Lasagne

Lasagne het in die Middeleeue in Italië ontstaan, moontlik in die stad Napels. Die eerste resep wat aangeteken is, was in die vroeë 14de eeu.^[3] Dit het baie verskil van die latere tradisionele vorm van lasagne; dit het bestaan uit gegiste deeg wat in ’n plat vel gedruk en dan gekook, met kaas en speserye besprinkel en met ’n klein gepunte stokkie geëet is.^[4] Volgens latere resepte is die pasta in hoenderaftreksel gekook en met kaas en hoendervet gegeur.^[4]

Die tradisionele lasagne van Napels, lasagne di carnevale, bestaan uit lae plaaslike wors, klein gebraaide frikkadelle, hardgekookte eiers, ricotta en mozzarella, asook ’n sous.^[5] Lasagne al forno, wat lae vleis- en béchamelsous bevat en ooreenstem met die algemene weergawe van die gereg buite Italië, word tradisioneel verbind met Emilia-Romagna. In ander streke kan lasagne gemaak word van verskeie kombinasies van ricotta of mozzarella, tamatiesous, verskeie soorte vleis (soos gemaalde beesvleis, varkvleis of hoender) en verskeie soorte groente (byvoorbeeld spinasie, olywe of sampioene). Dit word gegeur met wyn, knoffel, uie en origanum. Dit word in al die gevalle gebak (al forno).

Pasta in Suid-Italië is tradisioneel van semolina en water gemaak en in die noorde, waar semolina nie beskikbaar was nie, van meel en eiers. Vandag mag net meel van durum vir kommersiële pasta gebruik word.^[6]

• 
  Ongekookte lasagne op ’n laag béchamel- en vleissous.
• 
  Lasagne al forno
• 
  ’n Vleissous vir lasagne.

• Wikimedia Commons het meer media in die kategorie Lasagne.
• Hierdie artikel is vertaal uit die Engelse Wikipedia