Pentsamenduaren historia Euskal Herrian

Pentsamenduaren historia Euskal Herrian Joxe Azurmendi filosofoak idatzitako saiakera da.

Azurmendik hamarkadatan zehar garatutako ikerlan aitzindariak osatzen du liburua. Ikerlan horren helburua euskal ekoizpen intelektualaren historia sistematikoa egitea izan da.

Bost atal historiko nagusitan banatuta dago liburua: Erdi Aroaren hastapenak, Erdi Aroa, Aro Modernoa, Ilustrazioa eta XIX. mendea. Azken atala XX. mendearen sarreran kokatzen da, sozialismoaren eta abertzaletasunaren hastapenean.

Jakintzaren esparru guztiak aztertzen dira: filosofia, politika, zientzia, teknika, historia, zuzenbidea, artea, gizartea, kultura, hizkuntza, medikuntza, ekonomia, literatura edo erlijioa. Era berean, garai bakoitzaren testuinguru historiko, sozial eta kulturala ere argitzen da.