سہالے ورک زیوڈے

سہالے ورک دار الحکومت ادیس ابابا میں پیدا ہوئیں۔ ادیس ابابا مں واقع لیسی گیوبرے مریم اسکول سے ابتدائی اور ثانوی تعلیم حاصل کی، اس کے بعد فرانس کی مونٹپیلیئر یونیورسٹی سے نیچرل سائنس کی تعلیم حاصل کی۔^[8][9] وہ امہری، فرانسیسی اور انگریزی روانی سے بول لیتی ہیں۔^[10]

سفیر

وہ ایک تجربہ کار ایتھوپیائی سفیر ہیں۔ سینیگال،^[11] مالی، کیپ ورڈی، گنی بساؤ، گیمبیا اور گنی میں 1989ء سے 1993ء تک ایتھوپیا کی سفیر رہ چکی ہیں۔ 1993ء سے 2002ء تک وہ جبوتی میں ایتھوپیا کی سفیر اور بین الحکومتی ادارہ ترقی (IGAD) میں ایتھوپیا کی مستقل مندوب رہیں۔^[12][13] بعد میں انہوں نے 2002ء سے 2006ء تک فرانس^[11] میں سفیر، یونیسکو میں مستقل مندوب اور تونس اور مراکش میں سفیر کے طور پر خدمات سر انجام دیں۔^[14]

سہالے ورک کئی اعلیٰ درجے کے عہدوں پر فائز رہیں۔ وہ افریقی اتحاد اور اقوام متحدہ اقتصادی کمیشن برائے ایتھوپیا (ECA) میں ایتھوپیا کی مستقل مندوب اور ایتھوپیا کی وزارت امور خارجہ میں ڈائریکٹر جنرل برائے افریقی امور بھی رہ چکی ہیں۔^[14]

اقوام متحدہ

سنہ 2011ء تک سہالے ورک نے سیکرٹری جنرل اقوام متحدہ بان کی مون کی نمائندہ خصوصی اور وسطی افریقی جمہوریہ میں United Nations Integrated Peace-building Office کی سربراہ کے طور پر خدمات سر انجام دیں۔^[15]

سنہ 2011ء میں بان کی مون نے سہالے ورک کو نیروبی میں اقوام متحدہ کے دفتر (UNON) کا ڈائریکٹر جنرل مقرر کیا۔^[16]

جون 2018ء میں سیکرٹری جنرل انٹونیو گوٹیرش نے سہالے ورک کو افریقی اتحاد میں اپنا نمائندہ خصوصی اور افریقی اتحاد میں اقوام متحدہ دفتر کا سربراہ (ماتحت سیکرٹری جنرل اقوام متحدہ) مقرر کیاـ^[14] ماتحت سیکرٹری جنرل اقوام متحدہ کے درجے تک کا عہدہ پانے والی وہ پہلی خاتون تھیں۔^[16]

صدر ایتھوپیا

سہالے ورک 25 اکتوبر 2018ء کو ایتھوپیا کی صدر منتخب ہوئی تھیں، صدارت کا منصب پانے والی پہلی^[17] اور سیاسی جماعت ایتھوپین پیپلز ریوولوشنری ڈیموکریٹ فرنٹ کے اقتدار میں آنے کے بعد اب تک کی چوتھی صدر ہیں۔^[18] وہ نامعلوم وجوہات کی بنا پر استعفی دینے والے مولاٹو تشومے کی جگہ صدر منتخب ہوئیں اور وہ 6 سال کے لیے ایتھوپیا کی صدر منتخب ہوئی ہیں۔^[10] سہالے ورک کے تقرر نے انہیں افریقا کی کسی بھی ریاست کی واحد خاتون سربراہ بنا دیا۔^[10]