Diabetes melitus
| Artikel ko maagiah informasi dasa tantang topik kasihatan. Informasi dalam artikel ko buliah digunoan anyo untuak panjalehan ilmiah, bukan untuak diagnosis diri dan indak dapek manggantian diagnosis medis. Paratian: Informasi dalam artikel ko bukanlah resep atau nasihaik medis. Wikipedia bukan pangganti dotor. Kok Sanak paralu bantuan atau ka barubek bakonsultasilah jo tanago kasihatan profesional. |
Diabetes melitus, DM (Yunani, diabaínein, tabuak atau pincuran aia) (bahaso Latin: mellitus, raso manih) nan juo tanamo di Indonesia jo istilah panyakik kanciang manih atau panyakik gulo adolah kalainan metabolik nan dicirikan jo gejala tinggi gulo darah jangko lamo (hiperglikemia kronis) sarato gangguan metabolisme karbohidrat, lamak, jo protein, sabagai akibaik dari kurangnyo insulin nan dihasiakan tubuah (sekresi insulin), kaindakmampuan tubuah untuak mamanfaatkan insulin (insulin resistance), atau kaduonyo.[10][11] Glukosa (gulo darah) dalam tubuah dikandalikan dek babarapo hormon. Hormon insulin nan dihasiakan organ pankreas bakarajo untuak maubah glukosa manjadi glikogen (bantuak dari cadangan energi) katiko kadar gulo darah tinggi. Sadangkan hormon glukagon nan dihasiakan otot bakarajo untuak memacah glikogen manjadi sumber energi tubuah katiko gulo darah randah.[12]
| Diabetes melitus | |
|---|---|
 | |
| Lingkaran biru adolah simbol diabetes sadunia.[1] | |
| Palafalan | |
| Spesialisasi | Endokrinologi |
| Gejala | Acok buang aia ketek, acok auih, acok lapa[2] |
| Komplikasi | Diabetik ketoasidosis, status hiperosmolar hiperglikemia, panyakik jantuang, stroke, gagal ginjal kronik, tukak kaki, gastroparesis[2][3][4] |
| Faktor risiko | Tipe 1: riwayaik kaluarga[5] Type 2: Obesitas, jarang baolahraga, katurunan[2][6] |
| Diagnosis | Gulo darah tinggi[2] |
| Parawatan | Diet sihaik, aktivitas fisik[2] |
| Pangubekan | Insulin, ubek antidiabetik co metformin[2][7][8] |
| Frekuensi | 425 juta (8.8%)[9] |
| Kamatian | 3,2–5,0 juta per taun[9] |
Kondisi gulo darah tinggi cando pado pandarito diabetes bisa indak taraso gejalanyo. Gejala nan biaso dialami pandarito diabetes antaro lain acok kajamban (poliuria), maraso auih taruih (polidipsi), sarato acok taraso lapa sainggo acok makan (polifagi).[11] Kok kondisi diabetes indak taratasi atau gulo darah tinggi indak takandalian, mangko dapek mamicu baragam panyakik atau komplikasi. Di antaro komplikasi nan dapek muncua antaronyo tukak pado kaki atau kaki mambusuak (ulkus diabetikum), alzheimer, stroke, panyakik jantuang, karusakan pado mato (retinopati diabetikum), bahkan inggo kamatian.[13][14][15][3]
Panagahan sarato panangan panyakik diabetes utamonyo dilakukan jo parubahan gaya iduik manjadi gaya iduik sihaik. Gaya iduik sihaik nan paralu dijago antaro lain dari pola makan sihaik, olahraga rutin, manjago barek badan, sarato manjauahi kabiasaan marokok. [11] Pado kondisi gulo darah tinggi nan indak taratasi dapek ditambah jo ubek, baiak ubek nan diminum atau ubek suntik.[2][16]
Pado taun 2017, dipakirokan alah 425 juta urang mandarito diabetes melitus nan sapangkek jo 8,8% populasi urang gadang (dewasa) di dunia, marato pado aki-laki jo padusi.[9] Tiok taun angko kajadian diabetes melitus maningkek taruih. Diabetes juo maningkekan risiko kamatian duo kali lipek. Pado taun 2017, dipakirokan ado 3,2 inggo 5 juta kamatian. Sacaro global anggaran kasihatan nan tapakai untuak diabetes mancapai 727 miliar USD pado 2017.[17] DI Indonesia pado taun 2013 tacataik ado sakitar 8,5 juta pandarito (paringkek kaampek di Asia jo katujuah di dunia) sarato dipakirokan pado taun 2020 dapek maningkek inggo 12 juta pandarito.[18][19]
