Iñaki Goirizelaia

2008ko abenduaren 4ko EHUren errektoretzarako hauteskundeak irabazi zituen.^[1] 2009ko urtarrilaren 9an izendatu zuten errektore. 2012an, hautetsi bakarra izanik, berriro ere erretore atera zen hauteskundeetan.

Krisi ekonomikoaren urteetan aritu zen arren, ikerketa, hezkuntza eta euskararen erabileraren aldetik hobekuntza nabarmenak lortu zituen unibertsitateak urte horietan. Hala ere agintaldiko bukaera aldean EHUri finantzaketa bermatuko zion Euskal Unibertsitate Sistemaren Lege berria eskatu zien agintari eta ordezkari politikoei.^[2]

2014ko abenduaren 3an epaitegian deklaratu behar izan zuen unibertsitateak langile guztiei ordaindutako ordainsari batzuengatik.^[3] Baina, epaitegiak ebatzi zuen EHUko errektoreak ez zuela lege hausterik egin, aurreko urtean aparteko lansarien ordainketak aurreratzea onetsi zuenean.^[4]

2017ko urtarrilean, bi agintaldiz aritu eta gero, errektoretza kargua utzi zuenean hurrengo errektorea Nekane Balluerka izan zen.

2007tik Interneteko .eus domeinua lortzeko talde eragilean aritu izan zen aktiboki. .eus Fundazioko kidea da ICANN erakundeak (Internet Corporation for Assigned Names and Numbers) domeinua onartu zenetik, eta fundazioko lehendakari hautatu zuten 2017an errektoretza utzi eta hilabete geroago, Joan Mari Torrealdai ordezkatzeko.^[5]

Plazako dantzaria izanik, ekitaldi akademiko batzuetan hitzaz gain, dantzaz ere baliatu izan da mezuak adierazteko.^[2] Mungiako Amilotx Dantza Taldeko zuzendaria da.

1987an doktore titulua lortu zuen "Giro industrialetako pieza partzialki ikuskorren ezaguerarako arkitektura eta algoritmo berria" izeneko tesia Bilboko Ingeniaritza Eskolan aurkeztuta.^[8] Lehenago 1984an eta 1985ean Visiting Fellow moduan aritu zen 20 hilabetez Kaliforniako Stanford Research Institutuan (SRI). Bertan ikerketa-lanak egin zituen adimen artifizial eta ikusmen artifizialean. Lan horiek izan ziren bere tesirako oinarria, hain zuzen ere.

2004an sei hilabetez irakasle bisitari moduan aritu zen Massachusetts-eko Institutu Teknologikoan MediaLab laborategian. Bertan boto elektronikoa eta Internet bidezko botoa bideratzeko teknologia ikertu zituen.

2017an, Boise State University-ko (BSU) Eloise Garmendia Bieter katedraz jabetu zen, Etxepare Institutua tarteko. Boiseko egonaldian, “Nation making: Education, Science and Media” ikastaroa eta hitzaldiak eman ditu BSUn, eta euskal komunitateak antolatutako tailer eta emanaldietan parte hartzen du abuztura bitarte.^[9]

Iñaki Goirizelaia aitzindarietako bat izan zen Telekomunikazioetako Ingeniaritzan euskarazko testu-liburuak eta materialak idazten. Programazioaren oinarriak izeneko liburua argitaratu zuen 1999an. Geroago 2011n Maider Huarte Arrayago, eta Purificacion Saiz Agustin-ekin Telekomunikazio-sare eta zerbitzuak: Ariketa ebatziak eta Teoria liburuak argitaratu zituen.^[10]

Bere ikerketa-ibilbidean hiru lerrotan aritu izan da: adimen artifiziala, ikusmen artifiziala eta telekomunikazioetako sareetako segurtasunean. Orain ingeniaritza telematikoko I2T ikertaldeko kidea da, Bilboko Ingeniaritza Eskolan.

Goirizelaiak sei tesi zuzendu ditu, horietako hiru euskaraz.^[11] Ospe handiko nazioarteko aldizkarietan 14 artikulu argitaratu ditu, horietarik 19 estatuko aldizkarietan, 47 artikulu kongresuetan.^[12][13] Gainera merkatura atera diren bi patente erregistratu ditu nazioartean eta beste bi Espainian.

1986an ADICORP, S.A. enpresa sortu zuen, ikusmen artifizialean tesian lortutako emaitzak merkaturatzeko. Enpresa hori lanean aritu zen 1993 urtera arte, langileek IKUSMEN S.L. enpresa berria sortu zutenean.

• Bilbotar ezagunen zerrenda

• Iñaki Goirizelaia Inguma datu-basean.
• Iñaki Goirizelaia Jakiunde.eus webgunean.
• Iñaki Goirizelaiaren biografia laburra Berria egunkarian.^{[Betiko hautsitako esteka]}
• Elkarrizketa Iñaki Goirizelaiari Argia aldizkarian.
• Argian Iñaki Goirizelaiari egindako elkarrizketaren bideoa.