Italianers

Hierdie artikel handel oor die etniese groep. Vir die taal, sien Italiaans.

Die Italianers (Italiaans: italiani [itaˈljaːni]) is 'n nasie en etniese groep inheems aan die Italiaanse Skiereiland en omliggende eilande soos Korsika, Sardinië en Sisilië.^[20][21] Hulle deel 'n gemeenskaplike Italiaanse kultuur, afkoms en praat Italiaans of 'n ander Romaanse taal as moedertaal.^[22][23][24] Italianers vorm die titulêre nasie van Italië, waar hulle 91% van die bevolking uitmaak,^[25] terwyl volgens die wetlike sin die hele bevolking van Italië Italianers is.

Italianers
Totale bevolking:	ca. 140 miljoen
Belangrike bevolkings  in:	Italië 56 miljoen[1]  Brasilië 32 miljoen[2]  Argentinië 20,5 miljoen[3][4]  Verenigde State 17,3 miljoen[5]  Colombia 2,0 miljoen[6]  Venezuela 1,7 miljoen[7]  Frankryk 1,5 miljoen[8]  Kanada 1,5 miljoen[9]  Uruguay 1,1 miljoen[2]  Australië 916 121[10]  Duitsland 830 000[11]  Switserland 545 274[12]  België 451 825[13]  Chili 184 997[2]  Verenigde Koninkryk 130 000[14]  Meksiko 85 000[15]  Suid-Afrika 77 400[2]  Spanje 38 694[2]  Oostenryk 29 287[16]  Albanië 19 000[17]  Kroasië 17 807  Tsjeggië 3 503[18]  Roemenië 3 203[19]
Taal:	Italiaans en ander tale (Sisiliaans • Napolitaans • Korsikaans • Sardies • Ladinies • Piëmontees • Liguries • Emiliano-Romagnolo • Lombardies • Venesiaans • Friulaans • Romansch)
Geloofsoortuiging:	Rooms-Katolieke Kerk (oorwegend)
Verwante etniese groepe:	Ander Romaanse volke soos Franse, Katalane, Portugese, Roemene en Spanjaarde

Behalwe Italië leef Italianers nog in omliggende lande soos Duitsland, Frankryk,^[26] San Marino, Switserland en die Vatikaanstad, maar die meeste Italianers het hulle in Noord- en Suid-Amerikaanse lande soos Argentinië, Brasilië, Kanada, Uruguay, Venezuela en die Verenigde State gevestig, veral sedert die 19de eeu, na die Unifikasie van Italië. Klein minderhede van Italianers leef sedert eeue heen in Kroasië en Slowenië, veral in Dalmasië en op die skiereiland van Istrië.

Met die uitbreiding van die Italiaanse Ryk in die Middellandse See en Oos-Afrika in die eerste helfde van die 20ste eeu het sommige Italianers in lande soos Libië en Somalië gevestig, maar as gevolg van Italië se nederlaag in die Tweede Wêreldoorlog is hulle weer uitgedryf. Nadat Wes-Duitsland in die 1950's en 1960's sy grootste ekonomiese opswaai beleef het, die sogenaamde "Wirtschaftswunder", is Italianers saam met Turke en ander nasies van die Middellandse See genooi om in dié land te gaan werk en woon.

Italianers het 'n groot invloed en bydrae tot wetenskap, kuns, tegnologie, kookkuns, sport, regsgeleerdheid en bankwese,^[27] beide in die buiteland en wêreldwyd.^[28] Italianers is algemeen bekend vir hul lokalisme, sowel regionaliste en munisipaliste^[29] asook hul aandag aan klere en respek vir gesinswaardes.^[30] Die meeste pouse van die Rooms-Katolieke Kerk was Italianers, altesaam 217.