Ал, «Мальорка» испан примерасындағы азулы қарсыластарына тегеурінді қарсылас атанып, 2003 Король Кубогының иесі атанады. Кубоктың ақтық кездесуінде Самуэль Это’О «Рекреативо» қақпасына үш бірдей доп соғып хет-трикке қол жеткізеді.

"Барселонада"

2004 жылы маусым қорытындылары бойынша Африканың үздік футболшысы атанған камерундық шабуылшы сол жылдың 12 тамызында 24 млн. еуроға каталондық «Барселонаға» ауысады. Осы шақтан Это’Оның әлемдік алдынғы қатарлы ойыншылардың тізімінен көрінуі бастау алады. 29 тамызда Сантандердің «Расингіне» қарсы ойында тұңғыш рет «Барселона» жейдесін киген Самуэль клубтағы бірінші камерундық болды. Алғашқы маусымында-ақ 25 гол межесін бағындырған ойыншы сол нәтижелілігін төмендеткен жоқ. Ал, 50 доп деңгейі оған 67-ақ кездесуде бағынды. Мұндай тамаша өнер көрсетулер елеусіз қалуы мүмкін емес еді. Оның қатарынан екі мәрте 2005, 2006 жылдары Африканың үздігі мен 2005 жылы ФИФА нұсқасы бойынша әлемнің үшінші футболшысы болып атануы лайықты баға есебінде болды. 2005/06 маусымда 26 голымен Ла Лиганың үздік сұрмергені ретінде Самуэль Пичичи Жүлдесінің жеңімпазы құрметіне ие болады. Ал, «Стад де Франста» Чемпиондар Лигасының финалындағы оның лондондық «Арсеналға» соққан добы есепті теңестіріп, командасына жеңіске деген сенімін ұялатады.

«Интерде»

Бүгінде каталондықтар сапында 200 ойын ойнап, 130 гол соғып, «Барселона»мен барлық асуларды бағындырған Самуэль Это’O миландық «Интерде» 2009/10 маусымда тағы бір треблге қол жеткізді: Италия кубогын, Италия чемпионатын және УЕФА Чемпиондар Лигасын ұтып алды.

Кейінгі жылдарда

Кейін тағы "Анжи", "Сампдория", "Челси", "Эвертон", "Антальяспор" клубтарында доп теуіп, 2018 жылы қаңтарда "Коньянспор" клубына ауысты.

Командалық

«Мальорка»

• Испания кубогы (1): 2003

«Барселона»

• Испания чемпионы (3): 2004/05, 2005/06, 2008/09
• Испания кубогы (1): 2008/09
• Испания суперкубогы (2): 2005, 2006
• Чемпиондар Лигасы (2): 2005/06, 2008/09

«Интернационале»

• Италия чемпионы (1): 2009/10
• Италия кубогы (2): 2009/10, 2010/11
• Италия суперкубогы (1): 2010
• Чемпиондар Лигасы (1): 2009/10
• Клубтар әлем чемпионаты (1): 2010

Камерун

• Африка чемпионы (2): 2000, 2002
• Олимпиада чемпионы (1): 2000

Жеке

• Африканың үздік жас ойыншысы (1): 2000
• Африканың жыл футболшысы (4): 2003, 2004, 2005, 2010
• Испания чемпионатының сұрмергені (1): 2005/06 (26 гол)
• Африка ұлттары кубогының үздік мергені (2): 2006 (5 гол), 2008 (5 гол)
• «Golden Foot»: 2015