Elesiòṅ federàli in Germàgna dal 2017

Gl’Elesiòṅ federàli in Germàgna dal 2017 p'r elèś'r i mémbar dal parlamènt, al 19śum Bundestag, i gh'èṅ stadi Dméndga 24 ad Setémbar.

La sgnōra Angela Merkel, canselēra in carga, la curìva p'r un quàrt mandâ p'r al partî di Cristiàṅ Demucràtic (CDU) insém a la sò cumpunènta bavaréśa dl'Ugnòṅ Cristiàna-Suciàla (CSU). I sucialìsta demucràtic dl'SPD, ch'i ér'n a 'l guèran sèg in dla “Grosse Koalition”, i aṅ candidâ 'l èx presidènt dal parlamènt européo Martin Schulz, i Vérd Cem Özdemir e la Katrin Göring-Eckardt, la sinìstra dla Linke Dietmar Bartsch e la Sahra Wagenknecht, i liberài dal FDP Christian Lindner mént'r al partî neo-naśìsta dl'Alternatìva par la Germàgna (AfD) Alexander Gauland e l'Alice Weidel.

In dgl'elesioṅ ad quàt'r an prima la CDU/CSU l'iva muciâ sù al 41,5% di vōt (e 'l 49,35% di séǵ), 'l SPD al 25,7%, la Linke 'l 8,6%, i Vérd 'l 8,4% méntar tut chi àtar partî i n gh l'ìvan minga cavàda a pasàr al śbaramènt dal 5%.

Riśultâ

I vutànt i èṅ stâ 61.675.529 (76,2%). Al partî rivâ prim 'l è stâ la CDU/CSU dla Merkel c'n al 32,9% però paténd na crudàda dal 8,6%. Anc i sucialìsta i èṅ andâ mâł muciànd in tut al 20,5% (-5,2%).

Ólt'r a la Linke (9,1%) e a i Vérd (9,0%), ch'i crésan 'd mèś punt a 'l incìrca, i tórn'n in parlamènt anc i liberài ch'i ardópian a la granda i sò vōt (10,7%). Par la prima vòlta al pòrta di sò rapreśentànt a 'l Bundestag un partî a la dèstra di Cristiàṅ Demucràtic, qvéi dl’AfD (12,6%), ch'l à fat al pîṅ in dl'èx DDR, specialmènt in dla regiòṅ dla Sasògna (prim partî c'n al 27,0%). La SPD l'è rivàda prima sōl in dla sità-stat ad Bréma (26,3%) mént'r in tut chi àtar land l'à vins la CDU/CSU.