ნატაშა პირც-მუსარი

ადრეული ცხოვრება და განათლება

პირც-მუსარმა 1992 წელს დაამთავრა ლიუბლიანის უნივერსიტეტის იურიდიული ფაკულტეტი, სადაც მისი ხელმძღვანელი იყო მარკო ილეშიჩი.^[2] 1997 წელს მან ჩააბარა ადვოკატთა გამოცდა, შემდეგ კი მუშაობა დაიწყო სლოვენიის ტელევიზიაში, სადაც ექვსი წლის განმავლობაში მუშაობდა ჟურნალისტად და ცენტრალურ საინფორმაციო გამოშვების წამყვანად.^[2] შემდეგ, ხუთი წლის განმავლობაში, იგი იყო კომერციული ტელევიზიის POP TV-ის ცენტრალური საინფორმაციო გამოშვების წამყვანი.^[2]

კვალიფიკაციის ასამაღლებლად სწავლობდა CNN-ში, ატლანტა.^[3] შემდეგ მან სწავლა განაგრძო მანჩესტერის სალფორდის უნივერსიტეტში ორი სემესტრის განმავლობაში, რომლის დროსაც გაიარა სტაჟირება BBC-ში, Granada TV-ში, Sky News-ში, Reuters TV-სა და Border TV-ში.^[3] დოქტორის ხარისხი დაიცვა ვენის უნივერსიტეტში.^[4] 2001 წელს იგი გახდა Aktiva Group-ის კორპორატიული კომუნიკაციის განყოფილების ხელმძღვანელი, სადაც მუშაობდა მისი მეუღლე ალეშ მუსარი.^[5] 2015 წელს ფილოსოფიის დოქტორის ხარისხი დაიცვა ვენის უნივერსიტეტში.^[6]

იურიდიული და ბიზნეს კარიერა

2003 წლის აპრილში იგი შეუერთდა სლოვენიის უზენაეს სასამართლოს როგორც განათლებისა და ინფორმაციის ცენტრის დირექტორი.^[7] 2011 წლის მარტიდან იყო ევროპოლის გაერთიანებული სამეთვალყურეო ორგანოს ვიცე-პრეზიდენტი, ხოლო 2012 წლიდან ინფორმაციის კომისრის მანდატის დასრულებამდე იყო ევროკავშირის ამ ორგანოს პრეზიდენტი.^[8] ინფორმაციის კომისრის მანდატის დასრულების შემდეგ მან დააარსა საკუთარი იურიდიული ფირმა, რომელსაც 2016 წლიდან ეწოდა Pirc Musar & Lamut Strle.^[9] იგი იყო სლოვენიაში დაბადებული მელანია ტრამპის ადვოკატი, მაშინ როდესაც ამ უკანასკნელის მეუღლე იყო აშშ-ის პრეზიდენტი.^[10][11] ფართოდ გახმაურებულ შემთხვევებში იგი სლოვენიელი სოციალ-დემოკრატი პოლიტიკოსების,^[12][13] აშშ-ში სლოვენიის ელჩის სტანისლავ ვიდოვიჩის^[14] და სხვათა ადვოკატია.

2010-დან 2021 წლამდე ნატაშა პირც-მუსარი არაერთხელ მოხვდა ქვეყნის ყველაზე გავლენიანი იურისტების ათეულში.^{[15][16][17][18]} მან დააარსა ასოციაცია OnaVe, რათა დააკავშიროს ქალი ექსპერტები და ხელი შეუწყოს განათლებას.^[19][20] 2015-2016 წლებში ის იყო სლოვენიის წითელი ჯვრის პრეზიდენტი.^[21]

პირც-მუსარი არის ექვსი წიგნის ავტორი ან თანაავტორი ინფორმაციის თავისუფლებისა და კონფიდენციალურობის შესახებ სლოვენურ, ინგლისურ და ხორვატულ ენებზე.^{[22][23][24][25][26][27]}

პოლიტიკური კარიერა

2022 წლის 23 ივნისს მან წამოაყენა თავისი კანდიდატურა სლოვენიის პრეზიდენტის თანამდებობაზე 2022 წლის ოქტომბრის საპრეზიდენტო არჩევნებზე, მონაწილეობას მიიღებდა, როგორც დამოუკიდებელი კანდიდატი.^[28][29] მას მხარი დაუჭირეს სლოვენიის ყოფილმა პრეზიდენტებმა მილან კუჩანმა და დანილო ტიურკმა.^[30] პირც-მუსარი არასოდეს ყოფილა არცერთი პოლიტიკური პარტიის წევრი.^[31] მიუხედავად იმისა, რომ იგი დამოუკიდებელი კადიდატია მას მხარს უჭერენ სლოვენიის პირატების პარტია^[32] და ახალგაზრდული პარტია — ევროპელი მწვანეები.^[33]

საპრეზიდენტო არჩევნების პირველ ტურში მიიღო ხმების 26,88 %, დაიკავა მეორე ადგილი და გადავიდა მეორე ტურში.^[34] 13 ნოემბრის მეორე ტურში ნატაშა პირც-მუსარმა დაამარცხა ანჟე ლოგარი და აირჩიეს სლოვენიის პირველ ქალ პრეზიდენტად.^[35]

მისი მეუღლეა ბიზნესმენი ალეშ მუსარი. მათ ჰყავთ ვაჟი. ისინი არიან რუსული დაჩის სახელით ცნობილი ქონების მფლობელები ზგორნე-გამელნეში და ასევე ფლობენ Rolls Royce Phantom VI ლიმუზინს, რომელიც დამზადებულია 1971 წელს და ოდესღაც ფლობდა ბრიტანეთის სამეფო ოჯახის წევრი, პრინცესა ალექსანდრა.^[36][37]