Ari Ne'eman

Ne'eman East Brunswicken (New Jersey) hazi zen^[1]. Judaismo kontserbadorean hezi zen^[2]. Txikitatik erakutsi zituen ezaugarri autistak, eta politika publikoarekiko interesa garatu zuen^[3].

Haur autista asko bezala, jazarpena jasan zuen eskolan, eta nerabezaroan herstura izan zuen eta bere buruari kalte egiten zion^[1]. Bosgarren maila bukatu ondoren, Solomon Schechter ikastetxea utzi zuen^[4]. Aldi batez, hezkuntza bereziko ikastetxe segregatu batera joaten zen. Bertan, frustratuta sentitzen zen, «eguneko zaintza» bat zelakoan, ikasle desgaituak «normalizatzera» bideratzen zena akademikoki erronka jarri beharrean. Defentsarako gaitasunak erabiliz, azkenean ikastetxe arrunt batera itzuli zen^[5].

Esperientzia honek eragin handia izan zuen Ne'emanen munduaren ikuspegian^[6]. Batxilergoa amaitzean, Autistic Self Advocacy Network (Autisten Autodefentsa Sarea) sortu zuen. Ondoren, Marylandeko Unibertsitatera joan zen, non Alpha Epsilon Pi-ko kide bihurtu zen eta Zientzia Politikoetan lizentziatu zen^[7].

2010ean, Barack Obama presidenteak Ne'eman izendatu zuen Desgaitasunari Buruzko Kontseilu Nazionalerako^[1].

2014an, Ruderman saria jaso zuen^[8].

2016ko uztailaren 18an, Ari Ne'emanek iragarri zuen utziko zuela Autistic Self Advocacy Networkeko presidente kargua eta Julia Bascomek ordezkatuko zuela^[9]. Ondoren, American Civil Liberties Union-en sartu zen desgaitasunaren politikari buruzko aholkulari gisa.

2017ko uztailean Ruti Reganekin ezkondu zen^[10].

2020an, Judge Rotenberg Centerren deskarga elektrikoko gailuen erabilera debekatzea eskatu zuen^[11].

Ne'emanek adierazten du bere ustez autismoa aldi berean desberdintasun neurologiko bat eta desgaitasun bat dela, ez sendatu behar den gaixotasun bat. Autismoaren estigmatizazioaren aurka dago eta autisten autodefentsa eskubide zibilen arazo gisa ikusten du^[12].

Ne'emanen ustez, gizarteak autistentzako laguntzak garatzera bideratu beharko luke sendabide bila beharrean. Uste du autismoaren sendabidea ez dela laster iritsiko eta autismoaren ikerketa genetikoa erabil daitekeela umeki autistak abortuen bidez suntsitzeko^[1].