مضر بن نزار

مضر بن نزارکا نام عمرو اور کنیت ابو الیاس تھی۔ مضر آپ کا لقب تھا جو نام پر غالب آ گیا۔ آپ کو خوبصورتی ، رعنائی اور سرخ رنگت کی وجہ سے مضر بولا جاتا تھا جو اصل نام پر بھی غالب آ گیا۔^[1]مضر رسول اللہ کے اٹھارہویں پشت پر جد امجد ہیں۔ آپ تک رسول اللہ کا شجرہ نسب کچھ یوں ہے۔محمد ﷺ بن عبداللہ بن عبدالمطلب بن ھاشم بن عبد مناف بن قصی بن کلاب بن مرہ بن کعب بن لوی بن غالب بن فھر بن مالک بن نضر بن کنانہ بن خزیمہ بن مدرکہ بن الیاس بن مضر^[2]

مضر عربوں میں پہلے وہ شخص تھے جنھوں نے حدی خوانی کو رواج دیا۔ آپ سے پہلے حدی (جو گیت اونٹوں کو چلانے کے لیے گائے جاتے) خوانی کا رواج نہیں تھا۔ ایک مرتبہ آپ اونٹ سے گر پڑے اور ہاتھ کی ہڈی ٹوٹ گئی۔ آپ درد سے بیتاب ہو کر چلائے۔ اے میرا ہاتھ! اے میرا ہاتھ! آپ کی آواز کی کشش سے سارے اونٹ جو چراگاہ میں چر رہے تھے آپ کے پاس جمع ہو گئے۔ جب آپ صحت مند ہو گئے تو حدی خوانی کا آغاز کیا۔

مضر بن نزار کی حکمت میں بہت مشہور ہیں۔ آپ کے چند اقوال درج ذیل ہیں۔

1. جو برائی کا بیج بوئے گا شرمندگی کی فصل کاٹے گا۔
2. بہترین بھلائی وہ ہے جس کو جلد کیا جائے۔
3. اپنے حرص کو مشکلات جھیلنا سکھا لو اور حرص و حوس سے ان کا رخ پھیر لو۔
4. اصلاح اور فساد کا اتنا ہی فاصلہ ہے جتنا (دودھ دینے والا جانور) کا دوبارہ دودھ دوھنے کے درمیان ہے۔^[3]

احادیث نبوی میں مضر کا کچھ یوں ذکر آیا ہیں۔

1. جب لوگوں میں اختلاف واقع ہوا تو مضر برحق تھے۔
2. مضر کو برا بھلا مت کہو کیونکہ وہ مومن تھے۔
3. مضر اور ربیعہ کو برا بھلا نہ کہو وہ مسلمان تھے۔
4. مضر کو برا بھلا مت کہو وہ حضرت اسماعیل علیہ اسلام کے دین پر تھے۔ ^[4]

بنو عدنان میں مضر سب سے زیادہ صاحب ثروت تھے۔ آپ کی شادی رباب بنت حیدہ بن معد سے ہوئی تھیں۔آپ کی اولاد میں دو بیٹے تھے۔

1. الیاس
2. ناس (عیلان) ^[5]