Sijarah
Diabetes marupokan salah satu panyakik nan mulo-mulo dideskripsikan.[20] Pado manuskrip Mesir dari 1500 sabalun masehi manyabuikan "talampau banyak mangosongan urin".[21] Papirus Eber manyaratokan saran untuak minum pado kasus cando ko.[22] Kasus nan partamo kali dideskripsikan dipicayoi adolah diabetes tipe 1.[21] Tabib-tabib India pado maso nan kurang labiah samo maidentifikasi panyakik tu jo mangalompokkannyo sabagai madhumeha atau "kanciang madu", dek dapek mambuek samuik katuju.[21][22]
Istilah "diabetes" atau "tabuak" partamo kali dipakai pado 230 taun sabalun masehi dek urang Yunani nan banamo Apollonius dari Memphis.[21] Panyakik ko dianggap sarik tasuo salamo maso Kakaisaran Romawi, sarato Galen manyabuik baso inyo hanyo mancaliak duo kasus salamo karirnyo.[21] Hal iko dimungkinkan dek pola makan jo gaya iduik urang-urang saisuak, atau dek gejala klinis nan baru tampak pado stadium lanjuik panyakik. Galen manamokan panyakik ko sabagai "diare urin" (diarrhea urinosa).[23]
Tulisan mulo-mulo jo panjalehan langkok tantang diabetes adolah tulisan Aretaeus dari Cappadocia (pado abaik kaduo atau mulo abaik katigo masehi). Inyo manjalehan gejala jo pajalanan panyakik, nan inyo kaikkan jo kondisi lambok jo dingin. Inyo manjalehan pulo kamungkinan hubuangan jo panyakik lain, sarato inyo marundiangkan diagnosis bandiang dari gigitan ula, nan juo mamicu raso auih bakalabiahan. Tulisannyo ko indak dikataui di Barat sampai 1552, katiko edisi bahaso Latin partamo kali dipublikasikan di Venezia.[23]
Duo tipe diabetes taidentifikasi sabagai kondisi nan babeda partamo kali dek tabib India Sushruta jo Charaka pado taun 400--500. Wakatu itu kaduonyo maidentifikasi tipe nan takaik umua mudo jo tipe nan takaik kalabiahan barek badan. Istilah melitus atau "dari madu" atau "manih" ditambahan dek Briton John Rolle pado akhia taun 1700-an untuak mambedakan dari diabetes insipidus, nan samo-samo ditandoi jo acok kajamban. Pananganan panyakik nan efektif alun lai bakambang inggo mulo abaik ka-20, katiko urang Kanada, Frederick Banting jo Charles Herbert Best, maisolasi jo mamurnikan insulin pado 1921 jo 1922. Hal iko diikuti jo pakambangan insulin jangko panjang pado 1940.[21]
Klasifikasi
| DM Tipe 1 | DM Tipe 2 | |
|---|---|---|
| Awitan (onset) | Mandadak | Batahap |
| Umua | Umumnyo anak | Umumnyo urang gadang |
| Ukuran badan | Kuruih atau normal[25] | Often obese |
| Ketoasidosis | Acok | Jarang |
| Autoantibodi | Biasonyo ado | Indak ado |
| Insulin dalam tubuah | Randah atau indak ado | Normal, manurun atau maningkek |
| Genetik pado kamba identik | 50% | 90% |
| Prevalensi | ~10% | ~90% |
Diabetes marupokan panyakik nan disababkan produksi insulin dari pankreas nan indak kurang,[26] atau sel tubuh indak marespon sasuai jo insulin nan ado. Ado tigo tipe utamo dari diabetes melitus:[27]
- Diabetes tipe 1 marupokan diabetes dek pankreas nan gagal mahasiakan insulin nan cukuik dek ilangnyo sel beta pankreas.[27] Tipe ko sabalunnyo disabuik sabagai "diabetes melitus nan bagantuang ka insulin" (insulin-dependent diabetes mellitus; IDDM) atau "diabetes anak". Ilangnyo sel beta pankreas dek adonyo respon autoimun.[28] Panyabab respon autoimun ko masih alun dikataui.[27]
