Vobanefapalet Deutänik Netasogädimik

Päfünon ün yel 1919 as „Vobanefapalet Deutänik” (Deutsche Arbeiterpartei, DAP), kel pävotanemükon ini ,NSDAP’ ün 1920. Program e binätem onik pästabons su netätim lemuik, lölim yudanitaik e refudavöd demokrata e kobädima. El ,NSDAP’ pädajäfükon seväriko stabü lecifaprinsip. Presidan e dugan paleta ävedom ün yel 1921 reigänalebüral latikum: hiel ,Adolf Hitler’. Dü yels 1933–1945 Deutän äbinon diktor, in kel el ,NSDAP’ äbinon balik palet pedälöl. Reigatimi ela ,NSDAP’ äkaladons jeikareig, kontrol lemuik love pöp, yudanipojüt, dadeidam yudanas e dunots jonidik ad yokön länis votik in Yurop.

Pos Volakrig telid ün 1945, dü cödäds di ,Nürnberg’, el ,NSDAP’ päpatöfon fa tats pefedüköl as noganükam krimik, päsäfönon e päproibon. Sis fün Fedarepüblik Deutäna ün 1949 föd u slopükam seimik medü vodems, vöds, mäks e sümbols votik paproibons us.

Bevü posöds lelogädik in el ,NSDAP’ äbinoms, flanü el ,Hitler’: hiel ,Rudolf Hess’ (vipresidan ela ,NSDAP’), hiel ,Joseph Goebbels’ (ministeran propagida), hiel ,Hermann Göring’ (balidal Prusäna e lebüdan lutamilita), hiel ,Alfred Rosenberg’ (cifafilosopan paleta e ministeran lofüdikas ziläkas pakoupöl, hiel ,Heinrich Himmler’ (lebüdan poldanefa ed ela ,SS’, poso ministeran dinas nilänik), hiel ,Ernst Röhm’ (lebüdan ela ,SA’), hiel ,Martin Bormann’ (cif lebüra ela ,NSDAP’) e hiel ,Joachim von Ribbentrop’ (ministeran dinas foginänik).

• 
  Davälaplakat ela ,NSDAP’.
• 
  Zänabür ela ,NSDAP’ in ,München’: „Dom brunik”.
• 
  Kobanef limanas ela ,NSDAP’ ün 1922.
• 
  Lasam ela ,NSDAP’.