中國朝代

以下係中國史學常見嘅詞彙：

• 「朝」：係指家族以君主制實施世襲統治嘅政權^[11]
• 「朝代」：係指家族以君主制實施世襲統治嘅政權同埋對應嘅歷史時期^[10]
• 「王朝」：嚴格意義上係指由稱號係王嘅君主所統治嘅世襲政權，但係通常係「朝」嘅另外一種叫法^[12]
• 「皇朝」：通常係指由稱號係皇帝嘅君主所統治嘅世襲政權^[12]

中國世襲統治嘅開始

禹係中國史上第一個王朝夏朝嘅建立者，所以佢通常畀史學家睇成係中國世襲統治嘅創立者^[13]。理論上，中國君主係中國政權嘅至高統治權力者，通過世襲傳承，形成「家天下」嘅局面^[14]。喺政治權力開明嘅時候就叫做「與士大夫共天下」。夏朝之前，君主一般以禪讓嘅形式移交統治權，所以稱為「公天下」^[14][15]。

朝代更替

朝代更替，又叫「改朝換代」，係中國史入便嘅一個特徵。有一啲史學家嘗試以君主嘅德行嚟解釋王朝嘅興衰，然而其他嘅史學家則將呢種歷史發展歸咎於有形嘅方面^[16]。其中，朝代循環係用嚟解釋中國朝代更迭嘅一個重要嘅理論^[16][17][18]。

中國嘅朝代更替主要係通過兩種方式完成：武力征服同埋篡位^[19]。通過武力征服嚟完成改朝換代嘅有遼朝同金朝嘅更替、元朝滅咗幾個王朝而統一中國。通過篡位進行王朝更迭嘅有東漢同曹魏嘅更替、南齊同梁朝嘅更替。篡位建國者通常通過「接受」前者嘅「禪讓」嚟取得佢統治嘅正統性^[20]。

雖然有一啲歷史年表為咗簡化內容而將朝代更迭顯示為平穩嘅政權過渡，但係事實一般都唔係噉嘅。新成立嘅王朝通常喺仲未推翻現有嘅王朝之前就已經建立咗^[21]。例如：公元1644年一般睇成係清朝取代咗明朝法統嘅嗰一年，不過清朝響公元1636年就已經立國，而喺公元1616年創立嘅後金係清朝嘅前身；明朝皇室則繼續佔有同埋統治緊中國嘅南方直到公元1662年為止，史稱「南明」；明朝嘅殘餘勢力東寧喺南明滅亡之後重繼續抵抗清朝，一直到公元1683年先至畀清朝擊敗^[22][23][24]。喺同樣嘅時期，其他勢力亦都喺明清易代嗰陣割據建國，好似李自成同張獻忠分別建立嘅大順同大西^[25][26][27]。清朝喺取代明朝之後用咗二十年左右先完成咗中國本部嘅統一。由呢個例子可見，朝代更替其實係複雜而且漫長嘅歷史發展。

同樣嘅，喺先前嘅隋唐易代亦都出現咗好多割據政權。呢個時期嘅勢力有李密嘅魏、薛舉嘅秦、高曇晟嘅齊、宇文化及嘅許、沈法興嘅梁、梁師都嘅梁、竇建德嘅夏、王世充嘅鄭、朱粲嘅楚、林士弘嘅楚、高開道嘅燕、輔公祏嘅宋等。最尾取代咗隋朝嘅唐朝一共用咗十年左右統一中國本部^[28]。

根據中國嘅修史傳統，新興嘅王朝會編修前朝嘅歷史，最後形成咗廿四部正史典籍，統稱「二十四史」^[29]。

中國世襲統治嘅終結

中國世襲君主制統治喺公元1912年辛亥革命成功之後結束，中華民國取代咗清朝嘅法統^[30][31]。民國成立之後，雖然亦都有幾個試圖恢復世襲君主制嘅事件發生，但係所有呢種類型嘅政權最尾都以失敗告終。所以，史學家一般以公元1912年2月12日宣統帝愛新覺羅溥儀退位作為中國世襲君主制統治嘅終結。中國世襲君主制統治一共存在咗大概四千年^[30]。