- Diabetes tipe 2 diawali jo resistensi insulin (indak talok jo insulin), kondisi katiko sel-sel tubuah gagal marespon insulin sacaro sasuai. Sabagai bagian dari pajalanan panyakik, insulin nan gagal diproduksi dapek bakambang.[29] Tipe ko sabalunnyo disabuik jo "diabetes melitus nan indak bagantuang ka insulin" (non insulin-dependent diabetes mellitus; NIDDM) atau "diabetes urang gadang". Panyabab paliang uum adolah kombinasi dari barek badan balabiah jo olahraga nan kurang.[27]
- Diabetes gestasional marupokan diabetes tipe katigo nan tajadi samaso padusi manganduang tanpa ado riwayaik diabetes sabalunnyo nan dapek maalami paningkekan glukosa.[27]
Ado pulo tipe kaampek nan disabuik "tipe lainnyo", kumpulan dari babarapo kasus parsaurangan.[30] Diabetes marupokan panyakik nan punyo tampilan nan baragam nan dapek tadiri dari kombinasi-kombinasi tipe.[31] Istilah "diabetes", tanpa kualifikasinyo, marujuak pado diabetes melitus.[32]
Tando jo gejala
|
Tando-tando klasik dari diabetes nan indak diubek adolah panurunan barek badan (nan indak tarencana), acok kajamban (poliuria), marasu auih taruih (podipsia), jo acok taraso lapa (polifagia).[33] Gejala-gejala dapek bakambang sangaik capek (babarapo pakan atau bulan sajo) pado diabetes tipe 1, samantaro pado diabetes tipe 2 biasonyo bakambang jauah labiah lambek dan mungkin tanpa ado gejala samo sakali atau indak jaleh. Gejala lain nan dapek sato pulo yaitu badan acok taraso panek.[34]
Ado tando-tando jo gejala-gejala lain nan dapek manunjuakan adonyo diabetes, walau hal iko indak baitu jaleh untuak diabetes. Di antaronyo adolah pandangan kabua, sakik kapalo, latiah, luko nan indak kunjuang cegak, inggo gata-gata. Tingginyo glukosa darah dalam wakatu lamo dapek mambuek panyerapan glukosa pado lensa mato, sainggo manyababkan parubahan bantuak, sarato tajamnyo pancaliakan. Dalam jangko lamo manjadi panyakik retinopati diabetikum (kalainan pado retina mato).[35]
Kadaruratan diabetes
Pandarito (biasonyo diabetes tipe 1) dapek juo maalami kondisi daruraik nan disabuik ketoasidosis diabetikum. Kondisi ko marupokan masalah metabolisme barupo paningkekan gulo darah (> 300 mg/dL) nan dicirikan jo raso mual, muntah, nyeri paruik, angok baun aseton (sarupo baun buah), angok nan dalam (Kussmaul breathing), inggo panurunan kasadaran.[36]
Kondisi lain nan samo daruraik jo bareknyo, tapi agak jarang yaitu Koma hiperosmolar nonketotik (hyperosmolar hyperglycemic state; HHS). Hal ko labiah umum pado diabetes tipe 2 nan utamonyo disababkan adonyo dehidrasi.[36]
Gulo darah randah dek ubek (treatment-related low blood sugar) bisa manjadi kondisi daruraik pado pandarito diabetes baiak tipe 1 atau 2. Kabanyakan kasus masih dalam kondisi nan cukuik ringan. Efek nan timbua di antaronyo badan taraso indak lamak (feeling of unease), bapaluah, gamataran, paningkekan nafsu makan, inggo kondisi labiah barek sarupo paniang, parubahan parilaku (manjadi parabo), kajang, panurunan kasadaran, sarato (nan jarang) karusakan utak permanan atau kamatian.[37][38] Angok capek jo bapaluah, dingin, kulik pucek marupokan ciri dari gulo darah randah juo tapi indak baitu spesifik.[39]
Komplikasi
Sadoalah bantuak diabetes maningkekan risiko komplikasi dalam jangko lamo. Hal iko bakambang sasudah 10-20 taun, tapi bisa sajo gejala partamo muncua pado urang nan alun tadiagnosis salamo wakatu tasabuik.
