2022 భారత రాష్ట్రపతి ఎన్నికలు

రాజ్యాంగంలోని ఆర్టికల్-58 ప్రకారం పోటీ చేసే అభ్యర్థులకు ఈ కింద అర్హతలుండాలి.

• 35సంవత్సరాలు నిండిన భారతీయ పౌరులై ఉండాలి.
• లోక్‌సభకు ఎన్నికయ్యే అర్హతలుండాలి.
• కేంద్రం లేదా రాష్ట్ర ప్రభుత్వాల్లో లేదా వాటి ఆధ్వర్యంలో పనిచేసే సంస్థల్లో లాభదాయక పదవుల్లో ఉండకూడదు.^[1][2]

రాష్ట్రపతి పదవికి పోటీ చేసే అభ్యర్థిని 50మంది ఎలక్టోరల్ సభ్యులు ప్రతిపాదించాలి. ఆ తర్వాత 50మంది ఆమోదాన్ని తెలియజేయాలి. ఈ జాబితాను ఎన్నికల అధికారులకు సమర్పించి డిపాజిట్ కింద రూ.15వేలు కట్టాలి.

రాష్ట్రపతి ఎన్నికకు 2022 జూన్ 9న కేంద్ర ఎన్నికల సంఘం కమిషనర్ రాజీవ్ ‎కుమార్ షెడ్యూల్ ప్రకటించాడు. రహస్య బ్యాలెట్ పద్ధతిలో ఈ ఎన్నిక నిర్వహిస్తున్నట్లు చీఫ్ ఎన్నికల కమిషనర్ తెలిపాడు.^[3]

రాష్ట్రపతి ఎన్నికల్లో పార్లమెంటు ఉభయసభల ఎంపీలు, వివిధ రాష్ట్రాలు, కేంద్రపాలిత ప్రాంతాల్లోని ఎమ్మెల్యేలు ఎలక్ట్రోల్ కాలేజీ సభ్యులుగా ఉంటారు. లోక్‌సభ, రాజ్యసభలోని నామినేటెడ్ సభ్యులకు మాత్రం రాష్ట్రపతి ఎన్నికల్లో ఓటు హక్కు లేదని, శాసనమండలి సభ్యులు ఎలక్టోరల్‌ కాలేజీలో ఉండరని ఈసీ తెలిపింది. ఓటింగ్‌ బ్యాలెట్‌ పేపర్‌ విధానంలో జరుగుతుంది. రాష్ట్రపతి ఎన్నికకు జరిగే పోలింగ్‌లో ఎంపీలు పార్లమెంటు ప్రాంగణంలో, ఎమ్మెల్యేలు ఆయా రాష్ట్రాల అసెంబ్లీ ప్రాంగణంలో ఏర్పాటు చేసిన పోలింగ్‌ బూత్‌లో తమ ఓటు హక్కును వినియోగించుకుంటారు. ఎంపీలు కనీసం 10 రోజులు ముందుగా సమాచారం ఇచ్చి దేశంలో మరెక్కడైనా (ఏ అసెంబ్లీలోనైనా) ఓటు హక్కు వినియోగించుకోవచ్చు.^[4]