中國史上嘅分裂時期係多個王朝同時存在嘅時期，每一個王朝亦都有各自嘅朝廷同埋政治體系。中國嘅分裂時期有三國、十六國、南北朝、五代十國等。

喺分裂時期，王朝同王朝之間嘅關係通常關乎政權嘅正統性，而正統性則係嚟自天命^[32]。分裂時期嗰陣，漢族建立嘅王朝通常用華夷之辨嚟加強自身嘅正統性，同時拒絕接受其他民族創建嘅王朝係正統嘅政權。非漢族嘅王朝則自稱係中華文化同中國史嘅傳承者，亦都自稱係正統。喺中國傳統史學入面，「朝」同埋「國」嘅意思同用法係有唔同嘅：淨係正統嘅政權可以稱為「朝」，非正統嘅政權無論係唔係世襲都係叫做「國」^[33]。而家嘅史學家對於一啲王朝嘅正統地位重有異議。

以下係喺史上或者今日存有正統爭論嘅歷史時期：

• 三國^[34]
  • 曹魏、蜀漢、東吳都以正統自居，同時都唔接受另外一個政權嘅正統地位
  • 漢獻帝劉協禪讓於魏文帝曹丕，所以曹魏直接繼承咗東漢嘅法統
  • 西晉承認曹魏係三國時期嘅正統王朝，同埋宣稱繼承咗曹魏嘅法統
  • 唐朝將曹魏睇成三國時期嘅正統，而南宋理學家朱熹則主張蜀漢係正統^[35]
• 東晉、十六國^[36]
  • 東晉自稱係正統嘅政權
  • 有幾個十六國入便嘅王朝，例如漢趙、後趙、前秦等，亦都自稱係正統
• 南北朝^[37]
  • 全部喺呢個時期嘅王朝都自稱係正統；北朝叫南朝做「島夷」，而南朝叫北朝做「索虜」^[38][39]
• 五代十國^[40]
  • 後梁直接繼承咗唐朝嘅法統，所以自稱係正統^[40]
  • 後唐以光復唐朝為名立國，自稱係正統，同埋拒絕承認後梁嘅正統地位^[40]
  • 後晉承認後唐嘅正統地位^[40]
  • 南唐曾經畀一啲史學家睇成係呢個時期嘅正統王朝^[40]
  • 北宋以五代為正統；而家嘅史學家通常都保留住呢個觀點^[40][41]
• 遼朝、宋朝、金朝^[42]
  • 遼朝滅亡後晉之後自稱繼承咗後晉嘅法統，同埋自稱係正統^[43]
  • 北宋同南宋都自稱係正統
  • 金朝自稱係正統，同時都唔接受宋朝嘅正統地位
  • 元朝承認遼朝、宋朝、金朝、西遼嘅正統地位，所以編寫咗《遼史》、《宋史》、《金史》三部正史^[44][45][46]
• 明朝、北元^[47]
  • 明朝承認元朝係正統，但係宣稱佢已經繼承咗元朝嘅法統，所以北元唔係正統政權
  • 北元統治者保留住「大元」國號同其他嘅中國式名號一直到公元1388年為止；中國式嘅名號亦都喺嗰時之後多次出現
  • 蒙古族史學家Rashipunsug稱北元係元朝嘅直接延續；滅亡北元嘅清朝則得到咗北元嘅正統，所以明朝唔係正統王朝^[48]
• 清朝、南明^[49]
  • 清朝承認明朝係正統，但係宣稱佢已經繼承咗明朝嘅法統，所以南明唔係正統王朝
  • 南明自稱係正統一直到滅亡為止
  • 喺臺灣嘅明朝殘餘勢力東寧拒絕接受清朝嘅正統地位
  • 喺朝鮮半島嘅朝鮮王朝同越南嘅後黎朝都曾經承認過南明係正統^[50][51]

