Rwanda
Rwanda atau sacaro rasmi Republik Rwanda adolah sabuah nagara nan takuruang daratan di Lambah Salo Gadang, Afrika Tangah, tampek batamunyo Danau Gadang Afrika jo Afrika Tenggara. Talatak babarapo darajat di selatan Khatulistiwa, nagara ko babatehan jo Uganda di utara, Tanzania di timur, Burundi di selatan, sarato Republik Demokratik Kongo di barat.[1] Jo laweh 26.338 kilometer persegi (10.169 mil persegi), Rwanda adolah nagara tagadang ka-149 di dunia, jo nagara taketek ka-4 di Afrika sasudah Gambia, Eswatini, jo Djibouti.[2] Ibu kota jo kota tagadangnyo iolah Kagali.[3]
Rwanda sacaro de facto adolah nagara satu partai yaitu Front Patriotik Rwanda (FPR) pimpinan Paul Kagame nan bakuaso sajak baakhianyo parang saudaro 1994.[4][5] Sungguah pun bak itu, Rwanda marupokan nagara demokratis multi-partai, walaupun pamilu dimanipulasi jo babagai caro, tamasuak malarang partai oposisi jo manangkok atau mambunuah pangkritik.[6] Konstitusi malarang partai badasarkan ras, etnis, suku, klan, daerah, seks, agamo, atau pambagian lain nan dapek manimbuakan papacahan atau diskriminasi.[7] FPR adolah partai nan didominasi dek urang Tutsi, namun manarimo dukuangan dari suku nan lain.[8][9]
Presiden adolah kapalo nagara nan punyo kuaso gadang. Presiden dipiliah satiok limo tahun, dan manunjuak Pardana Mantari jo anggota kabinet. Kuaso legislatif dipacik dek Parlemen nan tadiri dari Dewan Perwakilan baanggota 80 urang nan manjabaik salamo limo tahun sarato Senat nan baanggota 26 urang. Salain tu, mantan presiden dapek maajukan diri manjadi anggota senat.[10][7]
Panduduak Rwanda dipakirokan bajumlah 13,2 juta jiwa pado tahun 2022.[11] Sadangkan sensus tahun 2012 mancataik panduduaknyo bajumlah 10,5 juta jiwa. Badasarkan sensus ditahun nan samo, panduduaknyo tagoloang mudo, dimano 43,3% ba umua 15 ka bawah jo 53,4% ba umua 16–64 tahun.[12] Angko harapan hiduiknyo iolah 67,67 tahun, tarandah ka-26 dari 224 nagara di dunia.[13]
