信用合作社
以合作社形式運作嘅財務公司
信用合作社（英文：credit union；法文：coopérative d’épargne et de crédit，喺加拿大又叫 caisse populaire[1]）係一種非牟利嘅財務公司，提供服務類似銀行，但係係種合作社，即係存戶有份，都係公司股東，不過做存戶通常有某啲限制，例如做某行，但係限制亦可能只係住某區，變相乜人都可以做存戶[2]。
喺某啲國家或者地區，好似銀行咁，信用合作社可能都有存款保障，但係可能唔係由幫銀行做存款保障嘅機構負責；例如喺美國，負責機構係 NCUA（全國信用合作社管理局）[2]，而加拿大就個個省都唔同機構負責（喺加拿大，銀行都係全國性[3]，但係信用合作社可以唔係全國性[1]），當中安大略喺2019年開始，銀行同信用合作社都係由同一個機構做存款保障[4]。