歌劇
歌劇（粵拼：go1 kek6；英文：Opera），舊時又叫西洋大戲[1][2][3]、（番）鬼佬大戲[4][5][6][7]，係一種劇場藝術。歌劇最重要嘅特徵係會用歌嚟交代同表達故仔－由歌手主導，俾呢啲歌手用演唱嘅方式表達自己飾演嘅角色；除咗歌之外，歌劇通常仲會用舞台上嘅佈景同埋表演者著嘅服裝配合返故仔嘅情節，而且有陣時仲會配返一定量嘅舞－尤其係芭蕾舞（ballet）－用嚟增強美感[8][9]。
一場歌劇表演涉及極大量嘅人力物力：首先一場歌劇實要有一隊演奏者提供配樂，亦要有指揮家負責做指揮[10]，而上台表演之前啲歌手要係噉日練夜練，確保自己熟嗮每一首歌啲歌詞同埋每一幕入面要做嗰啲動作（噉亦都表示歌劇會用到動作指導[11]）；而且歌劇又要有班人員負責搞佈景同服裝等嘅嘢。例如有廿一世紀初嘅報告話，籌備一場歌劇表演，淨係佈景同服裝方面嘅嘢已經要使成 300,000 歐羅咁多錢[12]。
歌劇係西洋古典樂上嘅一個重要組成部份：歌劇首次出現响 16 世紀尾嘅意大利，後嚟傳遍成個歐洲以至係歐洲以外嘅英文圈－意大利文、英文、法文同德文等都各有自己嘅一套歌劇，而喺跟住嗰幾個世紀，歌劇界出咗好多著名嘅劇目同樂曲，好似係著名意大利作曲家威爾第作嘅《飲酒歌》（意大利文：Libiamo ne' lieti calici）噉，係歌劇《茶花女》（La traviata）入面嘅其中一首歌，打後仲成為咗世上最家傳戶曉嘅旋律之一[13]。到咗廿一世紀，歌劇仲有一路噉演變，有持續噉作新歌新劇，亦有配合資訊科技嘅發展而搞（例如）歌劇網絡直播，方便更多人欣賞呢種歷史悠久嘅演藝[14]。
定位
音樂
名曲
聲種
聲種（voice type）係歌劇上一個不可或缺嘅概念：齋靠常識都知，人人把聲都唔同，有啲人把聲高音啲有啲人把聲低音啲，而且男人同女人嘅聲又唔同；歌劇定義上就實係以歌手把聲做主導嘅，所以歌劇工作者會為咗理解「把聲屬唔同類嘅歌手，唱起歌上嚟嘅效果會有咩唔同」，而將人嘅聲分做幾隻聲種[15]。喺廿一世紀初嘅歌劇上，一般會用以下呢幾個概念將聲種分類：
- 音高（pitch）：簡單講就係一吓聲聽落有幾「高」，喺現代聲學上係指吓聲嘅頻率有幾高，頻率愈高就音高愈高；喺現代音樂上，一般會將音樂上會用到嘅音高俾啲名佢哋，例如中 C 就係啲人學彈鋼琴通常第一吓會彈嘅聲，係指頻率 261.626 Hz 左右[註 1]嘅聲，而如果話兩吓聲「相距一個八度」，意思係指高啲嗰吓聲嘅頻率大約啱啱好係低啲嗰吓聲嘅兩倍咁多[16]。以下係基本 C 大調嗰啲音高喺五線譜入面嘅樣：
- 音域（vocal range）：想像有個人由一個低嘅音（例如 C3）做起始，以上升嘅方式（每吓聲比前一吓高一個半度）一吓一吓噉唱啲音高出嚟－D3、E3、F3... 噉唱，去到某一點佢實會發現自己唱唔到下一個音高出嚟；呢類噉嘅事實表明，一個人把聲「能夠發出咩音高嘅聲」係有上限同下限嘅－音域正正就係指一把人聲「發得出嘅最高音高」同佢「發得出嘅最低音高」之間差幾遠。音域係定義聲種最重要嘅特徵[17]。
- 聲質（意大利文：tessitura）：指一個人嘅「舒服」音域－事實表明，就算一個人唱得出一個音高，都唔表示佢唱起嗰個音高上嚟會舒服，例如想像一個人嘗試唱一個好高嘅音出嚟，佢係就係唱到，但唱到喉嚨覺得唔舒服；聲質呢樣嘢好重要，因為要求一個人夾硬唱佢舒服音域以外嘅音符，嚴重嘅可以對佢把聲造成永久損害[18]，所以好似歌劇呢啲領域嘅工作者往往都好在意一位歌手嘅聲質係點－唔會迫一位歌手唱佢舒服音域以外嘅音符，用意係想保養住佢把聲[19]。
- 過渡聲區（意大利文：passaggio，眾數係 passaggi）：反映咗一個人「由一個聲帶振動模式轉去另一個」嘅規律－一個人條聲帶可以用好幾種唔同嘅振動模式嚟發聲，而且唔同嘅振動模式發出嘅聲都有啲唔同，例如頭腔共鳴就被指要經過大量嘅唱歌訓練先至可以做到有效噉發聲[20]。