Tetanos
 | Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla. |
O tetanos[1] ye una infección bacteriana causada per Clostridium tetani, y se caracteriza per esbrunces musculars. En o tipo mas común, os esbrunces prencipian en a variella y dimpués progresan a la resta d'o cuerpo. Cada esbrunce gosa durar uns menutos. Os esbrunces ocurren con frecuencia mientres tres u cuatro semanas.[2] Beluns esbrunces pueden estar lo pro grieus como pa fracturar uesos. Atros simptomas d'o tetanos pueden incluyir calentura, sudoración, dolor de tozuelo, dificultat pa trusquir, presión arterial alta y frecuencia cardiaca accelerada. L'inicio d'os simptomas gosa estar de tres a vintiún días dimpués d'a infección. A recuperación puede levar meses. Arredol d'o diez per ciento d'os casos resultan fatals.
Clostridium tetani se troba comunament en o suelo, l'escupinazo, o polvo y lo fiemo. As bacterias per un regular ingresan a traviés d'una ferida en a piel, como un curte u una ferida punchant con un obchecto contaminau. Producen toxinas que interfieren con as contraccions musculars normals. O diagnostico se basa en os sinyals y simptomas de presentación. A malotía no se propaga entre las personas.
O tetanos se puede aprevenir per meyo d'a immunización con a vacuna contra lo tetanos. En aquels que tienen una ferida important y han recibiu menos de tres dosi d'a vacuna, se recomienda tanto la vacunación como la immunoglobulina antitetanica. S'ha d'escoscar a ferida y eliminar cualsequier teixiu muerto. En aquels que son infectaus, se fa servir immunoglobulina antitetanica u, si no ye disponible, immunoglobulina intravenosa. Se pueden fer servir relaxants musculars pa controlar os esbrunces. Ye posible que se requiera ventilación mecanica si la respiración d'una persona se veye afectada.
O tetanos ocurre en totas partis d'o mundo, pero ye mas frecuent en climas calidos y humidos an a tierra tien un alto conteniu organico. En 2015 i habió unas 209.000 infeccions y unas 59.000 muertes en tot o mundo.[3] Isto ye per debaixo d'as 356.000 muertes de 1990.[4] En os Estaus Unius i hai arredol de 30 casos per anyada, cuasi toz os cuals no han estau vacunaus. Hipocrates fació una descripción temprana d'a malotía en o sieglo V aC. A causa d'a malotía estió determinada en 1884 per Antonio Carle y Giorgio Rattone en a Universidat de Torino, y en 1924 se desembolicó una vacuna.
