Merkataritza-balantza deitzen zaio herrialde batek denbora-tarte jakin batean izan duen esportazioen eta inportazioen arteko aldeari, oro har urtebeteko tartean. Hau da, merkataritza-balantzak esaten digu nolako aldea dagoen herrialde batek erosten duen eta saltzen duenaren artean; hau da, beste herrialdeei saltzen dien ondasun eta produktuen balio pilatuaren (esportazioen) eta herrialde horrek besteei erositako ondasunen balio pilatuaren (inportazioen) artean.

Hainbat faktorek dute eragina herrialde baten inportazio eta esportazio mailan: kontsumitzaileek duten diru-kopurua, merkantziak garraiatzeko kostua, herrialdean bertan produktuek dituzten prezioak, kontsumitzaileei haien herrialdeko ala erbesteko produktuak gustatzen zaizkien gehiago, eta abar. Horrez gain, kontuan hartu behar da gobernuak nazioarteko merkataritzarako duen politika, merkatuaren aldaketak, moneten arteko kanbio-tasak eta beste kontu batzuk ere. Faktore horien guztien arabera, herrialde baten merkataritza-balantza orekan, superabit egoeran edo defizit egoeran egongo da.