რობერტო კარლოსი

საკლუბო კარიერა

საკლუბო კარიერა 1990 წელს „სან-პაულუში“ დაიწყო. ამ კლუბის მაისურით ბრაზილიის ჩემპიონატში 33 მატჩში 10 გოლი გაიტანა. 1992 წელს იჯარით კიდევ ერთ ბრაზილიურ კლუბ „ატლეტიკო მინეიროში“ გადავიდა, თუმცა კლუბთან ერთად მხოლოდ 3 მატჩი გამართა. მისი უკანასკნელი მშობლიური კლუბი „პალმეირასი“ გამოდგა. რობერტომ ორი წელი გაატარა „პალმეირასში“ და ორჯერვე შეძლო ქვეყნის ჩემპიონის ტიტულის მოგება. სულ ამ კლუბის მაისურით კარლოსმა 68 თამაში ჩაატარა და მეტოქეთა კარის დალაშქვრა ხუთჯერ მოახერხა.

1995 წელს სამხრეთამერიკული კარიერა დაასრულა და მილანის „ინტერში“ გადავიდა, სადაც ერთი წელი გაატარა. „ინტერის“ მაშინდელ მწვრთნელს, როი ჰოჯსონს ბრაზილიელის ნახევარდაცვაში გამოყენება სურდა, მაგრამ კარლოსი მხოლოდ დაცვაში თამაშობდა. კარლოსმა მილანელთა შემადგენლობაში ვერცერთი ტიტულის მოგება ვერ შეძლო, მაგრამ 34 ოფიციალური მატჩი ჩაატარა და მაყურებლებს თავი 7 გოლით დაამახსოვრა.

1996 წელს კარლოსმა მადრიდის „რეალის“ მაისური მოირგო და კარიერის ყველაზე დასამახსოვრებელი წლები სწორედ მადრიდში გაატარა. რობერტომ მის სადებიუტო წელს „რეალში“ პრიმერას სეზონის მხოლოდ ერთი მატჩი გამოტოვა და 5 გოლი შეაგდო და პირველივე წელს შეძლო ლა ლიგის მოგება. 3 წლიანი პაუზის შემდეგ 2000–01 წლების სეზონში კარლოსი მეორედ დაეუფლა ქვეყნის ჩემპიონის ტიტულს. ამ სეზონში მან სამეფო კლუბის მაისურით 50 ოფიციალური მატჩი გამართა და მეტოქეთა კარი 9-ჯერ აიღო. საერთო ჯამში, რობერტო კარლოსმა მადრიდის „რეალის“ მაისურით 514 ოფიციალურ შეხვედრაში მიიღო მონაწილეობა და 67 გოლი გაიტანა. მადრიდულ კლუბთან ერთად ოთხჯერ ლა ლიგა, ხოლო სამჯერ უეფა-ს ჩემპიონთა ლიგა მოიგო. ამას გარდა სამჯერ ესპანეთის სუპერთასს, ორჯერ საკონტინენტთაშორისო თასს და ერთხელ უეფა-ს სუპერთასს დაეუფლა.

მომდევნო 3 წელიწადი კარლოსმა თურქულ „ფენერბახჩეში“ გაატარა და სუპერლიგის 65 თამაშში 6 გოლი შეაგდო. 2010 წელს ბრაზილიელი ისევ სამშობლოს დაუბრუნდა და რონალდოსთან ერთად 2010–2011 წლებში „კორინთიანსის“ ღირსებას იცავდა.

შედის იმ ფეხბურთელთა რიცხვში, ვისაც ჩემპიონთა ლიგაზე 100-ზე მეტი მატჩი აქვს ჩატარებული. 1997 წელს ფიფა-ს მიერ დასახელებულ წლის საუკეთესო ფეხბურთელთა შორის რობერტო მეორე ადგილზე გავიდა, მას თანამემამულე რონალდომ გაასწრო, ხოლო 2004 წლის მარტში ბრაზილიელი პელეს მიერ დასახელებულ მსოფლიოს ყველა დროის საუკეთესო 125 ფეხბურთელთა შორის მოხვდა.

