Sarilangka
Sarilangka (/sriːˈlɑːŋkə,_ʔˈlæŋkə/, Sinhala: ශ්රී ලංකාව, śrī laṃkāva, bahaso Tamil: இலங்கை, ilaṅkai),[1] rasminyo Republik Sosialis Demokratik Sarilangka, adolah suatu nagara pulau nan talatak di pasisia tenggara India, di wilayah Asia Salatan; nan daulu disabuik pulo jo namo Sailan (/sɨˈlɒn, seɪ-, siː-/). Sarilangka babatehan malalui lauik jo India di barat lauik sato jo Maladewa di barat daya.
Sarilangka lah tacatek dalam sijarah labiah dari 3.000 taun.[2] Lokasi geografisnyo sarato palabuahan-palabuahannyo nan dalam manyabaukannyo jadi tampek nan strategis dan diparaluan bana, sajak jaman Jalan Suto[3] daulu inggo Parang Dunia II.[4] Sarilangka adolah nagara nan baragam, ado banyak agamo, etnis maupun bahaso.[5] Iko adolah tanah aia bangso Sinhala, Tamil Sarilangka, Moor, Tamil India, Burgher, Malayu, Kaffir, jo aborigin Vedda.[6] Sarilangka kayo jo warisan agamo Budha, dan tulisan-tulisan agamo Budha nan paliang tuo disusun di pulau iko.[7] Sijarah maso kini nagara ko diwarnai dek parang sipil tigo puluah taun, nan akianyo sacaro jaleh namun kontroversial[8] disalasaian malalui kakuatan militer pado taun 2009.[9]
Sarilangka adolah suatu republik dan nagara kasatuan nan diparentah malalui sistem presidensial. Ibukotanyo, Sri Jayawardenapura-Kotte, adolah daerah suburban dari kota tagadangnyo, iyolah Kolombo. Produk-produk pantiangnyo adolah teh, kopi, batu paramato, karambia, karet, jo kayu manih nan tumbuahan asali pulau ko.[10] Sarilangka tamusaua sabagai "Mutiara Lauik India" dek karano kaindahan alaminyo. Sarilangka lai disabuik pulo "aia mato India" dek karano bantuak jo lokasinyo, sarato jo julukan "nagara urang-urang nan tasanyum".[11] Pulau ko punyo rimbo tropis jo baragam lanskap nan tinggi kaanekaragaman hayatinyo.
Nagara ko lah lamo talibak dalam ubuangan internasional, antaro lain sabagai anggota pandiri SAARC jo anggota PBB, Nagara-nagara Commonwealth, G77, jo Garakan Non Blok. Iko adolah satu-satunyo nagara di Asia Selatan nan saaik ko masuak kategori 'tinggi' dalam Indeks Pambangunan Manusia.[12]
