Simon Conway Morris

Londres hegoaldeko Sutton boroughean dagoen Carshaltonen jaio zen eta ikasketak Londresen egin ondoren Bristolgo Unibertsitatean geologia ikasketak egin zituen^[1]. Cambridgeko Unibertsitatera joan zen ondoren^[2] eta Harry B. Whittington paleontologo ezaguna izan zuen irakasle. 1996an The History in our Bones hitzaldia emanez Royal Societyko kide bihurtu zen 39 urte baino ez zituela^[2]. 1987an Walcott domina^[3] eta 1998 urtean Lyell domina eskuratu zituen^[2], Geologiako sari preziatuenak hain zuzen ere.

Cambridgeko Unibertsitateko Lur Zientzien mintegiaren arduraduna da 1995 urtetik^[4] eta bertan Burgess Shaleko fauna aztertu du, bai eta Kanbriarreko leherketari loturiko beste hainbat aztarnategietatik jasotako fosilak ere, hala nola Txinatik edota Groenlandiatik.

Burgess Shale

1972 urtean Derek Briggs irlandarrarekin elkarlanean eta Harry B. Whittingtonek gidatuta Burgess Shale aztarnategiko filum ugari zehaztu zituen, ktenoforoetatik hasi eta ornodun goiztiarretaraino^[5]. Lehenengo lanak priapulidoen^[6] eta poliketoen^[7] inguruan argitaratu zituzten eta 1976 eta 1977 artean espezie bakarreko bost animalia filum deskribatu zituen, Nectocaris pterix eta Amiskwia sagittiformis besteak beste.

Eboluzio konbergentziak

The Crucible of Creation (Oxford University Press, 1998) liburuan azaldu zituen identifikaturiko espezie guztiak^[2]. Hurrengo urteetan fosil desberdinen eboluzio konbergentziak identifikatzen aritu da, zuhaitz filogenetikoak eratuz. Life's Solution: Inevitable Humans in a Lonely Universe^[2] liburuan zentzumenen (ikusmena, usaimena, ekolokazioa eta inteligentzia) eboluzio paraleloetan oinarrituz konbergentzia hauen deskribapen zehatzak egin zituen.

Deuterostomio goiztiarrena

2017ko urtarrilean bere taldeak poltsa itxurako deuterostomiorik goiztiarrena deskribatu zuen, Saccorhytus, duela 540 milioi urte bizi izan zena^[8]. Ornodunen arbasorik zaharrena da beraz.

• The Early Evolution of Metazoa and the Significance of Problematic Taxa. (1991) Alberto M. Simonettarekin editatua. Cambridge Univ. Press. ISBN 0-521-40242-5
• The Crucible of Creation: The Burgess Shale and the Rise of Animals. (1998) Oxford Univ. Press. ISBN 0-19-850256-7
• The crucible of creation: the Burgess Shale and the rise of animals (1999). Oxford University Press. ISBN 9780192862020
• The Cambrian "Explosion" of Metazoans. Origination of Organismal Form: Beyond the Gene in Developmental and Evolutionary Biology barnean, ISBN 0-262-13419-5
• Life's solution: inevitable humans in a lonely universe (2003). Cambridge University Press. ISBN 9780521827041
• The deep structure of biology: is convergence sufficiently ubiquitous to give a directional signal? (2008). Templeton Foundation Press. ISBN 9781599471389
• The Runes of Evolution: How the Universe became Self-Aware (2015). Templeton Foundation Press. ISBN 9781599474656.
• Fitness of the Cosmos for Life: Biochemistry and Fine-Tuning. (2008) John D. Barrow, Stephen J. Freeland, Charles L. Harper, Jr.-ekin elkarlanean. Cambridge Univ. Press. ISBN 978-0-521-87102-0
• Water and Life: The Unique Properties of H₂0. (2010) Ruth M. Lynden-Bell, John D. Barrow, John L. Finney, Charles Harper, Jr.-ekin elkarlanean. CRC Press. ISBN 1-4398-0356-0
• Solnhofen (1990) Barthel, K. Werner; Swinburne, Nicola Helga Margaret-ekin elkarlanean. CUP Archive. ISBN 9780521333443