交響曲

喺現代，交響曲係指專門攞嚟俾交響樂團（orchestra）演奏用嘅樂曲。交響樂團係一種大型嘅樂團，閒閒哋會成有 40 至 50 位演奏者一齊演奏；交響樂團會結合多種唔同音色嘅樂器，包括好似小提琴同中提琴等嘅弓弦樂器、好似笛同雙簧管等嘅木管樂器、圓號同小號等嘅銅管樂器、以至定音鼓同鈸等嘅敲擊樂器；喺音樂特性上，交響樂團會做到好多獨特嘅效果，例如「將咁多種唔同樂器嘅聲以唔同方法結合埋一齊」噉嘅效果，係寫嚟獨奏或者俾細樂隊演奏嘅曲做唔到嘅－因為噉，喺好多作曲家心目中，「作交響曲」都係一種難得嘅藝術機會^[6]。

要留意嘅係，交響曲同協奏曲（concerto）唔同，兩者都會用到樂團，但主要分別在於「有無獨奏者」：協奏曲作嚟係預咗俾若干位獨奏者，先後噉喺有隊樂團奏伴奏嘅情況下演奏嘅，即係話隊樂團負責奏嗰段聲明顯係攞嚟做獨奏者嘅陪襯；交響曲正路就無特定嘅獨奏者，而係俾成個交響樂團一齊合作奏，當中無任何一位演奏者零舍會做注意力嘅中心^[7]。

四章式

廿一世紀初有嘅經典交響曲結構（四樂章式）係喺 18 世紀尾嘅意大利歌劇院嗰度確立嘅－18 世紀嘅交響曲成日會用三樂章式嘅結構，跟住慢慢演變成四樂章式，而四樂章式呢種結構到咗廿一世紀初都仲係交響樂嘅標準^[8]。一首經典嘅四樂章式交響曲會有四段樂章^[1][9]：

• 第一樂章：多數都會係奏鳴曲式（sonata form；A-B-A 噉嘅形式），快板（allegro；120-156 bpm，算係 tempo 幾快），有陣時會有一個 tempo 慢嘅起始。第一樂章通常會係成件作品諗頭上嘅核心，會一開頭就表達出首曲嘅重要主題。例如貝多芬嘅《命運交響曲》噉，《命運交響曲》頭嗰四個音符係好出名嘅命運樂想（fate motif），即係好似以下噉嘅四個音符：

  

  • 命運樂想打後仲喺首曲入面出現咗好多次，所以第一樂章開頭用呢段樂想就起到引入嘅作用^[10]。
• 第二樂章：又叫做慢樂章，tempo 會明顯慢過第一樂章，例如係行板（andante；76-108 bpm），復三部曲式或者係變奏曲。
• 第三樂章：小步舞曲（minuet）或者詼諧曲（scherzo）樂章，有「令人想跳舞嘅特徵」；交響曲嘅第三樂章興用三拍子，例如《命運交響曲》第三樂章就係用咗 3/4 拍號（相對於例如第一樂章嘅 2/4 拍號），一般就係三段體，tempo 上中至偏快。
• 第四樂章：又叫做最終樂章，奏鳴曲或者係迴旋曲（rondo）嘅形式，快板。响早期嘅交響曲作品裡頭，第四樂章多數都係短，而且係份量較之為輕嘅一段樂章；之不過有啲作曲家後來開始發覺，成首樂曲最後應該要同第一樂章攞個平衡，所以就幫第四樂章加一啲實質嘅內容，同第一樂章攞個平衡，例如《命運交響曲》第四樂章就有成超過 11 分鐘咁長，相對於第一樂章嘅 7 分零鐘左右。

以下呢啲作曲家都係喺交響樂方面有返咁上下出名嘅：

• 海頓（Haydn；1732-1809 年），一世人作咗最少 106 首交響曲^[11]。
• 莫札特（Mozart；1756-1791 年），一世人作咗最少 47 首交響曲^[12]。
• 貝多芬（Beethoven，1770-1827 年），一般俾人覺得係成功將交響曲搞成一隻獨立曲種嘅作曲家。
• 舒伯特（Schubert，1797 - 1828 年），作咗出名未完成嘅《第 8 號交響曲》。
• 菲歷士·門德爾松（Felix Mendelssohn，1809 - 1847 年）
• 舒曼（Schumann，1810 - 1856 年）
• 布魯克納（Bruckner，1824 - 1896 年）
• 布拉姆斯（Brahms，1833 - 1897 年）
• 柴可夫斯基（Tchaikovsky，1840 - 1893 年）
• 德伏札克（Dvořák，1841- 1904 年）
• 馬勒（Mahler，1860 - 1911 年）
• 蕭斯達高維契（Shostakovich，1906 - 1975 年）
• 拉赫曼尼諾夫（Rachmaninoff，1873 - 1943 年）

... 呀噉。

Symphony 呢隻英文字歷史好悠久：呢隻字最早可以追溯到去希臘文嘅 συμφωνία（羅馬字：symphonia），即係希臘文入面「聲嘅互相配合」噉解^[13]；不過呢隻字喺公元後頭嗰兩千年嘅大部份時間都唔係指「作嚟俾交響樂團演奏嘅樂曲」－喺中世紀嗰陣，symphony 或者類似嘅字喺音樂上係指緊協和嘅意思，協和係樂理上講嘅「幾個同時出現嘅音符係咪好聽順耳」呢個概念，又或者係攞嚟指某幾種樂器^[14]；而喺 16 至 17 世紀，一路都有西人音樂家用 symphony 或者類似嘅字嚟做樂曲嘅名，通常都係指緊「若干隻唔同嘅聲一齊出現」呢類嘅意思或者泛指首曲係寫嚟預一班人合唱或者合奏嘅^[15]。

一般認為，現代意義上嘅交響曲係要去到中世紀後嗰兩三個世紀，先至開始正式噉定形嘅：喺巴洛克時期早期（1600 - 1630），歐洲嘅音樂家開始大舉噉作啲純器樂嘅曲嚟俾樂團演奏，呢啲曲好多時都係攞嚟做啲歌劇嘅配樂，會有多位演奏者分別噉用樂器嚟演奏；而喺呢個時代，symphony 呢隻英文字仲未有清晰嘅定義－就算到咗 1771 年，啲英文文獻都仲係好興將隻字當係「協和」嘅同義詞；打後喺 18 世紀尾至 19 世紀初（浪漫主義時期），海頓、莫札特同貝多芬等嘅音樂家大舉噉作交響曲，正式奠定交響樂嘅地位－主流嘅現代古典樂學者認為，都係要多得呢三位作曲家，交響曲先至會由「歌劇嘅陪襯品」提升到去「能夠獨立噉存在嘅音樂作品」嘅層次，而呢個時期嘅歐美樂壇亦都開始確立 symphony 呢隻字係專指「寫嚟俾交響樂團演奏嘅樂曲」嘅意思^[16][17]。

維基同享有多媒體嘅嘢：
Sinfonia

• 香港管弦樂團嘅官方網站（繁體中文）
• Ben Sir 的童話交響：天鵝湖（繁體中文）
• Symphony（英文），不列顛百科全書講交響曲