代名詞，又叫代詞、代字[1]，係種詞性，專門用嚟代替名詞。粵語入面基本用「你」、「我」、「佢」字就得，但唔少語言都有比較複雜嘅規矩。按照功用，分為指示代詞、人稱代詞、物主代詞、反身代詞、不定代詞、關係代詞、疑問代詞等等。
代名詞未必係獨立嘅字詞，可以係嵌入主語、賓語、動詞等等唔獨立成字嘅形態素，例如喺聖經希伯來文，人稱代詞好多時都係後綴[2]，喺芬蘭文亦可以係，不過通常只限於書面語[3]同少量慣用語。