Komplikasi utamo jangko panjang adolah rusaknyo pambuluah darah. Pandarito diabetes duo kali labiah barisiko untuak mandapek panyakik jantuang pambuluah darah (kardiovaskular)[40] jo sakitar 75% kamatian akibaik diabetes dek panyakik jantuang koroner.[41] Panyakik pambuluah darah gadang lainnyo adolah stroke, jo panyakik pambuluah darah tapi (peripheral vascular disease).
Komplikasi pambuluah darah mikro dek diabetes tamasuak karusakan pado mato, ginjal, jo saraf. Karusakan pado mato tanamo jo retinopati diabetikum, nan disababkan dek karusakan pambuluah darah pado retina, jo dapek barakibaik pado kailangan pancaliakan sacaro baransua-ansua inggo akhianyo buto. Karusakan pado ginjal tanamo sabagai nefropati diabetikum, dapek mambuek paruik, ilang protein, jo kadang-kadang maalami ginjal kronis, nan bisa paralu hemodialisa (cuci darah) atau transplantasi ginjal (donor ginjal). Karusakan pado saraf tanamo sabagai neuropati diabetikum, nan biasonyo marupokan komplikasi utamo dari diabetes. Gejala-gejala dapek maliputi raso taba, kapocong, nyeri, jo sensasi nyeri lainnyo, nan bisa mambuek karusakan pado kulik. Ulkus diabetikum (tukak pado kaki contohnyo) buliahjadi muncua, jo sulik ditangani, kadang paralu amputasi. Sabagai tambahan, neuropati diabetikum proksimal (pado daerah pangka) dapek membuek nyeri pado otot inggo malamah.[42]
Ado ubuangan antaro bakurangnyo kognitif jo diabetes. Dibandiangkan urang nan indak diabetes, pandarito diabetes maalami panurunan fungsi kognitif 1,2 inggo 1,6 kali labiah gadang.[43]
Diagnosis
| Kondisi | glukosa 2 jam | gulo darah puaso (GDP) | HbA1c | |
|---|---|---|---|---|
| Unit | mmol/l(mg/dl) | mmol/l(mg/dl) | mmol/mol | DCCT % |
| Normal | <7.8 (<140) | <6.1 (<110) | <42 | <6.0 |
| Gulo darah puaso taganggu | <7.8 (<140) | ≥6.1(≥110) & <7.0(<126) | 42-46 | 6.0–6.4 |
| Toleransi glukosa taganggu | ≥7.8 (≥140) | <7.0 (<126) | 42-46 | 6.0–6.4 |
| Diabetes melitus | ≥11.1 (≥200) | ≥7.0 (≥126) | ≥48 | ≥6.5 |
Diabetes melitus ditandoi jo paningkekan kadar gulo darah nan barulang atau jangko lamo, sarato bisa ditagakan diagonosisnyo jo pamaresoan barikuik:[46]
- Gulo darah puaso (GDP) ≥ 7,0 mmol/l (126 mg/dl)
- Gulo darah plasma ≥ 11,1 mmol/l (200 mg/dl) duo jam sasudah konsumsi 75 gram glukosa oral malalui tes toleransi glukosa oral (TTGO)
- Gejala gulo darah tinggi jo kadar gulo darah sawakatu (GDS) ≥ 11,1 mmol/l (200 mg/dl)
- Hemoglobin glikat (HbA1C) ≥ 48 mmol/mol (≥ 6,5%).[47]
Pado urang nan dicurigai diabetes, tapi hasia pamaresoan gulo darahnyo maragukan, paralu dipastikan baliak jo maulang salah satu dari pamaresoan di ateh pado ari lain. Labiah disukoi untuak mamareso kadar gulo darah puaso dek kamudahan pangukurannyo. Manuruik definisi paliang baru, duo kali pamaresoan gulo darah puaso di ateg 7,0 mmol/l (126 mg/dl) alah bisa untuak managakan diagnosis diabetes.[48]
