ലൈഫ് ഈസ് ബ്യൂട്ടിഫുൾ (ഇറ്റാലിയൻ ചലച്ചിത്രം)

1997 -ൽ പുറത്തിറങ്ങിയ ഒരു ഇറ്റാലിയൻ സിനിമയാണ് ലൈഫ് ഈസ്‌ ബ്യൂട്ടിഫുൾ (ഇറ്റാലിയൻ: La vita è bella) (Life Is Beautiful). ഈ സിനിമ സംവിധാനം ചെയ്തതും പ്രധാന കഥാപാത്രത്തെ അവതരിപ്പിച്ചതും റൊബർതൊ ബെനീഞ്ഞി ആണ്. റൊബർതൊ ബെനീഞ്ഞി പ്രധാന കഥാപാത്രമായ ഗ്യൂഡോ ഓറെഫിസ് ആയി വേഷം ഇടുന്നു. റൊബർതൊ ബെനീഞ്ഞിയുടെ പിതാവിന് മൂന്നു വർഷ കാലത്തോളം നാസി പട്ടാള തടങ്കലിൽ പീഡനങ്ങൾ അനുഭവിക്കേണ്ടി വന്നിട്ടുണ്ട്. ആ അനുഭവങ്ങളിൽ നിന്നും ഉടലെടുത്തതാണ് കഥയുടെ പ്രമേയം. ഭീകരതയുടെ ഏറ്റവും പൈശാചികമായ ജൂത കൂട്ടക്കൊലയെ (ഹോളോകാസ്റ്റ്) ലളിതമായ രീതിയിൽ സിനിമയിൽ ആവിഷ്കരിച്ചിരിക്കുകയാണ്. അത് കാരണം കൊണ്ട് തന്നെ സിനിമ വിമർശനങ്ങൾക്ക് വിധേയമായിട്ടുണ്ട്. ഡോറ എന്ന നായിക കഥാപാത്രമായി വേഷമിട്ടത് റൊബർതൊ ബെനീഞ്ഞിയുടെ യഥാർത്ഥ ഭാര്യയായ നിക്കൊളേറ്റ ബാസ്ഖിയാണ്.

ലൈഫ് ഈസ്‌ ബ്യൂട്ടിഫുൾ
Theatrical release poster
സംവിധാനം	റൊബർതൊ ബെനീഞ്ഞി
നിർമ്മാണം	ഗ്യാൻലൂഗി ബ്രാസ്കി എൽഡ ഫെറി
രചന	റൊബർതൊ ബെനീഞ്ഞി വിൻസെൻസൊ സെരാമി
അഭിനേതാക്കൾ	റൊബർതൊ ബെനീഞ്ഞി നിക്കൊളേറ്റ ബാസ്ഖി ജോർജ്ജിയോ കാന്റാറിനി ഗ്യുസ്റ്റീനോ ഡ്യുറാനോ ഹോർസ്റ്റ് ബ്ക്കോൾസ്
സംഗീതം	നിക്കോള പ്യോവാനി
ചിത്രസംയോജനം	സൈമോൺ പാഗി
വിതരണം	മിറാമാക്‌സ്‌ ഫിലിംസ്
റിലീസിങ് തീയതി	20 ഡിസംബർ 1997 (1997-12-20) (Italy) 23 ഒക്ടോബർ 1998 (1998-10-23) (United States)
രാജ്യം	ഇറ്റലി
ഭാഷ	ഇറ്റാലിയൻ ജർമൻ ഇംഗ്ലീഷ്
ബജറ്റ്	$20 million[1]
സമയദൈർഘ്യം	116 minutes[2]
ആകെ	$229.2 million[3]

നാസി കോൺസെൻട്രേഷൻ ക്യാമ്പിനെ കുറിച്ചും ക്യാമ്പിലെ ജീവിതത്തെക്കുറിച്ചും നിരവധി സിനിമകൾ വന്നിട്ടുണ്ട്. എന്നാൽ അവയിൽ നിന്നെല്ലാം ലൈഫ് ഈസ് ബ്യൂട്ടിഫുൾ വേറിട്ടു നിൽക്കുന്നു. ഭയാനകമായ ദുരന്തത്തെപ്പോലും സിനിമയിൽ നർമത്തിലൂടെ അവതരിപ്പിക്കുന്നു എന്നതാണ് ഈ സിനിമയുടെ ഏറ്റവും വലിയ പ്രത്യേകത. പ്രണയം, ത്യാഗം, സഹനം, പ്രത്യാശ ഇവയെല്ലാം ഇഴചേർന്ന ഈ ഇറ്റാലിൻ സിനിമ 1999-ൽ മികച്ച വിദേശസിനിമയ്ക്കുള്ള ഓസ്കറടക്കം നിരവധി പുരസ്കാരങ്ങൾ നേടുകയുണ്ടായി.