雖然喺分裂時期多個王朝並立嘅局面引起咗朝廷官員同史學家嘅正統之爭，北宋政治家歐陽修就話響分裂時期無一個王朝係正統^[52]。如果係噉睇，宋朝嘅正統地位係嚟自佢結束五代十國亂局嘅能力，唔係嚟自後周。同樣嘅，歐陽修認為三國、十六國同南北朝等分裂時期亦都無正統王朝^[52]。

因為中國歷史典籍通常係以單線繼承作為中國史入便正統嘅傳承規則，所以任何時期淨係可以得一個王朝係中華嘅正統^[41]。而家嘅歷史材料一般都遵守以下嘅正統繼承順序：夏朝 → 商朝 → 西周 → 東周 → 秦朝 → 西漢 → 東漢 → 曹魏 → 西晉 → 東晉 → 劉宋 → 南齊 → 梁朝 → 陳朝 → 隋朝 → 唐朝 → 後梁 → 後唐 → 後晉 → 後漢 → 後周 → 北宋 → 南宋 → 元朝 → 明朝 → 清朝^[41]。

中國史上有幾個王朝係出自同一個家族，但係因為國號唔同或者政權發生咗一啲根本性嘅變化等原因而畀後世嘅史學家以唔同嘅名嚟區分。另外，亦都有王朝自稱係某個先前王朝嘅後裔嚟得到或者加強佢統治嘅合法性同正統性。

以下係得到大部分史學家承認嘅同宗王朝：

• 西周、東周
  • 西周、東周都係由姬氏統治，夾埋一齊叫做「周朝」^[53]
  • 東周開國君主周平王姬宜臼係西周末代君主周幽王姬宮涅嘅仔
• 西漢、東漢、蜀漢、劉宋
  • 西漢、東漢、蜀漢、劉宋都係由劉氏統治，其中嘅西漢同東漢夾埋一齊叫做「漢朝」^[54]
  • 東漢開國皇帝漢光武帝劉秀係西漢首任皇帝漢高帝劉邦嘅九世孫，亦都係西漢第六位皇帝漢景帝劉啟嘅七世孫
  • 蜀漢第一位君主漢昭烈帝劉備都係漢景帝嘅後代
  • 《宋書》記錄劉宋開國皇帝宋武帝劉裕係漢高帝嘅細佬楚元王劉交嘅直系後裔
• 西晉、東晉
  • 西晉、東晉都係由司馬氏統治，夾埋一齊叫做「晉朝」^[55]
  • 東晉第一位君主晉元帝司馬睿係西晉奠基者晉宣帝司馬懿嘅息、琅邪武王司馬伷嘅孫、琅邪恭王司馬覲嘅仔
• 前燕、後燕、南燕
  • 前燕、後燕、南燕都係由慕容氏統治
  • 後燕首位君主燕成武帝慕容垂係前燕開國君主燕文明帝慕容皝嘅仔
  • 同樣嘅，南燕開國君主燕獻武帝慕容德都係燕文明帝嘅仔
• 西涼、唐朝
  • 西涼、唐朝都係由李氏統治
  • 唐朝開國皇帝唐高祖李淵係西涼第一位君主涼武昭王李暠嘅七世孫
• 北魏、東魏、西魏
  • 北魏、東魏、西魏都係由拓跋氏統治
  • 東魏嘅唯一一代君主魏孝靜帝元善見係北魏第七位皇帝魏孝文帝元宏嘅息
  • 西魏建立者魏文帝元寶炬係魏孝文帝嘅孫
• 南齊、梁朝
  • 南齊、梁朝都係由蕭氏統治
  • 梁朝開國皇帝梁武帝蕭衍嘅老竇梁文帝蕭順之係南齊第一代君主齊高帝蕭道成嘅堂弟
• 後漢、北漢
  • 後漢、北漢都係由劉氏統治
  • 北漢開國君主漢世祖劉旻係後漢開國皇帝漢高祖劉知遠嘅細佬
• 遼朝、西遼
  • 遼朝、西遼都係由耶律氏統治
  • 西遼第一代君主遼德宗耶律大石係遼朝開國皇帝遼太祖耶律阿保機嘅八世孫
• 北宋、南宋
  • 北宋、南宋都係由趙氏統治，夾埋一齊叫做「宋朝」^[56]
  • 南宋開國皇帝宋高宗趙構係北宋第八位君主宋徽宗趙佶嘅仔，亦都係北宋末代皇帝宋欽宗趙桓嘅細佬
• 元朝、北元
  • 元朝、北元都係由孛兒只斤氏統治
  • 元朝末代皇帝同北元第一位君主係同一個人，即係元惠宗孛兒只斤妥懽貼睦爾
• 明朝、南明
  • 明朝、南明都係由朱氏統治
  • 南明首位皇帝弘光帝朱由崧係明朝第十四位皇帝萬曆帝朱翊鈞嘅孫
• 後金、清朝
  • 後金、清朝都係由愛新覺羅氏統治
  • 後金最後一位大汗同清朝開國皇帝係同一個人，即係清太宗愛新覺羅皇太極

