Sionismo kristau
Sionismo kristaua juduak Lur Santura itzultzea bultzatzen duen ideologia kristau eskatologiko bat da. Euren ikuspegiaren arabera, Israelen sorrera 1948an Bibliako profezia betetzea da, juduen burujabetza berrezartzea Sortaldean Israelgo Bilera eskatologikoaren parekoa delako, Kristoren Bigarren Etorrera gertatzeko aurrebaldintza[1][2][3]. Terminoa XX. mendearen erdialdean erabiltzen hasi zen, kristau berrezarkuntza erabili ordez, jarraitzaileek judu sionisten atzetik manifestatzen zirelako juduentzako aberri bat eskatzen[4].
Kristauen aldetik juduen berrezarkuntzaren babesa hazi egin zen erreforma protestantearekin, XVII. mendeko Ingalaterran. Anita Shapira israeldar historialariaren ustez, Ingalaterrako sionista ebanjeliko kristauek ideia hau txertatu zuten juduen artean 1840ko hamarkadan[5], nazionalismo judua britainiar juduen artean fama txarreko ideologia zenean[6].
Sionismo kristauaren ideia ohikoa izan da Protestanteen artean erreformatik. Sionista kristauek uste dute juduak masiboki itzuli behar direla Israelgo lurraldera, baina, aldi berean, judaismoa alboratu eta kristautasuna onartu behar dutela, profezia biblikoak bete daitezen[7][8][9].