Manuruik WHO, urang jo kadar gulo darah puaso antaro 6,1 inggo 6,9 mmol/l (110 inggo 125 mg/dl) dianggap alah ado kondisi gulo darah puaso taganggu.[49] Urang jo glukosa plasma pado atau di ateh 7,8 mmol/l (140 mg/dl), tapi indak labiah dari 11,1 mmol/l (200 mg/dl), duo jam sasudah konsumsi glukosa oral 75 gram, mangko alah dapek dianggap dalam kondisi toleransi glukosa taganggu. Pado duo kondisi prediabetes ko, nan disabuik tarakhia labiah bakamungkinan untuak bakambang manjadi sapanuahnyo diabetes melitus, sarato gangguan kardiovaskular.[50] Asosiasi Diabetes Amerika (The American Diabetes Association; ADA) sajak 2003 mampagunokan rantang angko nan saketek babeda pado kondisi gulo darah puaso taganggu yaitu antaro 5,6 inggo 6,9 mmol/l (100 inggo 125 mg/dl).[51]
Hemoglobin glikat labiah rancak daripado gulo darah puaso untuak manantukan risiko panyakik kardiocaskular sarato kamatian dek panyabab apopun.[52]
Panagahan
Alun dikataui caro untuak managah diabetes tipe 1.[53] Diabetes tipe 2, 85–90% dari sadoalah kasus diaebtes, acok dapek ditagah atau ditunda jo mangandalian barek badan, marutinkan aktivitas fisik, sarato makan makanan sihaik.[53] Aktivitas fisik jo intensitas tinggi (labiah dari 90 minik per ari) dapek manurunkan risiko diabetes 28%.[54] Maubah pola makan manjadi labiah sihaik dapek pulo managah diabetes tamasuak maatua pola makan nan tinggi serat, mamiliah nan lamak baiak, sarupo lamak indak januah nan dapek tasuo pado kacang, minyak sayua, jo ikan.[55] Pambatasan gulo jo makan makanan randah dagiang sirah atau sumber lamak januah dapek pulo mambantu untuak managah diabetes.[55] Marokok juo dapek diubuangkan jo paningkekan risiko diabetes sarato komplikasinyo; sainggo baranti marokok manjadi langkah utamo dalam panagahan diabetes.[56]
Hubuangan antaro diabetes tipe 2 jo faktor risiko nan dapek diubah (barek badan balabiah, makanan indak sihaik, kurang aktivitas fisik, sarato marokok) samo di sadoalah tampek di dunia. Ado juo panilitian nan bakambang untuak mambuktian baso diabetes dapek disababkan dek tuntutan sosial, ekonomi, jo perubahan budayo: globalisasi, urbanisasi, populasi manuo, jo kabijakan lingkuangan sihaik umum.[57]
Pangalolaan
Diabetes marupokan panyakik kronis, panyakik nan balansuang lamo sainggo alun dapek ditantuan ubek pastiyo salain panaganan sasuai kondisi.[58] Pangalolaan kadar gulo darah sanormal mungkin, tanpa mambuek gulo darah randah manjadi target utamo dalam maubeknyo. Samakin barhasil katiko dipadukan jo pola iduik sihaik sarupo manjado makanan, olahraga rutin, mangandalian barek badan, sarato mamakai ubek nan sasuai (insulin pado diabetes tipe 1; ubek minum sarato mamungkinkan pulo ditambah insulin pado diabetes tipe 2).