中原王朝

中原響黃河嘅中下游地區，係中華文明嘅發祥地^[57]。「中原王朝」係指定都喺中原嘅王朝，無論建立王朝嘅民族係邊個都好^[57]。

大一統王朝

「大一統王朝」係指完成咗中國本部統一嘅王朝，無論建立王朝嘅民族係邊個都好。「中國本部」，又叫「中國本土」，係漢族嘅傳統聚居地，同「中國」唔係一樣嘅概念。完成咗中國本部統一而且君主稱號係皇帝嘅王朝可以叫做「中華帝國」^[58]。

「大一統」呢個概念第一次出現喺公羊高嘅《公羊傳》入便^[59][60][61]。其他著名嘅人物好似孔子同孟子亦都喺佢哋嘅作品入便提到過呢個概念^[62][63]。

大部分嘅史學家將呢啲王朝歸類成大一統王朝：秦朝、西漢、新朝、東漢、西晉、隋朝、唐朝、武周、北宋、元朝、明朝、清朝^[64][65]。但係，北宋大一統王朝嘅地位唔係全部史學家都接受嘅，原因係燕雲十六州嘅一部分地區係遼朝嘅領土，而且河套嘅一部分地區係由西夏統治緊；所以，北宋從未完全控制到中國本部^[64][66]。

征服王朝、滲透王朝

「征服王朝」同埋「滲透王朝」都係非漢族建立嘅中國王朝，按佢哋入去中國本部統治嘅方式分別歸類成兩種類別^[67]。「征服王朝」係指嗰啲吸收漢文化嘅同時特登保留住自身文化嘅非漢族王朝，好似元朝、清朝等；「滲透王朝」係指嗰啲最後被徹底漢化咗嘅非漢族王朝，好似後秦、北魏等。呢兩個概念都係由美國史學家魏復古提出嘅，而且畀支持以多民族、多元文化嘅角度嚟分析中國史嘅史學家爭議^[68]。

國號

中國歷朝嘅開國君主喺立國之初都會確立政權嘅正式名稱，即係國號^[69][70]。喺王朝統治期間，國號係代表文明正統嘅政權嘅官方名稱，象徵新嘅政權取得咗舊統治者嘅合法地位。中國亦都有喺王朝統治期間國號出現變更嘅案例，例如：南漢原本定嘅國號係「越」，之後改成「漢」^[71]。

