Белыя каскі

Арганізацыя была заснавана ў пачатку 2013 года Джэймсам Ле Мезур’е, былым афіцэрам брытанскай арміі французская паходжання і прыватным саветнікам па пытаннях бяспекі^[3][4].

Каманды добраахвотнікаў-ратавальнікаў з’явіліся ў Сірыі на тэрыторыях, падкантрольных сірыйскім паўстанцам, у 2012 годзе. У 2012—2013 гадах гэтым камандам дапамагалі грашыма, рыштункам, тэхнікай і медыкаментамі еўрапейскія ўрады, Турцыя, Японія, ЗША і многія няўрадавыя арганізацыі, уключаючы Mayday Rescue, таксама заснаваную Ле Мезур’е. У 2014 годзе каманды ратавальнікаў аб’ядналіся ў агульнанацыянальную арганізацыю «Сірыйская грамадзянская абарона». «Белыя каскі» — гэта іх неафіцыйная назва.

Па даных арганізацыі, у 2016 годзе было задзейнічана каля 2850 добраахвотнікаў, якія працавалі ў 114 пунктах у Дамаску, правінцыях Алепа, Ідліб, Латакія, Хама, Хомс, Дамаск і Дар’а^[5].

Па паведамленні арміі Ізраіля, у ноч на 22 ліпеня 2018 года ізраільскія вайскоўцы па просьбе ЗША, Канады і шэрагу еўрапейскіх краін эвакуіравалі з паўднёвых раёнаў Сірыі актывістаў СГА і членаў іх сем’яў у сувязі з «пагрозай іх жыцця» і перавезлі іх у Іарданію^[6]. Першапачаткова гаворка ішла аб эвакуацыі 827 чалавек, аднак, як заявіў МЗС Іарданіі, у краіну прыбылі 422 актывісты і члены іх сем’яў. Іарданія папярэдне запатрабавала гарантыі таго, што эвакуіраваныя не застануцца на яе тэрыторыі. Толькі пасля таго, як Вялікабрытанія, Германія і Канада ўзялі на сябе юрыдычныя абавязацельствы на працягу трох месяцаў забраць да сябе актывістаў «Белых касак» і іх сем’і, урад краіны пагадзіўся на гэтую аперацыю. У дасягненні дамоўленасцей актыўна ўдзельнічалі ЗША^[7].

Як сказана на афіцыйным сайце арганізацыі, добраахвотнікі Сірыйскай грамадзянскай абароны выратавалі больш за 100 тысяч жыццяў; там жа паведамляецца, што 252 добраахвотнікі загінулі пры выкананні сваіх абавязкаў^[8]. Паводле ацэнкі брытанскага выдання The Telegraph (пачатак мая 2018 года) СГА выратавала не менш за 60 тысяч жыццяў^[9].

Акрамя выратавальнай і медыцынскай работы, «Белыя каскі» займаюцца дакументаваннем таго, што адбываецца ў Сірыі з выкарыстаннем відэакамер^[10].

Адначасова з гэтым, арганізацыя цесна супрацоўнічае з паўстанцкім рухам, у тым ліку і джыхадзістамі (паведамлялася пра сувязь з «Фронт аль-Нусра»^[11]) працуючы, па сцвярджэннем сірыйскіх, іранскіх і расійскіх СМІ, у іх інтарэсах. Некаторыя актывісты нават складаліся ў узброеных групах апазіцыі^[10]. «Белыя каскі» абвінавачваліся ў распаўсюджанні ілжывай інфармацыі і стварэнні пастановачных відэа, дзе яны аказваюць дапамогу насельніцтву пасля авіяўдару або хімічнай атакі^[12][13].

• 2016: Прэмія «За правільны лад жыцця»^[14][15].
• 2016: нямецка-французская прэмія «За правы чалавека і вяршэнства закона» — спецыяльная прэмія міністэрстваў замежных спраў Францыі і Германіі.

• Netflix апублікаваў 16 верасня 2016 года дакументальны фільм «Белыя каскі» брытанскага рэжысёра Арланда фон Айнсідэля^[16][17]. На цырымоніі ўручэння ўзнагарод Акадэміі ў 2017 годзе фільм атрымаў «Оскар» за лепшы дакументальны кароткаметражны фільм^[18].
• У кампутарным шутэры ад першай асобы Call of Dyty: Modern Warfare 2019 года ў адной з місій сустракаюцца ратавальнікі вельмі падобныя на актывістаў арганізацыі^[19].