Mandalami tantang panyakik sarato turuik aktif dalam satiok pangobatan dapek mambuek komplikasi jarang muncua pado urang-urang nan bisa mangalola gulo darah sacaro baiak.[59][60] Tujuan pangubatan adolah kadar HbA1C 6,5%.[61] Paratian juo dilabiahan pado masalah-masalah kasihatan lain nan dapek mampacapek efek buruak diabetes tamasuak marokok, kadar kolesterol dalam darah tinggi, obesitas, takanan darah tinggi, jo kurangnyo baolahraga.[61] Aleh kaki khusus sacaro laweh dipakai untuak mangurangi risiko tukak kaki.[62]
Ubek
Kandali glukosa
Ubek-ubek nan dipakai untuak maubek diabetes ditargetkan untuak manurunkan kadar gulo darah. Dalam konsensus alah dirumuskan baso katiko pandarito diabetes malakukan kandali arek pado gulo darahnyo supayo dalam rantang normal mangko risiko komplikasi akan manurun.[63][64]
Ado banyak kelas atau jinih ubek antidiabetik. Babarapo hanyo tasadio untuak diminum, sarupo metformin, samantaro nan lain ado nan hanyo tasadio dalam bantuak suntik sarupo GLP-1 agonis. Diabetes tipe 1 hanyo dapek diubek jo insulin, umumnyo jo kombinasi insulin regular jo NPH, atau insulin analog sintetik.
Metformin biasonyo direkomendasikan pado lini partamo ubek untuak diabetes tipe 2, alah ado pulo bukti baso dapek manurunkan risiko kamatian.[65] Ubek ko bakarajo jo manurunkan produksi glukosa hepar (hati).[66] Babarapo kalompok ubek lain, umumnyo lewaik muluik, dapek menurunkan kadar gulo darah pado DM tipe 2. Hal iko tamasuak agen nan dapek maningkekan pangaluaran insulin, manurunkan panyerapan gulo dari usus, agen nan mambuek tubuah labiah sensitif jo insulin, jo agen na maningkekan pangaluaran glukosa balabiah pado urin.[66] Katiko insulin dipakai pado diabetes tipe 2, racikan ubek nan bakarajo jangko lamo nan biasonyo ditambahkan mulo-mulo, samantaro malanjuikan ubek minum.[7]
Takanan darah
Sajak panyakik kardiovaskular manjadi komplikasi serius dari diabetes, babarapo panaliti alah marekomendasikan untuak manurunkan takanan darah dibawah 130/80 mmHg.[67] Di antaro ubek nan manurunkan takanan darah, paambek enzim konversi angiotensin (angiotensin converting enzyme inhibitors; ACEI) tabukti mamparancak kondisi urang jo diabetes samantaro ubek nan sarupo (paambek reseptor angiotensin atau angiotensin receptor blockers; ARB) indak tabukti.[68] Aspririn direkomendasikan pulo pado urang jo masalah kardiovaskular, namun pamakaian rutin indak tasuo mamparancak kaluaran diabetes nan indak bakomplikasi.[69]
Caliak pulo
- Hiperglikemia
- Diabetes insipidus
- Sindrom metabolik
Rujuakan
Pautan lua
| Klasifikasi | |
|---|---|
| Sumber lua |
|
| Cari tau tantang Diabetes mellitus di proyek-proyek Wikimedia lainnyo: | |
 | Definisi dan terjemahan dari Wiktionary |
 | Gambar dan media dari WikiCommons |
 | Berita dari Wikinews |
 | Kutipan dari Wikiquote |
 | Teks sumber dari Wikisource |
 | Buku dari Wikibooks |
- Diabetes melitus di Proyek Direktori Tabukak
- American Diabetes Association
- IDF Diabetes Atlas
- National Diabetes Education Program
- ADA's Standards of Medical Care in Diabetes 2019
- Polonsky KS (October 2012). "The past 200 years in diabetes". The New England Journal of Medicine. 367 (14): 1332–40. doi:10.1056/NEJMra1110560. PMID 23034021.
