80 Days

Bideojokoak jokalaria Passepartout pertsonaiaren larruan jartzen du, nobelako Phileas Fogg jaunaren zerbitzariaren larruan. Egun batean bere nagusiak bidaia bat hasi behar dutela esango dio, antza denez apustu oso arriskutsua egin baitu, mundu osoari 80 egunetan edo lehenago buelta ematea. Londonetik abiatuta bidaiaren oso atal garrantzitsuak kudeatuko ditu jokalariak Passepartout bezala, eta maila handi batean bere nagusiaren arrakasta edo porrota bere esku egongo da.

Jokoaren zati handi bat Lur planetaren esferari begira emango du jokalariak, bisitatuko duen hurrengo hiria aukeratzen. Zeregin honetan aldagai desberdinak hartu beharko ditu kontuan: bidaiak balio duen dirua, beharrezkoak izango diren bidaia-egunak, garraiatuko duen ekipajea… Aukeratutako bideak garrantzi itzela bereganatuko du, izan ere, pertsonaiek ez dute hirien arteko garraioen lotura guztien berri izango, eta informazio baliotsu hau objektu zein elkarrizketa desberdinen bidez lortuko dute. Informatuta egotea beraz, berebizikoa izango da munduari bira eman eta Londonera berriz garaiz heltzeko.Jokoak badauka 1872an kokatutako eleberriarekiko aldaketa nabarmen bat bere girotzeari dagokionean, steampunk estiloan egindako artelana da. Batez ere teknologia arloan igarriko da hau, erabiliko diren ibilgailuetan azpimarra jarriz.

Lurrun-bidez indartutako zaldi mekanikoek mugiarazitako gurdiak, mota ezberdinetako globo aerostatiko zein zepelinak eta bestelakoak izango dira honen adibide. Hau zenbaitetan beltzez egindako irudietan ikusiko badira ere, batez ere, gertakizunen zati handiena azalduko duten testuetan jasoko da. Honela, XIX. Mendearen aldaera alternatiboa ezagutuko du jokalariak, teknologia, gremio eta bestelako hainbat ezaugarri dituena.

Passepartout bezala erabaki nahikotxo hartuko ditu jokalariak, eta zenbait gauza kontrolpean izaten saiatu beharko da. Hasteko, 80 egunen atzera kontua gainean izango du hastapenetik, uneoro. Phileas Foggek banketxeak lagun ditu eta maileguak eskuragai izango baditu ere, erabilitako dirua zaindu beharko du.

Dirua maneiatzea hiri bakoitzeko merkatuetan objektuen salerosketa egiterakoan zein hurrengo hirirako garraioa kontratatzerakoan izango da garrantzitsua. Azoketan jokalariak egin dezakeena ere baliagarria da, garraio desberdinen ordutegiak lor ditzake, hiri ezberdinen arteko loturen berri izateko. Gainera, eros ditzakeen zenbait jantzik eta objektuk egoera desberdinetan abantailak eskainiko dizkio.

Esaterako, tren gidariaren jantziaren atal guztiak lortuz gero, garraio hauek dagokiena baino egun batzuk arinago abiatuko dira edo merkeago aterako zaizkio, hots, kasu hauetan negoziatzeko ahalmena hobetuko du jokalariak. Honez gain, hiri batean merke eros daitezkeen gauzak, beste leku batzuetan askoz garestiago saltzeko aukera izango du, toki jakin horietatik pasatuz gero.

Dena dela, oinarrizko mekanika interaktiboez gain, jokoak eskaintzen duen testu bidezko esperientzia da jokoaren beste atal handietako bat. Passepartout bezala aukera desberdinak izango ditu jokalariak hiri bakoitzean, bertako tokiren batera joaterakoan gertakizunak kontatuko zaizkio narrazio bidez eta berriz ere, aukera gehiago eskainiko zaizkio.

Bisitatutako hirietan gauza ezberdinak jazoko dira eta hauen barruan jokalariak erabaki anitz izango ditu hautatzeko. Honek “aukeratu zure abentura” motako liburuen antzeko esperientzia bat ekarriko dio. Modu honetan, bahituak izatea, itsasontzi bateko kapitain bilakatzea edo egun batzuez zirku batean lan egitera behartuak izatea bezalako pasadizoak aurkeztuko zaizkio.

• Game Erauntsia - 80 Days bideojokoaren euskarazko analisia.
• Inkle Studios garatzaile eta argitaletxe taldearen webgunea.
• Cape Guy garatzailearen webgunean 80 Days jokoaren orrialdea.