希伯來文

希伯來文分古今兩種，古代住喺巴勒斯坦地區嘅希伯來人作爲母語用嘅語言叫古典希伯來文（亦即聖經希伯來文），而家以色列國講嘅叫現代希伯來文。現代希伯來文將希伯來文稱呼做עברית，Ivrít；古代嘅聖經希伯來文叫做לשון הקודש，Leshon HaKodesh，意思係「神聖嘅語言」。

希伯來文係一種由右至左打橫寫嘅文字；有啲似以前嘅中文，但係如果同一篇嘢同時有右至左同左至右嘅文字（例如英文字母、阿拉伯數字等等）嘅時候，佢同阿拉伯文一樣，有一套規則規定點寫先啱。

字母

希伯來文有22個字母，其中5個字母喺字尾嘅時候會唔同寫法（如果個字得一個字母，個字母就唔算喺尾）。而今用緊嘅正楷寫法其實唔係古代用嗰套，而係由阿拉米文借來。