WorldCat
WorldCat o l'é 'n catàlogo ùnico ch'o l'arechéugge e coleçioìn de 15.637 bibliotêche in 107 pàixi[1] che fàn pàrte da coperatîva globâle de l'OCLC[2]. O l'é gestîo da l'OCLC Inc. E bibliotêche aderénti inàndian tùtte insémme a bànca dæti de WorldCat, a quæ a l'é a ciù grànde bànca dæti bibliogràfica a-o móndo[3]. A bànca dæti a l'inclùdde âtre vivàgne de informaçioìn óltre che e coleçioìn de bibliotêche parteçipànti[4]. L'OCLC o l'à mìsso o WorldCat disponìbile de bàdda pe-e bibliotêche, ma o catàlogo o l'é a bâze de servìççi OCLC in abonaménto ascì (cómme a condivixón de vivàgne e a gestión de coleçioìn). WorldCat o l'é dêuviòu da-i bibliotecâi pi-â catalogaçión e a riçèrca, óltre che da-o pùblico in generâle.
ZE | Quésta pàgina a l'é scrîta in léngoa zenéize A Grafîa adeuviâ a l'é quélla de l'Académia Ligùstica do Brénno |
Stöia
L'OCLC o l'é stæto creòu into 1967 sótt'a-a gestión do Fred Kilgour[5]. Into mæximo ànno, l'OCLC o l'à incomensòu a svilupâ a tecnologîa do catàlogo ùnico ch'a s'é sucesivaménte evolûa in WorldCat; o prìmmo eleménto into catàlogo o l'é stæto azónto into 1971[5][6].
Into 2003, l'OCLC o l'à iniçiòu o progràmma de prêuva "Open WorldCat", creàndo de fórme abréviæ a partî da 'n sotoinsémme de WorldCat disponìbile pe-i scîti d'Internétte e i rivenditoî de lìbbri, de mòddo da aomentâ l'acescibilitæ de coleçioìn de bibliotêche aderénti a-o sò progràmma[7][8].
Inte l'òtôbre do 2005, o staff técnico de l'OCLC o l'à iniçiòu 'n progètto wiki, WikiD, permetténdo a-i letoî de azónze di coménti e de informaçioìn in cànpi struturæ, lighæ a ògni eleménto WorldCat[9]. WikiD o l'é stæto sucesivaménte eliminòu, scibén che WorldCat o l'à pöi dêuviòu i contegnûi creæ da-i uténti in di âtri mòddi[10][11].
Into 2006 o l'é diventòu poscìbile pe tùtti çercâ in WorldCat diretaménte e de bàdda co-o sò scîto d'Internétte[12] e no sôlo pe mêzo de l'interfàccia FirstSearch, a pagaménto, a sôla a dispoxiçión in sciâ Ræ pe-e bibliotêche abonæ inti ànni prìmma[13]. I fìltri pe-e riçèrche ciù sofistichæ in sce WorldCat són a ògni mòddo restæ disponìbili gràçie a l'interfàccia FirstSearch[12].
Into 2007, o WorldCat Identities o l'à incomensòu a fornî de pàgine pe 20 milioìn de eleménti, i quæ són di metadæti in sce di nómmi; prinçipalménte di outoî e de persónn-e che són sogètti de publicaçioìn[14].
Into 2017, l'API WorldCat Search de l'OCLC a l'é stæta integrâ inte l'instruménto de çitaçión do VisualEditor de Wikipedia, permetténdo a-i editoî de Wikipedia de çitâ façilménte i dæti in sce WorldCat. A partî da-o 2017, OCLC e Internet Archive àn colaboròu pe rénde i dæti di lìbbri digitalizæ inte l'Internet Archive disponìbili in WorldCat[15][16].
A-o frevâ 2021, WorldCat o contêgne ciù de 512 milioìn de eleménti bibliogràfichi in 483 léngoe, che raprezéntan ciù de 3 milioìn de vivàgne bibliotecâie fìxiche e digitâli[2], e a série de dæti de persónn-e in WorldCat a l'inclùdde ciù de 100 milioìn de eleménti[17].
Architetûa do scistêma
I catàloghi locâli de bibliotêche che són ménbri de l'OCLC són sincronizæ co-a bànca dæti de WorldCat[18]. WorldCat o consénte a-e instituçioìn parteçipànti de azónze colegaménti dirètti da WorldCat a-e vôxe do pròpio catàlogo locâle pe artìcoli particolæ, fæto ch'o permétte a l'uténte de clicâ in sciô catàlogo locâle pe determinâ rapidaménte o stâto in ténpo reâ de 'n artìcolo (prezénpio se o l'é seleçionòu ò mêno)[19].
Inte 'na perçentoâle picìnn-a de bibliotêche[20] o catàlogo locâle o l'é ascì gestîo da l'OCLC, dêuviàndo 'n scistêma bibliotecâio integròu ciamòu WorldCat Discovery e WorldShare Management Services[21].
I contribûti de bibliotêche a WorldCat són fornîi pe mêzo do progràmma informàtico Connexion[22], introdûto into 2001; o sò predecesô, OCLC Passport, o l'é stæto gradoalménte eliminòu into màzzo do 2005[23]. I bibliotecâi che són aprêuvo a catalogâ di eleménti pêuan dêuviâ WorldShare Record Manager[24] ò WorldCat Metadata API[25] ascì, òtegnìndo di rizultâti scìmili[26].
Nòtte
Bibliografîa
- (EN) What the OCLC online union catalog means to me: a collection of essays, Dublin, Ohio, OCLC, 1997.
- (EN) Elizabeth McKenzie, OCLC changes its rules for use of records in WorldCat: library community pushback through blogs and cultures of resistance, Boston, Suffolk University Law School, Zenâ 2012.
- (EN) Cathy Blackman, Erica Rae Moore, Michele Seikel e Mandi Smith, WorldCat and SkyRiver: a comparison of record quantity and fullness, in Library Resources & Technical Services, vol. 58, n. 3, Lùggio 2014, pp. 178-186.
- (EN) Marshall Breeding, Library services platforms: a maturing genre of products, in Library Technology Reports, vol. 51, n. 4, Màzzo 2015, pp. 1-38.
- (EN) Joseph R. Matthews, An environmental scan of OCLC alternatives: a management perspective, in Public Library Quarterly, vol. 35, n. 3, Lùggio 2016, pp. 175-187.
- (EN) Kristen Wilson, The knowledge base at the center of the universe (abstract), in Library Technology Reports, vol. 52, n. 6, Agósto 2016, pp. 1-35.
Âtri progètti
- Wikimedia Commons a contêgne di files in sce WorldCat
Colegaménti estèrni
- (EN) Scîto ofiçiâ, in sce worldcat.org. URL consultòu o 7 novénbre 2021.
- (EN) WorldCat, in sce oclc.org. URL consultòu o 7 novénbre 2021.
- (EN) What is WorldCat?, in sce worldcat.org. URL consultòu o 7 novénbre 2021.
- (EN) Bibliographic Formats and Standards, in sce oclc.org. URL consultòu o 7 novénbre 2021.
- (EN) WorldCat Identities, in sce worldcat.org. URL consultòu o 7 novénbre 2021.
- (EN) WorldCat data licensing (PDF), in sce oclc.org. URL consultòu o 7 novénbre 2021.
- (EN) Data licenses & attribution, in sce oclc.org. URL consultòu o 7 novénbre 2021.
Contròllo de outoritæ | VIAF (EN) 176058852 · LCCN (EN) no2006000525 · WorldCat Identities (EN) no2006-000525 |
---|