國號大概有五種源頭：

• 嚟自部族、部落聯盟嘅名稱^[72][73]
  • 例如：夏朝嘅名嚟自佢嘅統治部族夏后氏^[72]
• 嚟自創建者原本嘅封號、爵位^[72][73]
  • 例如：陳朝開國皇帝陳武帝陳霸先喺登基之前嘅「陳王」封號係「陳」國號嘅來由^[74]
• 嚟自相同地理位置嘅先前政權嘅名稱^[73][75]
  • 例如：前燕嘅地理位置大概同先秦嘅燕國一樣，所以國號叫做「燕」^[75]
• 嚟自有宗族關係（可考或者自稱）嘅先前政權嘅名稱^[73]
  • 例如：後周建立者周太祖郭威自稱係周朝宗室虢叔嘅後裔，所以國號叫做「周」^[76]
• 寓意吉祥或者有特別含義嘅字^[72][73]
  • 例如：《易經》入面嘅「大哉乾元」係元朝「大元」國號嘅來由^[77]

中國史上有幾個王朝嘅國號係有個「大」字。朱國楨嘅《湧幢小品》指出第一個帶有「大」字嘅國號係元朝嘅「大元」^[78][79]。不過，其他嘅歷史材料，如同脫脫編修嘅《遼史》同《金史》，記錄咗喺元朝之前亦都有王朝嘅國號入便有「大」字，好似遼朝嘅「大遼」同金朝嘅「大金」^[80][81]。

官員、百姓、朝貢國亦都會喺稱呼中國王朝嗰陣喺國號前面加埋個「大」字嚟表示尊崇，即使王朝嘅國號入便係無「大」字嘅^[79]。例如：《日本書紀》入便叫唐朝做「大唐」，但係唐朝嘅國號淨係得「唐」一個字。

國號嘅使用同埋佢嘅重要性亦都畀中國以外嘅其​​他中華文化圈政權接受。其中，響越南同朝鮮半島嘅王朝都有各自嘅國號。

喺史學上嘅稱呼

因為中國史上出現過好多重複使用嘅國號，史學家需要喺名稱前面加埋前綴嚟區分唔同嘅政權^[2][82][83]。一般會用到嘅前綴有：

• 方位用詞
  • 「北」：北齊、北元等
  • 「南」：南燕、南唐等
  • 「東」：東晉、東魏等
  • 「西」：西涼、西遼等
• 順序用詞
  • 「前」：前秦、前蜀等
  • 「後」：後趙、後漢等
• 統治家族嘅姓氏
  • 武周、馬楚等
• 其他類別嘅前綴
  • 蜀漢（「蜀」表示呢個王朝喺巴蜀嗰度）、胡夏（「胡」係呢個王朝嘅統治民族匈奴族嘅蔑稱）等

一個王朝可能有多個史學稱呼，但係一啲稱呼通常會得到更加廣泛嘅使用。例如：西漢又叫「前漢」、楊吳亦都可以叫做「南吳」^[84][85]。

如果一個王朝嘅統治發生咗一啲根本性嘅變化，史學家一般都會用唔同嘅名號嚟區分。例如：宋朝分北宋同南宋，以靖康之變做兩者嘅分界點，用嚟區分由宋太祖趙匡胤成立嘅「宋」同宋高宗趙構復興之後嘅「宋」^[86]。呢種情況之下，原本嘅政權已經覆滅咗，但係之後得到重建同埋聲稱延續先前政權嘅法統，所以史學界需要區分名號嚟反映政權變化嘅歷史事實。例外嘅有西秦同唐朝，佢哋嘅統治曾經畀後秦同武周分別打斷過^[87][88]。

中文材料通常唔會喺有前綴嘅王朝史學稱呼加埋個「朝」字。例如：北周因為有個「北」字前綴而好少被叫做「北周朝」；「北周」、「北周王朝」呢種叫法就相對嚟講比較常見。

呢個表淨係顯示通常喺歷史年表入便可以搵得到嘅主要嘅中國王朝。中國史上重有好多世襲君主制政權唔喺入便。

收錄標準

呢個表淨係顯示主要嘅中國王朝。不過，中國歷史地理學劃定嘅地理範圍入面重有好多唔喺呢個表入便嘅世襲君主制政權，例如^[195]：

• 封建制入便嘅世襲諸侯國（鄧國、霍國、楚國、義渠國等）；
• 羈縻制同土司制入便嘅世襲政權（播州土司、水東土司、永寧土司、贊拉土司等）；
• 統治地理範圍比較細嘅割據世襲政權（南越、吐谷渾、大理、東寧等）；
• 存在時間比較短嘅割據世襲政權（翟魏、後遼、陳漢、順朝等）；
• 曾經統治過同「中國」喺歷史上或者而家有政治或者文化關聯地區嘅跨區域政權（柔然、吐蕃、渤海、喀喇汗國等）。

