लिलानाथ श्रेष्ठ

श्रेष्ठको जन्म सन् १९६२ जनवरी २८ मा सिराहाको चन्द्रलालपुरमा जीतबहादुर र धनमाया श्रेष्ठको घरमा भएको थियो। उनले कानून विषयमा स्नातक गरेका छन्। उनको दुई छोरा र एक छोरी छन्।^[३]

उनी सन् १९८० मा विद्यार्थीको रूपमा राजनीतिमा प्रवेश गरेका थिए। उनी नेकपा माले, अनेरास्ववियु विद्यार्थी सङ्गठनको सदस्य र पछि नेकपा (एमाले) युवा सङ्गठनको प्रमुख सदस्य बनेका थिए।^[३] उनी सिरहा जिल्लामा नेकपा एमालेको लामो अनुभव बोकेका स्थायी नेता हुन्।^[३] सन् २०१८ मा नेकपा एमाले र नेकपा (माओवादी केन्द्र)को एकतापछि उनलाई नवगठित नेपाल कम्युनिष्ट पार्टी (नेकपा)को सिरहाको ‘जिल्ला इन्चार्ज’ नियुक्त गरिएको थियो।^[४]

उनी वि.सं. २०७० को संविधानसभा निर्वाचनमा नेकपा एमालेबाट दोस्रो संविधानसभाको उम्मेदवार भए पनि नेकपा (माओवादी) पार्टीका अध्यक्ष प्रचण्डसँग पराजित भएका थिए।^[३]

वि.सं. २०७४ को प्रतिनिधिसभा निर्वाचनमा सिराहा ३ निर्वाचन क्षेत्रबाट उनी पहिलो पटक प्रतिनिधिसभामा निर्वाचित भएका थिए।^[५] उनी वाम गठबन्धनको नेकपा एमालेको प्रतिनिधित्व गर्दै सिराहा ३ निर्वाचन क्षेत्रबाट निर्वाचित भएका हुन्। उनले सो निर्वाचनमा २३,२७२ मत ल्याएका थिए भने उनको निकटतम प्रतिद्वन्द्वी अश्वेश्वर यादवले २१,२२० मत प्राप्त गरेका थिए।^[६]