სანაკრებო კარიერა

1992–2006 წლებში ბრაზილიის ეროვნული ნაკრების შემადგენლობაში 125 მატჩი ითამაშა და 11 გოლი გაიტანა.

პალმეირასი

• ბრაზილიის სერია A (2): 1993, 1994
• პაულისტას ჩემპიონატი (2): 1993, 1994
• რიო-სან-პაულუს ტურნირი: 1993

რეალ მადრიდი

• ლა ლიგა (4): 1996–97, 2000–01, 2002–03, 2006–07
• ესპანეთის სუპერთასი (3): 1997, 2001, 2003
• უეფა-ს ჩემპიონთა ლიგა (3): 1997–98, 1999–2000, 2001–02
• უეფა-ს სუპერთასი: 2002
• საკონტინენტთაშორისო თასი (2): 1998, 2002

ფენერბახჩე

• თურქეთის სუპერთასი (2): 2007, 2009

სანაკრებო

ბრაზილია

• მსოფლიო ჩემპიონი: 2002
• მსოფლიოს ვიცე-ჩემპიონი: 1998
• კოპა ამერიკის ჩემპიონი (2): 1997, 1999
• კოპა ამერიკის ვიცე-ჩემპიონი: 1995
• ფიფა-ს კონფედერაციის თასის მფლობელი: 1997
• ფიფა-ს კონფედერაციის თასის ფინალისტი: 1996
• კონმებოლის პრე-ოლიმპიური ტურნირი: 1996
• ოლიმპიური თამაშების ბრინჯაოს პრიზიორი: 1996

ინდივიდუალური

• ბრაზილიის წლის მეორე საუკეთესო ფეხბურთელი (3): 1993, 1994, 2010
• ფიფა-ს მსოფლიოს წლის მეორე საუკეთესო ფეხბურთელი: 1997
• ევროპული სპორტული მედიის (ESM) წლის სიმბოლური ნაკრების წევრი (7): 1996–97, 1997–98, 1999–00, 2000–01, 2001–02, 2002–03, 2003–04
• მსოფლიო ჩემპიონატის სიმბოლური ნაკრების წევრი (2): 1998, 2002
• ლა ლიგის საუკეთესო სამხრეთამერიკელი მოთამაშის EFE-ს ჯილდო: 1997–98
• უეფა-ს წლის საუკეთესო საკლუბო მცველი (2): 2002, 2003
• უეფა-ს წლის სიმბოლური ნაკრების წევრი: (2): 2002, 2003
• ევროპის წლის მეორე საუკეთესო ფეხბურთელი: 2002
• ფეხბურთში განსაკუთრებული მიღწევებისთვის დაწესებული „ოქროს კვალის“ (Golden Foot) ჯილდო: 2008
• Sports Illustrated-ის ათწლეულის სიმბოლური ნაკრების წევრი: 2009
• ESPN-ის ათწლეულის სიმბოლური ნაკრების წევრი: 2009
• ბრაზილიის სერია A-ს წლის სიმბოლური ნაკრების წევრი: 2010
• ფიფა-ს ასეული (FIFA 100): 2004 ^{[1][2][3][4][5]}
• ბრაზილიური ფეხბურთის მუზეუმის დიდების დარბაზის წევრი ^[6]

არის გვერდი თემაზე:

რობერტო კარლოსი

• რობერტო კარლოსი დაარქივებული 2020-01-15 საიტზე Wayback Machine. — ფიფა-ს ჩანაწერი
• რობერტო კარლოსი — ბრაზილიის ოლიმპიური კომიტეტის ჩანაწერი
• რობერტო კარლოსი — „ანჟის“ ოფიციალურ საიტზე