根據中國歷史地理學嘅劃定，清朝響公元1750年代到公元1840年代為止，第一次鴉片戰爭爆發之前嘅極盛領土範圍都係中國史嘅一部分，而呢個地區入面全部民族建立嘅政權都係中國史上嘅政權^{[196][197][198]}。清朝鼎盛時期嘅疆域面積超過1300萬平方公里，涵蓋以下嘅地區^{[199][200][201]}：

• 北方包埋唐努烏梁海，同西伯利亞接壤^[202]；
• 東北到外興安嶺，包埋庫頁島，臨日本海^{[203][204][205]}；
• 東南包埋臺灣島同隔籬島嶼，臨東海、太平洋^[203][204]；
• 南方包埋海南島同南海諸島，臨南海^{[203][204][205][206]}；
• 西南到達旺、南坎、江心坡；
• 西到帕米爾高原^{[204][205][207]}；
• 西北到巴爾喀什湖北岸^{[203][204][205][207]}。

曾經喺一啲歷史時期由中國政權統治嘅其他地區（好似朝鮮半島嘅部分區域、今日越南嘅中部同北部、中亞嘅部分地區等）則涵蓋喺相應嘅中國政權嘅歷史入便。響「中國」之外地區但係有中國血統嘅王朝（如同越南嘅前李朝、暹羅嘅吞武里王朝等）都唔包埋喺呢個表入便^{[208][209][210][211]}。另外，曾經統治過響「中國」之外嘅中華朝貢國嘅王朝（例如琉球群島嘅第一尚氏王朝、越南嘅阮朝等）亦都被排除喺呢個表之外^[212][213]。

顏色說明

　 淺黃色底色係影響力比較大嘅政權
　 灰色底色係主要嘅歷史時期（亦都係多個政權嘅統稱）
　 左邊嗰行橙色底色係包埋喺「三國」入便嘅政權
　 左邊嗰行藍色底色係包埋喺「十六國」入便嘅政權
　 左邊嗰行綠色底色係包埋喺「南北朝」入便嘅「北朝」政權
　 左邊嗰行紫色底色係包埋喺「南北朝」入便嘅「南朝」政權
　 左邊嗰行黃色底色係包埋喺「五代十國」入便嘅「五代」政權
　 左邊嗰行粉紅色底色係包埋喺「五代十國」入便嘅「十國」政權

