त्रिवेणी गाउँपालिका, सल्यान

शारदा खोला, लुहाम खोला र घुर खोलाको सङ्गम स्थल भएकाले यो गाउँपालिकाको नाम 'त्रिवेणी' राखिएको हो।

यो गाउँपालिकाको पूर्वमा कपुरकोट गाउँपालिका, पश्चिममा कालिमाटी गाउँपालिका उत्तरमा शारदा नगरपालिका र छत्रेश्वरी गाउँपालिका र दक्षिणमा दाङ जिल्ला पर्दछ। त्रिवेणी गाउँपालिका विश्व मानचित्रमा २८° १४' देखि २८° २०' उत्तरी आक्षांश र ८२° ०८' देखि ८२° २०' पूर्वी देशान्तरसम्म फैलिएर रहेको छ भने समुद्री सतहबाट ७८३ देखि २,१०७ मिटरसम्मको उचाइमा अवस्थित छ।

वि.सं. २०६८ को जनगणनाअनुसार यस गाउँपालिकाको जनसङ्ख्या १६,६२४ रहेको छ। कुल जनसङ्ख्यामध्ये महिलाको जनसङ्ख्या ८,८९८ (५३.५३ प्रतिशत) र पुरुषको जनसङ्ख्या ७,७२६ (४६.४७ प्रतिशत) रहेको छ। यस गाउँपालिकामा विभिन्न जातजाति तथा धर्म मान्ने व्यक्तिहरूको बसोबास रहेको छ। वि.सं. २०६८ को जनगणनाअनुसार सबैभन्दा बढी क्षेत्री जाति ९,०९३ जना (५४.७२%), दोस्रोमा मगर जाति ४,४३५ (२६.६८%) र तेस्रोमा कामी जाति १,२९६ (७.८०%) रहेको छ।^[१]