தேக்கு அருங்காட்சியகம்

தேக்கு அருங்காட்சியகம் (Teak Museum) என்பது தென்னிந்தியாவின், கேரளத்தின், மலப்புரம் மாவட்டத்தில், நீலம்பூரில் இருந்து 4 கி.மீ தொலைவில் அமைந்துள்ள ஒரு அருங்காட்சியகம் ஆகும். இந்தியாவில் இயற்கையாகவே தேக்குக் காடுகள் காணப்படும் பகுதிகள் கொண்டது கேரளம் ஆகும். ^[1]

இரண்டு மாடி கட்டடத்தில் உள்ள இந்த அருங்காட்சியகம் உலகின் முதல் தேக்கு அருங்காட்சியகமாகும், இது கேரள வன ஆராய்ச்சி நிறுவனத்தால் இயக்கப்படுகிறது. இந்த அருங்காட்சியகத்தில் தேக்கு பயன்பாட்டின் அம்சங்கள் மற்றும் தேக்கு குறித்த அ முதல் ஃ வரையிலான அனைத்து தகவல்களும் உள்ளன. இந்த அருங்காட்சியகம் வரலாற்று ரீதியாகவும், கலை ரீதியாகவும், அறிவியல் ரீதியாகவும் விரிவான தகவல்களை வழங்குகிறது. ^[2]

கேரள வன ஆராய்ச்சி நிறுவன மையத்தின் வளாகத்தில் 1995 ஆம் ஆண்டில் இந்த அருங்காட்சியகம் நிறுவப்பட்டது, ஏனெனில் இந்த பகுதி தேக்கு வரலாற்றில் முக்கியத்துவம் வாய்ந்தது. உலகின் முதல் தேக்கு தோட்டம் 1840 களில் நிலம்பூரில் ஆங்கிலேயர்களால் உருவாக்கபட்டது. ^[3]