呢個表顯示嘅王朝同「王朝一覽」入便嘅王朝係一樣嘅。

中國王朝	今日地區對照[az]	攷
夏朝	中華人民共和國	[214]
商朝	中華人民共和國	[215]
西周	中華人民共和國	[216]
東周	中華人民共和國	[217][218]
秦朝	中華人民共和國  ∟ 香港特別行政區  ∟ 澳門特別行政區 中華民國[ba] 朝鮮民主主義人民共和國 越南社會主義共和國	[219]
西漢	中華人民共和國  ∟ 香港特別行政區  ∟ 澳門特別行政區 中華民國[ba] 阿富汗伊斯蘭共和國 哈薩克斯坦共和國 吉爾吉斯共和國 蒙古國 朝鮮民主主義人民共和國 大韓民國 塔吉克斯坦共和國 越南社會主義共和國	[220]
新朝	中華人民共和國  ∟ 香港特別行政區  ∟ 澳門特別行政區 中華民國[ba] 蒙古國 朝鮮民主主義人民共和國 越南社會主義共和國	[220]
東漢	中華人民共和國  ∟ 香港特別行政區  ∟ 澳門特別行政區 中華民國[ba] 阿富汗伊斯蘭共和國 哈薩克斯坦共和國 吉爾吉斯共和國 蒙古國 緬甸聯邦共和國 朝鮮民主主義人民共和國 大韓民國 塔吉克斯坦共和國 越南社會主義共和國	[221]
曹魏	中華人民共和國 阿富汗伊斯蘭共和國 吉爾吉斯共和國 蒙古國 朝鮮民主主義人民共和國 大韓民國 塔吉克斯坦共和國	[222]
蜀漢	中華人民共和國 老撾人民民主共和國 緬甸聯邦共和國	[222]
東吳	中華人民共和國  ∟ 香港特別行政區  ∟ 澳門特別行政區 中華民國[ba] 越南社會主義共和國	[222]
西晉	中華人民共和國  ∟ 香港特別行政區  ∟ 澳門特別行政區 中華民國[ba] 阿富汗伊斯蘭共和國 吉爾吉斯共和國 蒙古國 緬甸聯邦共和國 朝鮮民主主義人民共和國 大韓民國 塔吉克斯坦共和國 越南社會主義共和國	[223]
東晉	中華人民共和國  ∟ 香港特別行政區  ∟ 澳門特別行政區 中華民國[ba] 老撾人民民主共和國 緬甸聯邦共和國 越南社會主義共和國	[224][225]
漢趙	中華人民共和國	[226]
成漢	中華人民共和國	[226]
後趙	中華人民共和國	[226]
前涼	中華人民共和國 吉爾吉斯共和國 塔吉克斯坦共和國	[226][227]
前燕	中華人民共和國	[227]
前秦	中華人民共和國 吉爾吉斯共和國 蒙古國 塔吉克斯坦共和國	[224][227][228]
後燕	中華人民共和國	[229]
後秦	中華人民共和國	[229][230]
西秦	中華人民共和國	[229]
後涼	中華人民共和國 吉爾吉斯共和國 塔吉克斯坦共和國	[229]
南涼	中華人民共和國	[230]
北涼	中華人民共和國	[230]
南燕	中華人民共和國	[230]
西涼	中華人民共和國 吉爾吉斯共和國 塔吉克斯坦共和國	[230]
胡夏	中華人民共和國	[230]
北燕	中華人民共和國	[230]
北魏	中華人民共和國 蒙古國	[229][230][231][232]
東魏	中華人民共和國	[233]
西魏	中華人民共和國	[233]
北齊	中華人民共和國	[234]
北周	中華人民共和國 蒙古國	[234]
劉宋	中華人民共和國  ∟ 香港特別行政區  ∟ 澳門特別行政區 中華民國[ba] 緬甸聯邦共和國 老撾人民民主共和國 越南社會主義共和國	[231]
南齊	中華人民共和國  ∟ 香港特別行政區  ∟ 澳門特別行政區 中華民國[ba] 緬甸聯邦共和國 老撾人民民主共和國 越南社會主義共和國	[232]
梁朝	中華人民共和國  ∟ 香港特別行政區  ∟ 澳門特別行政區 中華民國[ba] 緬甸聯邦共和國 老撾人民民主共和國 越南社會主義共和國	[233]
