巴勒斯坦國

喺二次大戰之後，聯合國大會通過咗181號決議，正式分割巴勒斯坦地區做阿拉伯國同猶太國，而耶路撒冷就會成爲城邦^[3]。喺決議通過之後冇耐，就爆發咗第一次中東戰爭^[4]，所以決議嘅計劃並冇實行到^[5]。喺1948年5月14號，以色列宣佈獨立之後^[6][7][8]，附近嘅阿拉伯國家就開始入侵以色列^[9][10]。喺戰後，埃及喺加沙走廊成立咗全巴勒斯坦保護國（英文：All-Palestine Protectorate），而約旦就吞并咗西岸地區，包括東耶路撒冷。

到1967年嘅六日戰爭期間，以色列控制咗西岸地區、加沙走廊、戈蘭高地、同埋西奈半島，完全咁佔領咗巴勒斯坦國嘅宣稱國土，亦控制咗埃及同敘利亞嘅部分國土。

喺1988年11月15號，阿拉法特喺阿爾及爾發佈咗《巴勒斯坦獨立宣言》，宣佈成立巴勒斯坦國。喺1993年，以色列同巴勒斯坦解放組織簽咗《奧斯陸協議》，建立咗巴勒斯坦自治政府嚟管治巴勒斯坦國嘅部分地區。

喺2005年，以色列完全撤出加沙走廊，包括拆哂啲聚居地。到2006年巴勒斯坦立法議會選舉（英文：2006 Palestinian legislative election）之後，哈馬斯成功喺加沙走廊贏咗大多數。喺加沙之戰之後，實際咁控制加沙走廊。

自從以色列-哈馬斯戰爭喺2023年10月爆發以嚟，以巴衝突都惡化咗。喺2024年2月26號，成個巴勒斯坦自治政府大規模咁辭職，包括政府嘅總理^[11][12][13]。

根據《奧斯陸協議》，西岸地區分咗做唔同嘅區份：A同B區包含咗165個飛地，而C區就有超過200個以色列聚居地。喺加沙走廊，自從以色列撤出以嚟，雖然係由巴勒斯坦自治政府（最先係法塔赫，之後係哈馬斯）管治，但係一直都俾埃及同以色列封鎖，所以大部分人道組織，包括聯合國同紅十字會，都認爲加沙仍然係受佔領^[14][15][16]。除此之外，巴勒斯坦國亦宣稱東耶路撒冷做佢嘅首都，但係國際社會一般嘅觀點都係：呢個問題要先經過以巴兩邊嘅談判，先至能夠得出結論。

巴勒斯坦國喺唔同嘅國際組織都有參與，包括阿拉伯聯盟、伊斯蘭會議組織、國際奧委會、UNESCO、同埋國際刑事法院等等^[17]。巴勒斯坦喺2011年爭取成爲聯合國成員失敗，但係喺2012年成爲咗觀察成員^[18][19]，係第一次有全部國家承認巴勒斯坦國嘅至少部分主權。

雖然有136個國承認佢係一個獨立主權國，但係仍然有唔少國家仲未承認佢係個獨立主權國，以下係呢班國家嘅一覽：

• 以巴衝突

• 〈国家概况 — 中华人民共和国外交部〉 (簡體中文). 中華人民共和國外交部.
• 〈パレスチナ ｜ 外務省〉 (日文). 日本外務省（日文：外務省）.