Ann Walker
Ann Walker (Lightcliffe, Britainia Handia,1803ko maiatzaren 20a - ib., 1854ko otsailaren 25a) Mendebaldeko Yorkshireko lurjabe ingeles filantropoa izan zen.[1][2] 1834an bere bikotearekin, Anne Listerrekin ezkondu zen Yorkeko Hirutasun Santuaren elizan, legezko aitortzarik gabe. Bi emakumeren artean izandako ezagutzen den lehen ezkontza da Lister eta Walkerrena.[3][4]
Ann Walker | |
---|---|
Bizitza | |
Jaiotza | Lightcliffe (en) , 1803ko maiatzaren 20a |
Herrialdea | Britainia Handia eta Irlandako Erresuma Batua |
Heriotza | Lightcliffe (en) , 1854ko otsailaren 25a (50 urte) |
Hobiratze lekua | Old St Matthew's Church, Lightcliffe (en) |
Familia | |
Bikotekidea(k) | ikusi |
Jarduerak | |
Jarduerak | lur-jabea |
Biografia
Familia
Ann Walker 1803ko maiatzaren 20an jaio zen Lightcliffen, Mendebaldeko Yorkshireko Riding-ean. John Walker eta Mary Edwards-en alaba zen.[5] San Mateo Eliza Zaharrean bataiatu zuten, Lightcliffe-n, eta lehen urteak Cliffe Hillen bizi izan zituen gurasoekin, Mary eta Elizabeth ahizpekin eta John nebarekin. Sei urte zituenean familia Crows Nest-era joan zen bizitzera.[5] 1815ean bere ahizpa Mary hil zen, Annek 12 urte zituenean. 19 urterekin aita galdu zuen, 1823ko apirilaren 29an hil zen eta urte berean hil zen ama ere, 1823ko azaroaren 20an.[6]
Jaraunsle
Annen neba gazteenak, Johnek, Crow Nest familiaren finkak jaso zuen oinordekotzan. 1823ko urriaren amaieran, Elizabeth ahizpa George Mackay Sutherland kapitainarekin ezkondu eta Ayrshirera joan zen bizitzera.[5] Geroago, 1830ean John neba hil ondoren, Ann eta haren ahizpa Elizabeth Crow Nest-en oinordeko bakarrak bihurtu ziren, eta horrek aberastasun handia ekarri zien.[5]
Ann Crow Nest jabetzan bizi izan zen, 1831-1832ra arte, finkaren barruko etxe txikiago batera (Lidgate) joan arte. Anne Listerrek 1832ko uztailaren 6an kontaktua berreskuratu ondoren, hantxe hasi zen Ann Walker gorteiatzen.[5]
Ezkontza
Walker eta Lister hurbileko jabetzetan bizi izan ziren urteetan, eta noizbehinka bat etorri ziren. Hala ere, 1832 arte ez ziren sartu harreman erromantiko eta sexualean. Harreman hori areagotu egin zen hurrengo hilabeteetan, eta 1834ko otsailaren 27an Ann Walkerrek eta Anne Listerrek eraztunak trukatu zituzten elkarren arteko konpromisoaren sinbolo gisa. Jaunartzea Trinitate Santuaren Elizan (York) hartu zuten, 1834ko Pizkunde Igandean (martxoaren 30a), elkarrekin bat egiteko, eta une horretatik aurrera ezkondutzat jo zituzten. Lotura hori egin zen eraikinean plaka urdin oroigarria jarrita dago.[7]
Zeremonia horren ondoren, elkarrekin bizi izan ziren Shibden Hall-en, Listerren familia-etxean. Bikoteak bidaia luzea egin zuen Georgian zehar, 1840an, gazterik Lister hil zen arte. Walkerrek Anne Listerren gorpua baltsamatzera bidali zuen, Ingalaterrara ekarri ahal izateko. Sei hilabete behar izan zituen Listerren gorpuarekin itzultzeko, Halifaxeko familiaren panteoian hilobia hartzeko. Anne Listerren testamentuak biziarteko gozamena utzi zion Ann Walkerri Shibden Hall eta haren propietate guztieena.[5]
Fedea eta filantropia
Ann Walkerrentzat kristau-fedeak garrantzi handia zuen, haren lan filantropikoek bezala. Lightcliffeko San Mateo elizara joan zen bizitza osoan, eta otoitzak eta Biblia ere irakurtzen zizkion familiari eta igandeetan zerbitzariei.[8] Bere eskola dominikala sortu zuen haurrentzat, beti sentitu baitzuen estimu handia haurtzaroan.[8] 1840an bidaiatzen ari zela etxera bidali zuen gutun batek frogatzen du bere zerbitzariak ondo zaintzen saiatu zela. Gutun horretan, Gabonak zirela eta, –zerbitzaririk ez zegoen sasoian– zer opari eman behar zitzaien zehazten zuen.[8]
Adimen osasuna
Ann Walkerrek osasun mentaleko arazoak izan zituen bizitzan zehar. Antsietaterako eta depresio-aldietan erortzeko joera zuen, eta badirudi erlijio-fedearekin zerikusia zutela.[3] 1843an, Anne Lister hil eta hiru urtera, erotzat jo zuten, eta Yorkeko eroetxe batera eraman zuten. Geroago, Lightcliffeko familia jabetzara itzultzea lortu zuen, 1854an hil zen arte Cliffe Hillen bizitzeko.[8]
Heriotza
Ann Walker 1854ko otsailaren 25ean hil zen, 50 urte zituela. Heriotza-ziurtagiriaren arabera, haren heriotzaren arrazoia "burmuinaren kongestioa, isuria" izan zen. San Mateo Eliza Zaharraren pulpituaren azpian lurperatu zuten, Lightcliffe-n.[9]