音節

喺廿一世紀初，音節嘅一個定義係「畀固有音響冇咁高嘅聲包圍嘅固有音響頂峰」，可以大致想像成「一段元音，前面或者後面掕住輔音，亦可以係前後都掕或者前後都唔掕」。

開放^{[歐 1]}同封閉^{[歐 2]}音節係兩個緊密相關嘅概念。

開放音節係指以元音做結尾嘅音節，而封閉音節係指以輔音做結尾嘅音節^[1]，用廣東話做例子嘅話^[2]，

• saa1（對應嘅漢字：沙、莎）係一段開放音節，而
• saam1（對應嘅漢字：三、衫）就係一段封閉音節。

唔同語言喺音節結構特性上可以分別好大，例子可以睇吓日本話同阿伊努話之間嘅分別：日本話出嗮名淨係得 CV、CCV 同埋 CVn 噉嘅音節（音節以開放居多）－C 表示輔音、V 表示元音、n 表示日本話成日見到嘅 -n 尾；而相比之下，阿伊努話可以有多種唔同嘅 CVC 音節（封閉音節種類多），例如阿伊努話可以有用 -k 呢個輔音做尾嘅音節，但廿一世紀初嘅日本話就做唔到噉嘅嘢^[3]。

音節結構

語言類型學研究想按音系做語言分類嗰陣，成日會考慮音節結構^{[歐 3]}呢個概念。

首先，音節可以分好多種；廣東話基本音節結構係 [C]V[C]，意思係話廣東話絕大多數音節都有個 V（元音），而個 V 前或者後都可以（但唔一定）有 C（輔音），即係話可能音節包括咗^[4][5]：

• V（得一個元音）：例如 o1（漢字：屙、柯）
• CV（一個元音，前面有個輔音）：例如 se2（漢字：捨）
• VC（一個元音，後面有個輔音）：例如 uk1（漢字：屋）
• CVC（一個元音，前後都有輔音）：例如 zik1（漢字：職、織、即）... 等等。

呢種音節結構缺乏複輔音，冇得將多過一個輔音砌埋一齊^[6]，自然唔會有任何 /sm/ 或者 /sl/ 等多過一個輔音開頭或者埋尾嘅音節。

再詳細啲睇嘅話，粵語嘅音節結構係

${\displaystyle {T \over C(H)V(C)}}$ ，

即係一段音節包含一種聲調（${\displaystyle T}$ ），一個輔音喺前（輔音頭）、最多一個輔音喺後（輔音尾），中間挾住一個元音（主元音），另外口語入面會有輔音喺輔音頭戥主元音之間（例：冚唪唥本來係讀做 ham6 baang6 laang6 嘅，但啲人有時會口快讀咗做 haam4 blaang4 · /haːm˨˩ plaːŋ˨˩/ 噉嘅音）^[7]。

睇吓其他漢語嘅話，標準官話同客家話音節結構都相當似廣東話，都係基本上 [C]V[C]，不過都唔係完全一樣。例如標準官話啲結尾 C 淨係得 -n 同 -ng 兩隻款，而廣東話同客家話啲結尾 C 就多變啲，好似係以下呢啲漢字讀音噉^{[註 1][8]}－

食（廣東話：sik6；標準官話：shí；梅縣話：sed^{6 [註 2]}）

三（廣東話：saam1；標準官話：sān；梅縣話：sam¹）

潑（廣東話：put3；標準官話：pō；梅縣話：pad⁵）

如果睇漢語以外嘅東亞語言：

• 對比日本話：廿一世紀初嘅日本話有一樣出嗮名嘅嘢，係啲音節以開放居多，佢哋可以有 CVn（-n 做尾）噉嘅音節，例如 ninja（nin-ja；平假名：にんじゃ；漢字：忍者）入面嗰個 nin 噉，但廿一世紀初嘅日本話就唔似得廣東話噉可以有 CVk 或者 CVt。
• 對比越南話：越南話嘅基本音節結構就係 [C][w]V[C]，即係話唯一一種可能嘅複輔音（指多過一個 C 砌埋一齊，中間冇任何嘅 V）係 Cw－呢種複輔音係指有一個 C 後面掕住 w，即係類似廣東話 kwaa1（漢字：跨）噉嘅音，段音節中間係 V 而最尾有可能掕個 C ^[9]。例子可以睇吓 mộc qua（河內音：/məwk͡p̚˧˨ʔ kwaː˧˧/；木瓜噉解）入面個 qua 噉^{[註 3]}。

歐洲同中東嗰頭嘅語言，可以有更長更複雜嘅複輔音，例子可以睇吓英文或者格魯吉亞話。

• 音節輔音
• 音位變換
• 重音
• 拗音
• 速記