Peru
Peru atau sacaro rasmi Republik Peru adolah sabuah nagara nan barado di Amerika Selatan bagian barat. Nagara ko babatehan jo Ekuador sarato Kolombia di utara, Brasil di timur, Bolivia di tenggara, pulo Lautan Pasifik di barat jo selatan.[1] Peru marupokan nagara megadiversitas mulai dari dataran kariang di wilayah pasisia Pasifik di barat, hinggo puncak Pagunuangan Andes nan mambantang dari utara hinggo tenggara nagara, sarato hutan hujan tropis lambah Amazon jo sungai Amazon di timur.[2]
Jo laweh 1.285.216 km2 (496.225 sq mi), Peru adolah nagara tagadang ka-19 di dunia, jo tagadang ka-3 di Amerika Selatan. Danau tagadang di Peru, Danau Titicaca nan barado diantaro Peru jo Bolivia di dataran tinggi Andes, marupokan danau tagadang di Amerika Selatan.[3]
Nagara Peru babantuak republik semi-presidensial kasatuan jo sistem multi partai.[4][5] Peru mampatahanan sistem demokrasi liberal badasarkan Konstitusi tahun 1993.[6][7] Sistem pamarentahannyo pulo manggabuangan antaro sistem politik Amerika Sarikat (konstitusi tatulih, Mahkamah Aguang nan otonom, jo sistem presidensial) jo Republik Rakyat Cino (kongres unikameral, sistem pardana mantari, jo kamenterian).[8] Presiden adolah kapalo nagara jo sakaligus kapalo pamarentahan. Kuaso legislatif dipacik dek Pamarentah jo Kongres. Kuaso yudikatif independen dari legislatif jo eksekutif.[1] Economist Intelligence Unit manilai Peru sabagai "rezim hibrida" pado tahun 2022.[9]
Peru mampunyoi panduduak sabanya 31,2 juta jiwa pado tahun 2017, manjadiannyo nagara tapadek ka-4 di Amerika Selatan.[10] Tingkek patumbuahan demografi Peru manurun dari 2,6% manjadi 1,6% antaro tahun 1950–2000; jo panduduak dipakiroan akan mancapai 42 juta pado tahun 2050.[11] Sadangkan pado hasia sensus tahun 1940, panduduak Peru hanyo 7 juta jiwa.[12] Diantaro panduduak tu, 60,2% urang Mestizo, 22,3% urang Quechua, 5,9% urang kulik putiah, 3.6% urang kulik hitam, 2,4% etnis lain, sarato 3,3% indak dikatahui.[13]