陳朝	中華人民共和國  ∟ 香港特別行政區  ∟ 澳門特別行政區 中華民國[ba] 越南社會主義共和國	[234]
隋朝	中華人民共和國  ∟ 香港特別行政區  ∟ 澳門特別行政區 中華民國[ba] 越南社會主義共和國	[235]
唐朝	中華人民共和國  ∟ 香港特別行政區  ∟ 澳門特別行政區 中華民國[ba] 阿富汗伊斯蘭共和國 哈薩克斯坦共和國 吉爾吉斯共和國 老撾人民民主共和國 蒙古國 朝鮮民主主義人民共和國 巴基斯坦伊斯蘭共和國 俄羅斯聯邦 大韓民國 塔吉克斯坦共和國 泰王國 土庫曼斯坦 烏茲別克斯坦共和國 越南社會主義共和國	[236][237][238]
武周	中華人民共和國  ∟ 香港特別行政區  ∟ 澳門特別行政區 中華民國[ba] 哈薩克斯坦共和國 吉爾吉斯共和國 老撾人民民主共和國 塔吉克斯坦共和國 烏茲別克斯坦共和國 越南社會主義共和國	[237]
後梁	中華人民共和國	[239]
後唐	中華人民共和國	[240]
後晉	中華人民共和國	[241][242]
後漢	中華人民共和國	[243]
後周	中華人民共和國	[244]
前蜀	中華人民共和國	[245]
楊吳	中華人民共和國	[246]
馬楚	中華人民共和國	[241]
吳越	中華人民共和國	[241][246]
閩	中華人民共和國 中華民國[ba]	[241][246]
南漢	中華人民共和國  ∟ 香港特別行政區  ∟ 澳門特別行政區 越南社會主義共和國	[241][247]
荊南	中華人民共和國	[241]
後蜀	中華人民共和國	[241][245]
南唐	中華人民共和國 中華民國[ba]	[241]
北漢	中華人民共和國	[241][244]
遼朝	中華人民共和國 哈薩克斯坦共和國 蒙古國 朝鮮民主主義人民共和國 俄羅斯聯邦	[241][248]
西遼	中華人民共和國 阿富汗伊斯蘭共和國 哈薩克斯坦共和國 吉爾吉斯共和國 蒙古國 塔吉克斯坦共和國 土庫曼斯坦 烏茲別克斯坦共和國	[249][250]
北宋	中華人民共和國  ∟ 香港特別行政區  ∟ 澳門特別行政區 中華民國[ba]	[248]
南宋	中華人民共和國  ∟ 香港特別行政區  ∟ 澳門特別行政區 中華民國[ba]	[249][250]
西夏	中華人民共和國 蒙古國	[248][249][250]
金朝	中華人民共和國 蒙古國 朝鮮民主主義人民共和國 俄羅斯聯邦	[249][250]
元朝	中華人民共和國  ∟ 香港特別行政區  ∟ 澳門特別行政區 中華民國[ba] 阿富汗伊斯蘭共和國 不丹王國 印度共和國 哈薩克斯坦共和國 蒙古國 緬甸聯邦共和國 尼泊爾聯邦民主共和國 朝鮮民主主義人民共和國 巴基斯坦伊斯蘭共和國 俄羅斯聯邦 大韓民國 泰王國 越南社會主義共和國	[251][252]
北元	中華人民共和國 哈薩克斯坦共和國 蒙古國 俄羅斯聯邦	[253][254]
明朝	中華人民共和國  ∟ 香港特別行政區  ∟ 澳門特別行政區[bb] 中華民國[ba] 不丹王國 印度共和國 老撾人民民主共和國 蒙古國 緬甸聯邦共和國 巴基斯坦伊斯蘭共和國 俄羅斯聯邦 越南社會主義共和國	[253][254]
南明	中華人民共和國  ∟ 香港特別行政區  ∟ 澳門特別行政區[bb] 中華民國[ba] 老撾人民民主共和國 緬甸聯邦共和國	[253][254]
後金	中華人民共和國 蒙古國 俄羅斯聯邦	[255][256]
清朝	中華人民共和國  ∟ 香港特別行政區  ∟ 澳門特別行政區[bb] 中華民國 阿富汗伊斯蘭共和國 印度共和國 哈薩克斯坦共和國 吉爾吉斯共和國 老撾人民民主共和國 蒙古國 緬甸聯邦共和國 尼泊爾聯邦民主共和國 巴基斯坦伊斯蘭共和國 俄羅斯聯邦 塔吉克斯坦共和國 越南社會主義共和國	[255][256]