ബ്രിസ്റ്റൽ

ഇവിടെ നിന്നും കണ്ടെടുക്കപ്പെട്ടിട്ടുള്ള ലെവല്വാ രീതിയിൽ നിർമ്മിക്കപ്പെട്ട 60,000 വർഷം പഴക്കമുള്ള അനലാശ്മ ഉപകരണങ്ങൾ മധ്യ ശിലായുഗ കാലഘട്ടത്തിൽ ഈ പ്രദേശത്ത് നിയാണ്ടർത്താൽ മനുഷ്യർ വസിച്ചിരുന്നു എന്ന് തെളിയിക്കുന്നു.^[3][4]അയോയുഗത്തിലെ മൺകോട്ടകൾ ഈ നഗരത്തിന്റെ ചില ഇടങ്ങളിൽ ഇപ്പോഴും നിലനിൽക്കുന്നു.^[5] ഇവിടുത്തെ സീ മിൽസ് എന്ന സ്ഥലത്ത് ഒരു കാലത്ത് റോമൻ കാലഘട്ടത്തിലെ വില്ലകളും കോട്ടകളും നിലനിന്നിരുന്നു.^[6]

ഈ പ്രദേശത്ത് ബ്രിഗ്സ്റ്റൊവ് എന്ന പേരിൽ ആയിരാമാണ്ടോടെ ഒരു പട്ടണം സ്ഥാപിക്കപ്പെട്ടു. 1020-ആം ആണ്ടോടെ സ്വന്തം കമ്മട്ടത്തിൽ നിന്ന് നഗരത്തിന്റെ പേര് ആലേഖനം ചെയ്ത വെള്ളിനാണയങ്ങൾ പുറത്തിറക്കുന്ന ഒരു പ്രമുഖ വ്യവസായ കേന്ദ്രമായ് ഈ നഗരം വികസിച്ചു.^[7] 1067-ആം ആണ്ടിലും പിന്നെ നോർമൻ ഭരണ കാലത്തും ഈ പ്രദേശത്ത് കോട്ടകൾ നിർമ്മിക്കപ്പെടുകയുണ്ടായി.^[7][8]

പതിനൊന്നാം നൂറ്റാണ്ടിൽ നഗരത്തിനടുത്ത് ഫ്രൂം നദിയുടെയും ഏയ്‌വൻ നദിയുടെയും സംഗമ സ്ഥാനത്ത് ഒരു തുറമുഖം വികസിക്കാൻ തുടങ്ങി.^[9]പന്ത്രണ്ടാം നൂറ്റാണ്ടോടു കൂടി അടിമ വ്യാപാരം അടക്കം അയർലൻറുമായിട്ടുള്ള വ്യവസായത്തിൻറെ ഭൂരിഭാഗവും കൈകാര്യം ചെയ്യുന്ന ഇംഗ്ലണ്ടിലെ ഒരു പ്രമുഖ തുറമുഖമായ് മാറി ഇത്. 14-ആം നൂറ്റാണ്ടിൽ ബ്രിസ്റ്റൽ ഒരു കപ്പൽ നിർമ്മാണ കേന്ദ്രമായ് മാറി.^[10]1348–49-ലെ ബ്ലാക്ക് ഡെത്ത് സമയത്ത് നഗരത്തിലെ ജനസംഖ്യയുടെ മൂന്നിലൊന്നിലധികം ജനങ്ങൾ മരണപ്പെട്ടു.^[11]1373-ൽ നഗരപ്രാന്തങ്ങളെ കൂടി ഉൾപ്പെടുത്തി ബ്രിസ്റ്റൽ ഒരു കൗണ്ടി ആയ് മാറി.^[12][13]

