ସୁନ୍ଦର ପିଚାଇ
ପିଚାଇ ସୁନ୍ଦରରାଜନ୍ (ଜନ୍ମ: ୧୨ ଜୁଲାଇ ୧୯୭୨, ସୁନ୍ଦର ପିଚାଇ ନାମରେ ପରିଚିତ) ଭାରତୀୟ ବଂଶୋଦ୍ଭବ ଆମେରିକୀୟ ବ୍ୟବସାୟ କାର୍ଯ୍ୟନିର୍ବାହୀ । ସେ ଆଲଫାବେଟ୍ ଇନକର୍ପୋରେଟେଡ୍ ଏବଂ ଏହାର ସହାୟକ ସଂସ୍ଥା ଗୁଗୁଲର ମୁଖ୍ୟ କାର୍ଯ୍ୟନିର୍ବାହୀ ଅଧିକାରୀ (ସିଇଓ) ।
Sundar Pichai பிச்சை சுந்தரராஜன் | |
---|---|
ଜନ୍ମ | Pichai Sundararajan ୧୨ ଜୁଲାଇ ୧୯୭୨ |
ଶିକ୍ଷାନୁଷ୍ଠାନ | IIT Kharagpur (B.Tech) Stanford University (M.S.) The Wharton School (MBA) |
ବୃତ୍ତି | CEO of Google[୧] |
ଚାକିରିକ୍ଷେତ୍ର | Google Inc. |
ବୈବାହିକ-ସାଥୀ | Anjali Pichai |
ସେ ଜଣେ ମ୍ୟାଟେରିଆଲ ଇଞ୍ଜିନିୟର ଭାବରେ ନିଜର କ୍ୟାରିୟର ଆରମ୍ଭ କରିଥିଲେ । ମ୍ୟାନେଜମେଣ୍ଟ କନସଲଟିଂ ଫାର୍ମ ମ୍ୟାକିଞ୍ଜି ଆଣ୍ଡ କମ୍ପାନୀରେ ଅଳ୍ପ ସମୟ ରହିବା ପରେ ସେ ୨୦୦୪ରେ ଗୁଗୁଲରେ ଯୋଗ ଦେଇଥିଲେ ।[୨] ସେଠାରେ ସେ ଗୁଗୁଲ କ୍ରୋମ ଏବଂ କ୍ରୋମଓଏସ ସମେତ ଗୁଗୁଲର କ୍ଲାଏଣ୍ଟ ସଫ୍ଟୱେର ଉତ୍ପାଦସମୂହର ପରିଚାଳନା ଏବଂ ଉଦ୍ଭାବନର ନେତୃତ୍ୱ ନେଇଥିଲେ ଏବଂ ଗୁଗୁଲ ଡ୍ରାଇଭ ପାଇଁ ମୁଖ୍ୟତଃ ଦାୟୀ ଥିଲେ । ଏହାବ୍ୟତୀତ ସେ ଜିମେଲ ଓ ଗୁଗୁଲ ମ୍ୟାପ୍ସ ଭଳି ଅନ୍ୟନ୍ୟ ଆପ୍ଲିକେସନର ବିକାଶ ତଦାରଖ କରିଥିଲେ । ୨୦୧୦ରେ ପିଚାଇ ଗୁଗୁଲଦ୍ୱାରା ନୂତନ ଭିଡିଓ କୋଡେକ ଭିପି୮ର ଓପନ ସୋର୍ସିଂ ଘୋଷଣା କରିଥିଲେ ଏବଂ ନୂତନ ଭିଡିଓ ଫର୍ମାଟ ୱେବଏମ ଆରମ୍ଭ କରିଥିଲେ । କ୍ରୋମବୁକ ୨୦୧୨ରେ ମୁକ୍ତିଲାଭ କରିଥିଲା । ୨୦୧୩ମସିହାରେ ପିଚାଇ ଗୁଗୁଲ୍ ଉତ୍ପାଦ ତାଲିକାରେ ଆଣ୍ଡ୍ରଏଡ଼କୁ ଯୋଡ଼ିଥିଲେ ।
ପ୍ରାଥମିକ ଜୀବନ
ପିଚାଇ ଭାରତର ତାମିଲନାଡୁର ମଦୁରାଇଠାରେ ଏକ ତାମିଲ ପରିବାରରେ[୩][୪] ଜନ୍ମଗ୍ରହଣ କରିଥିଲେ ।[୫][୬][୭] ତାଙ୍କ ମାତା ଲକ୍ଷ୍ମୀ ଜଣେ ଷ୍ଟେନୋଗ୍ରାଫର ଥିଲେ ଏବଂ ତାଙ୍କ ପିତା ରେଗୁନାଥ ପିଚାଇ ବ୍ରିଟିଶ କମ୍ପାନି ଜିଇସିରେ ଇଲେକ୍ଟ୍ରିକାଲ ଇଞ୍ଜିନିୟର ଥିଲେ । ତାଙ୍କ ପିତାଙ୍କର ଏକ ବୈଦ୍ୟୁତିକ ଯନ୍ତ୍ରାଂଶ ଉତ୍ପାଦନ କାରଖାନା ମଧ୍ୟ ଥିଲା ।[୮][୯]
