Cerolla

Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.

Iste articlo tracta sobre as cerollas, que son os fruitos de Prunus domestica. Ta atros emplegos de «cerolla» se veiga Cerolla (desambigación), y ta «pruna» se veiga Pruna (desambigación).

A cerolla^{[1][2][3][4][5]} u acerolla^[1] (d'o latín <CEREŌLA (PRUNA), literalment «cerolla cerulia/de cera»), que tamién se conoix en Aragón con variants d'iste nombre como cirolla^[1], ciruela^[1][6], ceruella^[5] u ciruella^[1][6], ye principalment a fruita comestible d'a cerollera domestica (Prunus domestica), un árbol fruital extensament cautivato ta producir-las. En a comarca de Ribagorza y tamién en bels nuclios que i son colindants, en a Cinca Meya y o Semontano de Balbastro, se documenta o nombre pruna^[1] (lat. <PRUNA).

Botanicament, a cerolla ye una drupa con endocarpo duro (o ruello) y un mesocarpo tovo y sucoso, rico en glucidos. As cerollas contienen sorbitol, o que las fa tener propiedaz laxants si se'n consume masas.

En l'actualidat, y como a cerollera ye un árbol domesticato dende l'Antiguedat, se'n conoix y se'n tien descritas una multitut de variedaz comercials; una d'as mas populars ye a claudia. En os Balcans s'elabora una bebita destilata a partir d'as cerollas.