Turke

Hierdie artikel handel oor die etniese groep. Vir die taal, sien Turks.

Die Turke (Turks: Türk milleti of Türkler), ook bekend as Anatoliese Turke (Anadolu Türkleri), is 'n Turkse etniese groep inheems aan Turkye en hulle praat Turks, 'n Turkse taal, as moedertaal. Hulle is die grootste etniese groep in Turkye sowel as die grootste etniese groep onder die sprekers van Turkse tale. Etniese Turkse minderhede bestaan in die lande van die voormalige Ottomaanse Ryk. Daarbenewens het 'n Turkse diaspora deur 'n moderne migrasie gevestig, veral in lande van Wes-Europa.

Turke
Sommige van die beroemde of produktiewe Turke regoor die wêreld
Totale bevolking:	ca. 63–69 miljoen
Belangrike bevolkings  in:	Turkye 55,6–60 miljoen[1]  Duitsland 2,7–2,8 miljoen[2][3]  Bulgarye 588 318–800 000[4]  Irak 500 000–600 000  Frankryk 500 000  Verenigde Koninkryk 500 000[5][6]  Nederland 396 414–500 000[7][8][9]  Oostenryk 350 000–500 000[10][11]  Turkse Republiek van Noord-Siprus 280 000[12][13]  België 200 000[14][15]  Verenigde State 196 222–500 000[16][17][18]  Saoedi-Arabië 150 000–200 000  Rusland 109 883–150 000  Kasakstan 104 792–150 000[19]  Swede 100 000–150 000[20][21]  Sirië 100 000[22]  Noord-Masedonië 77 959[23]  Switserland 70 440[24]  Australië 66 919–150 000[25][26][27][28]  Jordanië 60 000  Libanon 50 000–80 000[29][30]  Libië 50 000  Griekeland 49 000–80 000[31][32]  Kirgisië 40 953–50 000[33]  Azerbeidjan 38 000–110 000[34][35]  Denemarke 28 892[36]  Roemenië 27 700[37]  Kanada 24 910[38]  Italië 22 580[39]  Israel 22 000  Kosovo 18 738  Oesbekistan 15 000–20 000  Oekraïne 8 844[40]  Suid-Afrika 3 500[41]
Taal:	Turks
Geloofsoortuiging:	Hoofsaaklik Soennitiese Islam[42][43][44][45] (nie-konfessionele • Alawitisme • Bektashisme • Twaalfer-Sjiïsme • Jafari) Minderhede ongebonde[42][46] • Christendom[47][48][49]
Verwante etniese groepe:	Ander Turkse volke soos Azerbeidjanners, Basjkiriërs, Gagaoesiërs, Karakalpakke, Kasakke, Kirgisiërs, Oeigoere, Oesbeke, Tartare, Tsjoewasjiërs en Turkmene

Die verspreiding van die Turke het veral met die uitbreiding van die Ottomaanse Ryk gepaard gegaan. Daardeur het hulle op die Balkanskiereiland, in die Midde-Ooste en Noord-Afrika gevestig. As gevolg daarvan leef Turkse minderhede nog in lande buite Turkye soos Bulgarye, Griekeland, Irak, Siprus, Sirië en Roemenië. Maar as gevolg van die Ottomaanse Ryk se verbrokkeling en ontbinding na die neerlaag in die Eerste Wêreldoorlog het die meeste Turke in Turkye gevestig.

Na die einde van die Tweede Wêreldoorlog het Wes-Duitsland in die 1950's en 1960's sy grootste ekonomiese opswaai beleef, die sogenaamde "Wirtschaftswunder", en die regering het Turke genooi om in dié land te gaan werk en woon. Sulke kontrakte het die Turkse regering onder andere met Europese lande soos België, Frankryk, Nederland, Oostenryk en Swede gesluit.

In Suid-Afrika het die Turkse immigrasie in die 19de eeu begin, nadat die destydse Britse Kaapkolonie en die Ottomaanse Ryk in 1861 diplomatiese verhoudings gesluit het. Tans leef sowat 3 500 Turke in Suid-Afrika, veral in groot stede soos Kaapstad, Johannesburg en Pretoria.^[50]