Катастрофа Bell-212 пад Варзаканам

19 мая 2024 года ў 13:30^[2] пад Варзаканам (Іран) па шляху ў Тэбрыз разбіўся верталёт Bell 212^[3]. Ён перавозіў прэзідэнта краіны Ібрагіма Раісі, міністра замежных спраў Хасейна Аміра-Абдалахяна, губернатара Усходняга Азербайджана Малека Рахмаці і Вярхоўнага лідара Усходняга Азербайджана Махамеда Алі Але-Хашэма.

Інцыдэнт адбыўся, калі Раісі падарожнічаў па іранскай правінцыі Усходні Азербайджан, недалёка ад горада Джульфа, размешчанага на мяжы з Азербайджанам. Падчас візіту прэзідэнт прысутнічаў на цэрэмоніі адкрыцця памежнай Худаферынскай і Гыз-Галаскай ГЭС і сустрэўся з азербайджанскім лідарам Ільхамам Аліевым^[4][5].

У супярэчлівых паведамленнях гаворыцца, што верталёт разбіўся альбо каля Джульфы, альбо на ўсход ад вёскі Узі^[6].

Іранскае тэлебачанне паведаміла, што выратавальныя аперацыі сутыкнуліся з цяжкасцямі з-за густога лесу, а таксама неспрыяльных умоў надвор’я, такіх як праліўны дождж, туман і моцны вецер^[4]. Для дапамогі ў пошуках верталёта мабілізаваны дроны, пошукава-выратавальныя атрады і спецыяльна навучаныя сабакі^[7]. Усяго задзейнічана сорак каманд ратавальнікаў^[8]. На наступны дзень стала вядома, што верталёт быў знойдзены цалкам згарэлым, на месцы крушэння «не было ніякіх прыкмет жыцця»^[9]. Выжылых не было^[10].

Часова выконваючым абавязкі прэзідэнта стаў першы віцэ-прэзідэнт Махамад Махбер^[11]. У Іране была абвешчаная пяцідзённая агульнанацыянальная жалоба^[12].