脫氧核糖核酸

脫氧核醣核酸係一種由核苷酸重複排列組成嘅長鏈聚合物^[1][2]，寬度約莫22到24埃（2.2到2.4納米），每一個核苷酸單位就大約長3.3埃（0.33納米）^[3]。喺成個脫氧核醣核酸聚合物入面，可能有幾百萬個連住嘅核苷酸。例如人類細胞入面最大嘅1號染色體入面，就有2億2千萬個鹼基對^[4]。通常喺生物體入面，脫氧核醣核酸唔係單一分子，而係形成兩條兩條配對同緊密結合^[5][6]，而且好似蔓藤咁纏繞做雙螺旋結構嘅分子。每個核苷酸分子嘅磷酸同脫氧核醣會互相連結，做成長鏈骨架；另一部分叫做鹼基，可以令一對嘅兩條脫氧核醣核酸互相結合。所謂核苷酸，係指一個核苷加一個或者多過一個磷酸基團，核苷就係指一個鹼基加一個糖類分子^[7]。

脫氧核醣核酸骨架是由磷酸同糖類基團交互排列整成^[8]。組成脫氧核醣核酸嘅糖類分子係環狀嘅2-脫氧核醣，屬於五碳糖嘅一種。磷酸基團上嘅兩個氧原子分別連喺五碳糖喺3號同5號碳原子上面，形成磷酸雙酯鍵。呢種兩邊唔對稱嘅共價鍵位，令條條脫氧核醣核酸長鏈都有方向性。雙螺旋入面嘅兩個核苷酸互相用相反方向排列，呢種排列方式叫做反平行。脫氧核醣核酸鏈上互相唔對稱嘅兩末端一邊叫做5'端，另一邊就叫做3'端。脫氧核醣核酸同RNA最主要嘅唔同之一，係响組成糖分子嘅不同，DNA係2-脫氧核醣，而RNA係核醣^[6]。