Travis (група)

Travis (македонска транскрипција: Тревис) ― шкотска рок група основана во Глазгов во 1990 година. Во состав на групата се: Френ Хили (главен вокал, ритам гитара), Даги Пејн (бас гитара, придружен вокал), Енди Данлоп (главна гитара, бенџо, придружен вокал) и Нил Примроуз (тапани, удирачки инструменти). Името на групата потекнува од ликот Тревис Хендерсон (го глуми Хари Дин Стентон) од филмот Париз, Тексас (1984). Travis стекнале популарност со нивните бројни хитови: „Driftwood“, „Sing“, „Turn“, „Side“, „Why Does It Always Rain on Me?“ и други.

Travis
Travis пред концерт во Лос Анџелес, 21 ноември 2007
Животописни податоци
Потекло	Глазгов, Шкотска
Жанрови	Пост-бритпоп[1][2] софт-рок[3][4] Бритпоп[5] (на почеток) алтернативен рок[6][7]
Период на активност	1990–денес
Издавачи	Red Telephone Box Caroline International[8] Independiente Epic Records Kobalt[9] BMG
Мреж. место	travisonline.com

Групата својот прв албум, Good Feeling го издала во 1997 година, и забележале умерен успех,^[10] а во јануари 2000 година бил награден со сребрен тираж од BPI.^[11] Нивниот втор албум, The Man Who (1999), бил поуспешен; поминал девет недели на прво место на топ-листата за албуми во Велика Британија и вкупно 134 недели во топ-100 на листата.^[10] Во 2003 година, The Man Who од BPI бил сертифициран како деветкратно платинест албум, што значи продажба од преку 2,68 милиони примероци само во ОК.^[11] По овој успех, групата го издала третиот албум The Invisible Band (2001). The Invisible Band го продолжил успехот на нивниот претходен албум; дебитирал на прво место на топ-листата за албуми во Обединетото Кралство и четири недели се задржал на тоа место, петнаесет недели бил во топ-10 и вкупно педесет и пет недели во топ-100 на листата;^[10] исто така се искачил до триесет и деветтото место на американската топ-листа за албуми Билборд 200 табела со албуми, каде се задржал седум недели.^[12] Една година по објавувањето на The Invisible Band, BPI алумот го сертифицирала како четирикратно платинест.^[11]

Групата потоа објавила уште неколку студиски албуми: 12 Memories (2003), The Boy with No Name (2007), Ode to J. Smith (2008), Where You Stand (2013), Everything at Once (2016), 10 Songs (2020), и Travis Rock (2023).

Во 2004 година, групата го издала нивниот прв албум со најголеми хитови, Singles, кој поминал деветнаесет недели во топ-100 на табелата за албуми во Обединетото Кралство.^[10] Тревис двапати ја добил наградата за најдобра група на BRIT Awards, а NME во 2000 година им ја доделил наградата за музички изведувач на годината.^[13] Во 2016 година, добиле признание на Шкотските музички награди за нивниот исклучителен придонес во музиката.^[14] Медиумите се согласуваат дека групата го трасирала патот на другите групи, како што е Колдплеј, во остварувањето на светски успех во текот на 2000-тите, најмногу со успехот на албумот The Man Who.^[15]