რივალდო

რივალდომ თავისი კარიერა ბრაზილიურ საფეხბურთო კლუბ „სანტა-კრუზში“ დაიწყო. შემდეგ გადაბარგდა კლუბ „მოჟი-მირინში“, რომელიც ბრაზილიის ჩემპიონატის ქვედა დივიზიონში ასპარეზობდა. 1993 წელს რივალდო „კორინთიანსის“ წარმომადგენლებმა შენიშნეს და კლუბში მიიწვიეს. საბოლოოდ ბრაზილიელი „კორინთიანსში“ მხოლოდ 1 წელიწადს გაჩერდა, საიდანაც „პალმეირასში“ გადაბარგდა. „პალმეირასში“ ჩატარებული 104 მატჩში რივალდომ 53 ბურთის გატანა შეძლო და ბრაზილიის სერია A-ში გაიმარჯვა. 1996 წელს რივალდომ დატოვა სამშობლო და საბურთაოდ ევროპაში გაემგზავრა. რივალდოს კარგი თამაშით „დეპორტივოს“ წარმომადგენლები დაინტერესდნენ. სწორედ აქედან იწყება რივალდოს აპოგეა. „დეპორტივოში“ რივალდო დიდი მონდომებით თამაშობდა და ერთ სეზონში 21 ბურთის გატანა შეძლო. რივალდოს ასეთი კარგი თამაში და შედეგიანობა მხედველობაში არც კატალონიურ „ბარსელონას“ გამორჩენია.

1997 წელს რივალდო კატალონიურმა „ბარსელონამ“ შეიძინა. „ბარსელონაში“ რივალდომ ბევრს მიაღწია, კლუბში მრავალი ჯილდო მოიგო და გულშემატკივართა დიდი სიყვარულიც დაიმსახურა. რივალდომ „ბარსელონაში“ 5 წელი იასპარეზა. ჩაატარა 157 თამაში და გაიტანა 86 გოლი, რომელთაგან გადამწყვეტი არაერთი აღმოჩნდა კლუბისთვის. 1999 წელს რივალდომ ოქროს ბურთი მოიგო და გახდა ფიფა-ს წლის ფეხბურთელი. ასევე მოიგო ორჯერ ჩემპიონატი და ერთხელ უეფა-ს სუპერთასი.

რივალდოს „ბარსელონას“ მთავარ მწვრთნელთან (ლუი ვან გალთან) არაერთხელ მოუვიდა კონფლიქტი. 2002 წელს რივალდომ დატოვა კატალონიური „ბარსელონა“ და სათამაშოდ იტალიურ „მილანში“ გადავიდა. რივალდომ იტალიაში ფეხი ვერ მოიკიდა. სულ „მილანში“ ბრაზილიელმა 22 თამაში ჩაატარა და მხოლოდ 5-ჯერ მოახერხა მეტოქის კარის აღება. 2003 წელს რივალდო სამშობლოში ბრუნდება. თუმცა აქაც ცოტახნით ჩერდება. 2004 წლიდან 2007 წლებში რივალდო საბერძნეთის ჩემპიონატში თამაშობდა, ჯერ „ოლიმპიაკოსის“, ხოლო შემდეგ „აეკის“ შემადგენლობაში. შემდეგ სათამაშოდ წავიდა უზბეკეთის „ბუნიოდკორში“. 2011 წლის 22 იანვარს რივალდო იჯარით გადაბარგდა „სან-პაულუში“. საფეხბურთო კარიერა დაასრულა 2014 წელს „მოჟი-მირინში“.

ბრაზილიის ეროვნული ნაკრების შემადგენლობაში რივალდო ორჯერ მსოფლიო ჩემპიონატის მონაწილეა. პირველი მატჩი ეროვნული ნაკრების მაისურით ჩაატარა 1993 წლის 16 დეკემბერს მექსიკის ეროვნული ნაკრების წინააღმდეგ. უკანასკნელი კი — 2003 წლის 19 ნოემბერს ურუგვაის წინააღმდეგ.

საერთო ჯამში რივალდომ ბრაზილიის ეროვნულ ნაკრებში ჩაატარა 74 მატჩი და გაიტანა 34 გოლი. 2002 წლის მსოფლიო ჩემპიონატზე ბრაზილიის ნაკრებმა გაიმარჯვა, რომლის შემადგენლობაში რივალდო მე-10 ნომრით ასპარეზობდა. ფინალში ბრაზილიამ გერმანიას სძლია ანგარიშით 2-0.

საკლუბო

პალმეირასი

• ბრაზილიის სერია A: 1994
• პაულისტას ჩემპიონატი: 1994, 1996

ბარსელონა

• ლა ლიგა: 1997–98, 1998–99
• ესპანეთის თასი: 1997–98
• უეფა-ს სუპერთასი: 1997

მილანი

• იტალიის თასი: 2002–03
• უეფა-ს ჩემპიონთა ლიგა: 2002–03
• უეფა-ს სუპერთასი: 2003

კრუზეირო

• მინეიროს ჩემპიონატი: 2004

ოლიმპიაკოსი

• საბერძნეთის სუპერ ლიგა: 2005, 2006, 2007
• საბერძნეთის თასი: 2005, 2006

ბუნედკორი

• უზბეკეთის სუპერ ლიგა: 2008, 2009, 2010
• უზბეკეთის თასი: 2008, 2010

სანაკრებო

ბრაზილია

• მსოფლიო ჩემპიონატი: 2002; ფინალისტი: 1998
• ზაფხულის ოლიმპიური თამაშების ბრინჯაოს პრიზიორი: 1996
• ფიფა-ს კონფედერაციის თასი: 1997
• კოპა ამერიკა: 1999

ინდივიდუალური

• მსოფლიო ჩემპიონატის სიმბოლური ნაკრების წევრი: 1998, 2002
• ოქროს ბურთი: 1999
• Onze d'Or: 1999
• FIFA 100: 2004
• ბრაზილიური ფეხბურთის მუზეუმის დიდების დარბაზის წევრი

• რივალდოს ოფიციალური საიტი დაარქივებული 2011-05-25 საიტზე Wayback Machine.
• რივალდო — ფიფას ჩანაწერი^{[დაარქივებული]}
• რივლდოს ფრანგული ფან-საიტი დაარქივებული 2008-07-24 საიტზე Wayback Machine.
• (პორტუგალიური) CBF profile დაარქივებული 2009-04-14 საიტზე Wayback Machine.
• რივალდოს ფოტოსურათები
• FootballDatabase profile and statistics
• Midfield Dynamo's 10 Heroes of the Copa América Rivaldo listed in the top 10
• http://www.national-football-teams.com/v2/player.php?id=1049