ପିଚାଇ ଚେନ୍ନାଇର ଅଶୋକ ନଗରର ଜବାହର ବିଦ୍ୟାଳୟ ଉଚ୍ଚ ମାଧ୍ୟମିକ ବିଦ୍ୟାଳୟରେ ବିଦ୍ୟାଳୟ ଶିକ୍ଷା ଶେଷ କରିଥିଲେ[୧୦] ଏବଂ ଭାରତୀୟ ପ୍ରଯୁକ୍ତି ବିଦ୍ୟା ପ୍ରତିଷ୍ଠାନ ମାଡ୍ରାସର ବନବାଣୀ ବିଦ୍ୟାଳୟରୁ ଦ୍ୱାଦଶ ଶ୍ରେଣୀ ଶେଷ କରିଥିଲେ ।[୧୧][୧୨] ପରେ ସେ ଭାରତୀୟ ପ୍ରଯୁକ୍ତି ବିଦ୍ୟା ପ୍ରତିଷ୍ଠାନ ଖଡ଼ଗପୁରରୁ ମେଟାଲର୍ଜିକାଲ ଇଞ୍ଜିନିୟରିଂରେ ଡିଗ୍ରୀ ହାସଲ କରିଥିଲେ । ସେ ସେହି ଅନୁଷ୍ଠାନର ଜଣେ ବିଶିଷ୍ଟ ପୂର୍ବତନ ଛାତ୍ର ।[୧୩] ସେ ଷ୍ଟାନଫୋର୍ଡ ବିଶ୍ୱବିଦ୍ୟାଳୟରୁ ପଦାର୍ଥ ବିଜ୍ଞାନ ଏବଂ ଇଞ୍ଜିନିୟରିଂରେ ଏମଏସ ଏବଂ ପେନସିଲଭାନିଆ ବିଶ୍ୱବିଦ୍ୟାଳୟର ୱାର୍ଟନ ସ୍କୁଲରୁ ଏମବିଏ ଡିଗ୍ରୀ ହାସଲ କରିଥିଲେ ।[୧୪] ସେଠାରେ ତାଙ୍କୁ ଯଥାକ୍ରମେ ସିବେଲ ସ୍କଲାର ଏବଂ ପାଲମର ସ୍କଲାର ନାମ ଦିଆଯାଇଥିଲା ।[୧୫][୧୬][୧୭]
ବୃତ୍ତିଗତ ଜୀବନ
ସୁନ୍ଦର ପିଚାଇ ଅପ୍ଲାଏଡ଼ ମ୍ୟାଟେରିଆଲସଠାରେ ବୈଷୟିକ ବିଜ୍ଞାନ ଏବଂ ପ୍ରଡକ୍ଟ ମ୍ୟାନେଜମେଣ୍ଟ କ୍ଷେତ୍ରରେ ଏବଂ ମ୍ୟାକିଞ୍ଜି ଆଣ୍ଡ କମ୍ପାନୀରେ ମ୍ୟାନେଜମେଣ୍ଟ କଂସଲଟିଙ୍ଗ କ୍ଷେତ୍ରରେ କାମ କରିସାରିଛନ୍ତି ।
ଗୁଗୁଲ
ପିଚାଇ ୨୦୦୪ରେ ଗୁଗୁଲରେ ଯୋଗ ଦେଇଥିଲେ । ସେଠାରେ ସେ ଉତ୍ପାଦ ପରିଚାଳନା ଏବଂ ଉଦ୍ଭାବନ କ୍ଷେତ୍ରରେ କାମ କରିଥିଲେ, ଯେଉଁଥିରୁ ଗୁଗୁଲ କ୍ରୋମ୍ ଏବଂ କ୍ରୋମ୍ ଅପରେଟିଂ ସିଷ୍ଟମ ଅନ୍ୟତମ । ଗୁଗୁଲ ଡ୍ରାଇଭରେ ମଧ୍ୟ ତାଙ୍କର ବହୁତ ଅବଦାନ ରହିଛି । ଏହା ପରେ ସେ ଗୁଗୁଲର ଅନ୍ୟ ଉତ୍ପାଦର ଉତ୍ପାଦନରେ ଯୋଗଦେଇଥିଲେ । ୧୯ ନଭେମ୍ବର, ୨୦୦୯ରେ ସେ କ୍ରୋମ୍ ଅପରେଟିଂ ସିଷ୍ଟମ ଏବଂ କ୍ରୋମ୍ ବୁକ ସମ୍ପର୍କରେ ବିଶ୍ୱ ବାସୀଙ୍କୁ ଜଣାଇ ଥିଲେ ।
୧୩ ମାର୍ଚ୍ଚ, ୨୦୧୩ରେ ପିଚାଇଙ୍କ କର୍ମ ଜୀବନରେ ଆଣ୍ଡ୍ରୋଏଡର ଆଗମନ ହୋଇଥିଲା । ୧୦ ଅଗଷ୍ଟ, ୨୦୧୫ରେ ସେ ଗୁଗୁଲର ସି.ଇ.ଓ. ଭାବେ ଯୋଗଦେଇଥିଲେ ।
ବ୍ୟକ୍ତିଗତ ଜୀବନ
ସୁନ୍ଦର ପିଚାଇ ଅଞ୍ଜଲୀ ହାରିୟାଣୀଙ୍କୁ ବିବାହ କରିଛନ୍ତି, ଯେକି ତାଙ୍କର ସହପାଠୀ ଏବଂ ଭାରତୀୟ ପ୍ରଯୁକ୍ତି ବିଦ୍ୟା ପ୍ରତିଷ୍ଠାନ ଖଡ଼ଗପୁରରୁ ରସାୟନ ବିଜ୍ଞାନର ଛାତ୍ର । ସୁନ୍ଦର ପିଚାଇଙ୍କର ଦୁଇଟି ସନ୍ତାନ ସନ୍ତତୀ ଅଛନ୍ତି ।