Panthera pardus

O leopardo ye un felido extraordinariament adaptable. Con dimensions mas menudas que as d'atros miembros de Panthera, o leopardo ye muit áchil, pero tamién disposa d'una enorme fuerza bruta pa abatir y arrocegar presas muito mas grans que él.

Caza a la guait, dende a vechetación. Por ixa razón o suyo habitat se troba limitau a os puestos a on que i haiga vechetación: nomás evita os disiertos y l'Alta Montanya. Ye un depredador habitual en as sabanas d'Africa y en as d'Asia, pero tamién i hai poblacions en as selvas tropicals d'ixes dos continents y mesmo en as selvas templadas d'Asia.

A on coexiste con atros depredadors mas grans, como con os lions y hienas en as sabanas africanas u os tigres en as selvas d'Asia, o leopardo desenvolica estratechias de supervivencia diferents pa evitar-los, como dormir u consumir as suyas presas en l'alto d'os árbols.

O leopardo ye un felido de mida mediana-gran, con peso entre os 37 y os 90 kg en os masclos y entre 28 y 60 kg en as fembras. Ye a especie mas menuda entre as cuatro que forman o chenero Panthera, estando de regular mas chicorrón que o suyo parient o chaguar, y muito mas chicot que lions y tigres.

A lonchitut d'o cuerpo ye d'entre 91 y 191 centimetros, mas a coda, que fa entre 58 y 110 cm. L'altaria d'o cuerpo ye d'entre 45 y 78 cm en a cruz d'o lomo.

Anque historicament se consideraba que existiban dica trenta subespecies de leopardo, en l'actualidat y a consecuencia d'estudeos de taxonomía moderna, s'ha recomposau en hueito u nueu.^[2]

• Panthera pardus pardus - Leopardo africano.
• Panthera pardus orientalis - Leopardo d'Amur.
• Panthera pardus fusca - Leopardo d'a India.
• Panthera pardus delacouri - Leopardo d'Indochina.
• Panthera pardus saxicolor - Leopardo persa.
• Panthera pardus melas - Leopardo de Chava.
• Panthera pardus japonensis - Leopardo d'o norte de China.
• Panthera pardus nimr - Leopardo d'Arabia.
• Panthera pardus kotiya - Leopardo d'Sri Lanka.

• 
  Con a suya presa en un árbol.
• 
• 
• 
• 

O zoonimo «leopardo» ye un cultismo en todas as luengas romances actuals, que ye arribau diversas vegadas a traviés d'o latín y muit especialment en o baixo latín u latín medieval, como bestia citada en bestiarios y atras obras escritas propias de l'imachinario medieval. En latín, leopardus ye o nombre que se le da normalment a lo que as romances han nombrau regularment «gatopardo», una fiera con tacas propia de l'imachinario medieval europeu, que se crei que no corresponde con garra especie real.

A parola ye d'orichen griego y se composa de dos etimos: λέων, leōn, «lión», y πάρδος, párdos, «tacau». Os griegos antigos tuvon conoiximiento de l'animal probablement por o contacto con atras civilizacions de a mediterrania oriental, como l'Imperio Persa Aquemenida, que en teneban en os suyos territorios.

• Pantera (desambigación).
• Panthera.
• Chaguar.

• Se veigan as imáchens de Commons sobre Panthera pardus.
• Wikispecies tiene un articlo sobre Panthera pardus.