1542-ൽ ബ്രിസ്റ്റൽ രൂപത സ്ഥാപിക്കപെട്ടു.^[14]1640-കളിലെ ഇംഗ്ലീഷ് അഭ്യന്തരയുദ്ധക്കാലത്ത് ഈ നഗരം റോയലിസ്റ്റ് സേന പിടിച്ചടക്കി. 1793-ലെ ഫ്രാൻസുമായുള്ള യുദ്ധം മൂലം കടൽ വഴിയുള്ള വ്യാപാരം കുറയുകയും, 1807-ൽ അടിമ വ്യാപാരം നിരോധിക്കുകയും, പിന്നീട് വ്യവസായ വിപ്ലവകാലത്ത് ഇംഗ്ലണ്ടിൻറെ മറ്റ് ഭാഗങ്ങളിൽ ലിവർപൂൾ പോലെയുള്ള നഗരങ്ങൾ വികസിക്കുകയും ചെയ്തതോടെ ഈ നഗരത്തിൻറെ പ്രാധാന്യം കുറഞ്ഞു.

1909-ൽ ബ്രിസ്റ്റൽ സർവകലാശാല സ്ഥാപിതമായ്.^[15] 1969-ൽ ഈ നഗരത്തിൽ ഒരു പോളിടെക്നിക് തുറക്കപ്പെടുകയും പിന്നിട് അത് 1992-ൽ വെസ്റ്റ് ഓഫ് ഇംഗ്ലണ്ട് സർവകലാശാല ആയ് മാറുകയും ചെയ്തു.^[16]രണ്ടാം ലോകമഹായുദ്ധ സമയത്ത് ലുഫ്ത്‌വാഫ് വിമാനാക്രമണങ്ങളിൽ ഏകദേശം 1300-ഓളം ആളുകൾ കൊല്ലപ്പെടുകയും ഏകദേശം ഒരു ലക്ഷത്തോളം കെട്ടിടങ്ങൾ പൂർണ്ണമായോ ഭാഗീകമായോ തകർക്കപ്പെടുകയും ചെയ്തു.^[17][18]

ബ്രിസ്റ്റൽ നഗര കൗൺസിലിൽ 35 വാർഡുകളുണ്ട്. ഓരോ വാർഡിനും ഈരണ്ട് കൗൺസിലർമാർ വീതം ഉണ്ട്, പക്ഷെ ഇവർ രണ്ട് സമയത്തായിട്ടാണ് തെരഞ്ഞെടുക്കപ്പെടുന്നത്. കൗൺസിലർമാരുടെ കാലാവധി നാലു വർഷമാണ്. ഇവിടെ ലേബർ പാർട്ടിക്കും, കൺസർവേറ്റിവ് പാർട്ടിക്കും പിന്നെ ലിബറൽ ഡെമോക്രാറ്റുകൾക്കും ശക്തമായ സ്വാധീനമുണ്ട്. ബ്രിസ്റ്റലിൻറെ ഇപ്പോഴത്തെ മേയർ ജോർജ് ഫെർഗൂസൻ ആണ്.^[19]

ബ്രിസ്റ്റലിനെ ബ്രിസ്റ്റൽ പടിഞ്ഞാറ്, ബ്രിസ്റ്റൽ കിഴക്ക്, ബ്രിറ്റൽ തെക്ക്, ബ്രിസ്റ്റൽ തെക്കുപടിഞ്ഞാറ് എന്നീ നാല് പാർലമെൻറ് അധോസഭാ മണ്ഡലങ്ങളായ് തിരിച്ചിട്ടുണ്ട്. 2010-ലെ ബ്രിട്ടീഷ് പൊതുതെരഞ്ഞെടുപ്പിൽ രണ്ട് സീറ്റുകൾ ലേബർ പാർട്ടിയും ഓരോ സീറ്റ് വീതം ലിബറൽ ഡമോക്രാറ്റുകളും, കൺസർവേറ്റിവ് പാർട്ടിയും നേടി.

• ബ്രിസ്റ്റൽ സിറ്റി കൗൺസിൽ
• ബ്രിസ്റ്റൽ സന്ദർശിക്കു, official tourism website
• ബ്രിസ്റ്റൽ ഓപ്പൺ ഡയറക്റ്ററി പ്രൊജക്റ്റിൽ